Read wanga ABAGALATIA 2 Bible Online

ABAGALATIA 2 - wanga bible

ABAGALATIA 2

¹Olunyuma olwemiyika ekhumi na chine, ndakalukha Yerusalemu nende Baranaba, nendi nende Tito.

²Ndatsia shichila Nyasaye yali niyamanyiye mbu okhuula enzieyo. Nendi nabemilisi mumukhung'ano kwamabiswi ndeenoosia oburume obwe Injiili eya ndayaalila Abamahanga. Shindayenya emilimo chianje echiandakhola khale noho echia ekholanga bulano chibe emikhaya echibula ebiamo tawe.

³Owashianje Tito, kata olwa ali Omugiriki, shiyahachibwa okhushebwa tawe,

⁴kata olwa abandi benya mbu ashebwe. Abandu balala bano bekatinjia mbu nabasuubili bashiefwe benjila masilisi mumukanda kwefu nibenyanga okhurunilisia, mbu bamanye khukobulekhule obwakhuli ninabwo mu Kristo Yesu. Benya okhukhulunyilisia okhufuchilila lilako elia eshi Yahudi liokhushebwa.

⁵Nebutswa, khulwa okhubela khwenya okhumulindila inywe obwatoto bwe Injiili obulayi buleshe okhukoyasibwa, shikhwafuchilila aka benya kata nahatuutu tawe.

⁶Nebutswa abo abekhola okhuba abemilisi; emboola endio shichila obukhongo bwabwe khwisie shineshindu tawe. Nyasaye shiahenganga khukhufwana khwomundu khwelwanyi tawe. Abemilisi abo shibayameetakhwo amechesio amayiakha tawe.

⁷Mushilenje shiokhumeeta amechesio amayiakha, balola mbu Nyasaye yambelesia omulimo kwokhuyaala Injiili khu Abamahanga, shinga olwa yali niyahelesia Petero omulimo okwa okhuyaala Injiili khu Abayahudi.

⁸Khulwa obunyali obwa Nyasaye isie ndakholwa okhuba omurume khu Abamahanga, shinga olwa Petero yakholwa okhuba omurume khu Abayahudi.

⁹Olwa Yakobo, Petero nende Yohana, abalolekha okhuba abemilisi abeifuma, balola mbu toto Nyasaye yambelesia omulimo omuchoomeshe kuno; kho bakhushesia mumakhono, isie nende Baranaba okhumanyia mbu bafuchilisania ninefwe muburume buno. Mana nikhufuchilisania mbu, isie nende Baranaba khuyaale mu Abamahanga, nabo bayaale mu Abayahudi.

¹⁰Nibakhwitsusia mbu, khulebililakhwo okhukhoonya abamanani tawe, ne elio nilio elia ndali nindarakhwo omwoyo okhukhola.

¹¹Nebutswa olwa Petero yetsa Antiokia, ndamukania habulafu, shichila kalolekha butswa mbu eshiina shilamufwila.

¹²Abandu aba Yakobo yaruma nibashili okhuula, Petero yali nalitsanga nende abaana befwe Abamahanga. Nebutswa, olwa abandu bano boola, yakalukha inyuma niyeyahula mana nalalia nende Abamahanga khandi ta, shichila yali narile omukanda okwa abandu abali nibenyanga mbu Abamahanga bashebwe.

¹³Abaana befwe bandi abeshiyahudi khandi boosi nibachaaka okhwifwayafwayia bario halala nende Petero; okhuula olwa kata Baranaba yesi yahunzulwa nende ebikhole biabwe ebioburi.

¹⁴Ne olwa ndalola mbu shibachendanga munjila inunji okhulondana nende obwatoto obwa Injiili ta, ndaboolela Petero imbeli wabwe boosi endi, “Iwe oli Omuyahudi, ne omenyanga shinga omumahanga, nolamenya shinga Omuyahudi tawe. Kho wakhatema oriena okhulunyia Abamahanga okhumenya shinga Abayahudi?”

¹⁵Toto mwene, ifwe khuli Abayahudi khulwa oburulanda bwefwe ne shikhuli “Abamahanga abonooni” ta, shinga olwa balangungwa.

¹⁶Ne ifwe khumanyile mbu omundu akholungwa okhuba omulunjishi imbeli wa Nyasaye okhubirira mubusuubili mu Yesu Kristo bwonyene, ne shikali khulwa okhukhola akamalako ka Musa kenyanga tawe. Fwesi khandi khwasuubila mu Kristo Yesu kho mbu khube abalunjishi imbeli wa Nyasaye mukhusubila khwefwe mu Kristo, nebutswa okhukhola akamalako ka Musa kaboolanga tawe. Ne abulaho oukholungwa omulunjishi imbeli wa Nyasaye mukuhkhola akamalako kalachili sia ta.

¹⁷Nikhwakhanyoolwa nikhuli “abonooni,” shinga olwa Abamahanga bali bario, olwa khuba nikhuteemanga okhuba abalunjishi mu Kristo imbeli wa Nyasaye. Kho kakhaba nikamanyinjia mbu Kristo akholanga akareela obwonooni noho? Shikali kario tawe!

¹⁸Nikaba isie ndakhachaka okhumbakha khandi amalako aka ndali nindamala khale okhulikulula kho emba ndimanyinjia omwene mbu endi omundu oufunakanga Amalako.

¹⁹Mumalako khu ndafwa nekholwa omulekhuule okhurula mubunyali bwa Amalako kho mbu enyalilwe okhumenya khulwa Nyasaye. Ndamala okhufwa nende Kristo khumusalabakwe,

²⁰kho bulano shindi isie oumenyanga ta, habula ni Kristo oumenyanga mwisie. Obulamu bwemenyanga bulano buno, emenyanga khulwa obusuubili mu Omwana wa Nyasaye owaheela isie mana nahaana obulamubwe khulwanje.

²¹Ndakhaya okhwikana obukoosia bwa Nyasaye. Nebutswa nikaba omundu akholwa omulunjishi imbeli wa Nyasaye khulwa Amalako, kaba kamanyinjia mbu okhufwa khwa Kristo khwali okhukhaya butswa!