Read wanga ABAGALATIA 3 Bible Online

ABAGALATIA 3 - wanga bible

ABAGALATIA 3

¹Inywe Abagalatia abasilu! Niwiina owamulochile? Mwaboolelwa habulafu obulayi bwene akokhufwa khwa Yesu Kristo khumusalaba!

²Mboolelekhwo eshindu shilala shino: Mwanyolile Roho wa Nyasaye khulwa okhukhola akamalako kenyanga noho okhuhulila nende okhusuubila Injiili?

³Mwakhaba murie abasilu murio! Mwachachila mu Roho wa Nyasaye; kho bulano mwenyanga okhumalilila mubunyali bwenywe abeene noho?

⁴Akamwabiriramwo kano koosi kali amakhaya butswa noho? Toto mwene kalikhwo neshifune!

⁵Nyasaye amuhelesinjia Roho nende okhukhola ebiamakana mwinywe shichila mbu mukholanga akamalako kenyanga noho mbu muhulilanga Injiili nimuchisuubila?

⁶Amahandiko kaboolanga mbu, “Aburahamu yasuubila Nyasaye, ne khulwa obusuubilibwe Nyasaye yamufuchilila okhuba omulunjishi.”

⁷Okhuula mumanye mbu, buli mundu ouli nobusuubili niye Omwana wa Aburahamu.

⁸Khale muno, Amahandiko kalakula mbu Nyasaye alifuchilila Abamahanga okhuba abalunjishi khulwa obusuubili. Amahandiko kaboola amakhuwa amalayi kano khu Aburahamu mbu; “Okhubirira mwiwe Nyasaye alahelesia abandu boosi tsikhabi.”

⁹Aburahamu yasuubila mana nanyoola tsikhabi; kho boosi abasuubila balanyoola tsikhabi shinga olwa ye yanyoola.

¹⁰Ne abo abeleetanga khukhukhola akamalako kaboolanga bali hasi we eshilaamo. Shichila Amahandiko kaboolanga mbu, “Omundu yesi oulalonda amakhuwa koosi akahandikwa mushitabu shiamalako ta ali neshilama!”

¹¹Bulano kali habulafu mbu shialiho owa Nyasaye yakhakhola okhuba omulunjishi khulwa obunyali bwamalako tawe, shichila Amahandiko kaboola mbu, “Omundu wa Nyasaye aluunjisia khulwa obusuubili yenyene niye oulabaho omulamu toto.”

¹²Nebutswa Amalako shikeleetanga khu busuubili ta. Nikalali shinga Amahandiko kaboolanga mbu, “Oyo yesi, oukhola koosi akamalako kaboolanga alabaho omulamu.”

¹³Shichila yakhalachilwa okhufwa khulwefwe, Kristo yakhununula okhurula mukhufwa okhwa Amalako karelanga, shinga Amahandiko kaboolanga mbu, “Noweshilaamo oyo owachikhwa khumusaala.”

¹⁴Kristo yakhola kano kho mbu tsikhabi tsia Nyasaye yasuubisia Aburahamu tsibe etsiakhahaanwa khuba Amahanga khulwa obunyali bwa Kristo Yesu, mbu okhubirira mubusuubili khube abanyala okhunyoola Roho wa Nyasaye yasuubisia.

¹⁵Abaana befwe enzia okhurumishila eshilolelo shiabuli nyanga: Olwa abandu babili bafuchilisania khundakano mana bahandichisanie nende okhura iseyi, abulaho ounyala okhuchifunaka noho okhumeeta eshindu khundakano eyo tawe.

¹⁶Ne bulano Nyasaye yahaana obusuubisie bubwe khu Aburahamu halala nende olwibulolwe. Amahandiko shikaboolanga mbu “tsinzibulotsie” tawe, akanyala okhuba mbu abandu abanji, nebutswa kaboolanga mbu, “olwibulolwe,” akamanyia mbu omundu mulala yenyene, omwene nali Kristo.

¹⁷Elia emboolanga lili mbu, Nyasaye yakhola indakano nende Aburahamu ne namusuubisia mbu alachilinda. Nako Amalako akahaanwa inyuma wemiyika ebikhumi bine namakhumi kataru (430). Kho, shikanyala okhufunaka indakano yilia mana karusieho obusuubisie bwa Nyasaye tawe.

¹⁸Okhuba nikakhaba mbu eshihaanwa shia Nyasaye eshiobulame shileetanga khumalako, kho shishiakhaba nishileetanga khubusuubisiebwe khandi tawe. Kata kario, kali khulwa okhubeera obusuubisiebwe obwachila Nyasaye nahelesia Aburahamu eshihaanwa eshio.

¹⁹Kho, bulano eshifune shiamalako shiali shiina? Kameetwakhwo khulwokhukhumanyia mbu amashiamu nakaleena, ne karebwaho okhuula lwowolwibulo lwa Aburahamu alitsa, owahelesibwa obusuubisie. Amalako ako kahaanwa nabamalaika, okhubirira khu Musa owakasinjilila shinga wanjila.

²⁰Nebutswa wanjila shiyenyekhanga lwomundu mulala yenyene akakhola ta; ne Nyasaye ni mulala.

²¹Kho kano kaboolanga mbu Amalako kafukulanga obusuubisie obwa Nyasaye noho? Tawe, kata nahatuutu ta! Nikaba mbu omundu yanyoola lilako eliakhamurelela obulamu, kho Nyasaye yakhakholile buli mundu okhuba omulunjishi khulwokhulilonda.

²²Nebutswa Amahandiko kaboolanga mbu, eshialo shiosi shili hasi wobunyali bwebionoono; kho eshihaanwa eshiasuubisibwa okhulondana nende obusuubili mu Yesu Kristo shihaanwa khwabo abasuubilanga.

²³Obusuubili nibushili okhwitsa, Amalako kakhuboha fwesi shinga ababohe okhuula lwokhwitsa okhwo obusuubili khwafimbulwa.

²⁴Khandi Amalako kakhwimilila ifwe okhuula olwa Kristo yetsa, kho achile khube Abanyasaye, khukhole khube abalunjishi khulwa obusuubili.

²⁵Ne bulano olwa eshise shiobusuubili shiliho bulaano, Amalako shikakhwimilila khandi tawe.

²⁶Mwesi pe muli abaana aba Nyasaye khulwa okhusuubila mu Kristo Yesu, eshifune mbu mwalimwasibwa nende Kristo.

²⁷Ne olwa mwabatiisibwa mu Kristo, bulano muli shinga abefwalile obulamu bwa Kristo.

²⁸Obwahukhani bubulaho hakari owa Abayahudi nende Abamahanga, abasumba nende abalekhuule, abasaatsa nende abakhasi. Mwesi mulimasibungwa mu Kristo Yesu.

²⁹Enywe nimuba nimuli aba Kristo, kho muli abolwibulo lwa Aburahamu, ne mulinyoola eshia Nyasaye yasuubisia.