Read wanga ABAGALATIA 4 Bible Online

ABAGALATIA 4 - wanga bible

ABAGALATIA 4

¹Akemboolanga kali mbu, owobulame bwemiandu chiasamwana akholwa butswa shinga omukhabani olwaba nashili omwana, kata olwa aba toto nali niye mwene emiandu echio chiosi.

²Ne olwa aba nashili omwana baliho abandu abamulinda ne nibasinjilila amakhuwake okhuula khubise ebia samwana yalaka.

³Munjila ndala yene eyo, ifwe fwesi khandi khwali abasumba betsiroho etsiobunyali burukanga eshialo, olwa khwali nikhushili okhuula khushichelo shikhoyele muroho.

⁴Nebutswa olwa ebise ebiahabwene biola, Nyasaye yaruma Omwanawe. Yetsa shinga omwana owibulwe nomukhasi mana namenya mumalako aka eshiyahudi,

⁵okhununula abo abali nibali hasi wamalako, mbu khube abanyala okhuba abaana ba Nyasaye.

⁶Ne, okhumanyia mbu muli abaanabe, Nyasaye yaruma Roho owa Omwanawe mumioyo chiefwe, Roho ouchilanga nikhurumbula mbu, “Nyasaye ni Papa wefwe.”

⁷Kho bulano iwe shioli omusumba khandi ta habula omwana omwibule. Ne okhubela mbu oli omwana wa Nyasaye oli owobulamebwe.

⁸Mutsinyanga tsiabira inywe shimwali nimwamanya Nyasaye ta, khandi mwali abasumba abebiloonje ebilaali abanyasaye ta.

⁹Nebutswa, olwa bulano mwamanyile Nyasaye obulayi, kata lekha emboole mbu, bulano Nyasaye yesi amumanyile inywe, kali karie khandi mbu, mwenya okhushiukhana nimukalukha khu roho etsirukanga abomushialo boosi; etsili tsindeshele khandi etsibula inganga? Eshichila inywe nimwenya okhukwa abasumba batsio khandi nishiina?

¹⁰Mulindanga tsinyanga tsindi nemiesi, netsindukho nende emiyika neshinani mimutsiyahula.

¹¹Emuhendelanga inywe okhushila! Kanyala okhuba mbu emilimo chianje chino chiosi khulwenywe chili butswa emikhaya?

¹²Abaana befwe, emusaaya mbu, mube shinga isie. Kata kario siesi endi butswa shinga inywe. Mushili okhukholelakhwo libi liosi.

¹³Mwitsulilanga eshiachila isie nemuyaalila Injiili olwambeli lwene; kali shichila mbu ndali nindwala.

¹⁴Nebutswa, kata nikaba mbu obuteshele obwomubili kwanje bwali amateemo amakali khwinywe, inywe shimwamala nimundechelesia noho okhundoba tawe. Habula, inywe mwanzinjisia shinga olwa mwakhenjisiye omumalaika okhurula mwikulu; mwanzinjisia isie shinga mwakhenjisia Kristo Yesu.

¹⁵Mwali abasangafu muno! Eshiekholeshe okhushila kano koosi nishiina? Isie omwene enyala okhuboola mbu mwali abakhatsomole tsimoni tsienywe abeene mana mumbelesie isie, nimuba nimwakhanyalilwe.

¹⁶Kho emalile okhukwa omusuku wenywe bulano khulwokhumuboolela akatoto noho?

¹⁷Abandu bandi abo bamumanyinjia mbu bamuhendelanga inywe okhushila, nebutswa lichoomo liabwe shilili lilayi tawe. Akabakhabanga butswa nokhumwahukhasia inywe okhurula khwisie; kho kachile inywe mube abokhubahendela shinga nabo bamuhendelanga.

¹⁸Bulano, bwakhaba obulayi okhuba nokhuhendelana nikaba lichoomo nelilayi, buli lwosi kano kabetsanga akatieli, shikabetsanga butswa akatieli olwa emba nindi ninenywe lwonyene tawe.

¹⁹Abaana banje abakoosi! Kali butswa shinga lwomwana alumanga omukhasi munzibula, embulilanga nasi siesi khandi ninumwa inzibula khulwenywe okhuula olwa imelo ya Kristo yikaasia mwinywe.

²⁰Ndikombanga toto shinga olwa enyala okhuba ninenywe bulano, kho kachile emupaarilekhwo lukano. Emuhendelaanga okhushila po!

²¹Lekha ereebe abo abali mwinywe abenyanga okhuba hasi wa Amalako mbu; shimuhulilanga eshiamalako kaboolanga tawe?

²²Kaboolanga mbu Aburahamu yali nabasiani babili, mulala owomukhasi omukhalabani noundi owomukhasi wuwe omwene oulali omukhalabani ta.

²³Omusianiwe owomukhasi omukhalabani, yebulwa shinga abandu boosi bebuluungwa, ne omusianiwe owomukhasi wuwe omwene oulali omukhalabani ta yebulwa okhulondana nende obusuubisie bwa Nyasaye.

²⁴Amakhuwa kano kanyala okhuhulilwa shinga akokhufwanania mbu; abakhasi babili abo bamanyia tsindakano tsibili. Ne oyo owabaana bebe bebulilwa mubukhalabami ni Hagari, ne naye amanyinjia indakano yahanilwa khushikulu shia Sinai.

²⁵Hagari oumanyia shikulu shia Sinai ebu Arabia, neshilolelo eshielitookho elia Yerusalemu eliliho bulano mubukhalabami khandi nende abandu balio boosi.

²⁶Nebutswa litookho lia Yerusalemu eliomwikulu neliobulekhule, ne nilio nyina ifwe.

²⁷Okhuba Amahandiko kaboolanga kari, “Iwe omukhasi omukumba oulebulanga ta, saangaala! Tselela nokhupa tsingalakala nende okhwikhoya, iwe oweyinzibula yilalumakhwo ta! Shichila omukhasi owalekhwa aliba nabaana abanji okhushila omukhasi oyo owomusaatsawe alamwibala tawe.”

²⁸Kho bulano abaana befwe muli abaana aba Nyasaye okhulondana nende obusuubisiebwe, shinga olwa Isaka yali.

²⁹Mutsinyanga etsio omwana webulwa shinga abandu boosi bebuluungwa yasandia oyo owebulwa khulwa Roho wa Nyasaye; ne kali butswa kario kata bulano.

³⁰Nebutswa Amahandiko Kaboolanga karie? Kaboolanga mbu, “Londa omukhasi omukhalabani uno nende omwanawe, shichila omwana owomukhasi omukhalabani shialahebwa obulaame bwemiandu chiasamwana nende omwana owomukhasi oulali omukhalabani tawe.”

³¹Kho bulano abaana befwe, ifwe shikhuli abaana abomukhasi omusumba ta, nebutswa khuli abomukhasi omulekhuule.