Read wanga ABAGALATIA 5 Bible Online

ABAGALATIA 5 - wanga bible

ABAGALATIA 5

¹Kristo yakhukhola abalekhuule! Akali kario mbu khuli abalekhuule toto. Kho musiimbile mubulekhule bwenywe, mulafuchililekhwo khandi okhuba abakhalabani aba malako tawe.

²Rechelesie! Isie Paulo emuboolela mbu, nimuba nimufuchilila abeene okhushebwa, kho aka Kristo yamukholele shikalikhwo nobukhala khwinywe kata nahatuutu tawe.

³Ne khandi engalushila okhuchetsiyia omundu yesi oushebwa mbu okhuula alonde koosi akamalako kenyanga.

⁴Ne abo khwinywe abateemanga okhukholwa abalunjishi imbeli wa Nyasaye khulwa okhulonda Amalako mumanye mbu mweyeyahukhasia abeene okhurula khu Kristo. Muli elwanyi wobukoosia bwa Nyasaye.

⁵Nebutswa ifwe, obunaayi bwefwe buli mbu Nyasaye alakhukhola khuba abalunjishi ninaye. Kano niko akakhulindiililanga khulwa obunyali bwa Roho wa Nyasaye oukholanga emilimo okhubirira mubusuubili bwefwe mu Kristo.

⁶Nikhuli abalondi ba Kristo obwahukhani bubulaho nikhuba nikhwashebwa noho nikhulashebwata; eshikhongo nobusuubili obukhukholanga okhuheela abashiefwe.

⁷Mwali nimutsiilililanga obulayi muno! Niwiina owachilile nimulekha okhulonda obwatoto? Yamulombelesia arie?

⁸Okhulombelesibwa khuno shikwarula khu Nyasaye wamulanga tawe.

⁹Shinga kaboolungwa mbu, “Limela litiiti butswa likholanga omuhayila kwobusie bunyoobilwe okhufimba.”

¹⁰Nebutswa isie eshimusuubilile inywe. Obulamu bwefwe mu Omwami bukholanga isie okhuba nobusuubili mbu shimulaba namapaaro akahukhane tawe. Naye omundu oumukoyasinjia oyo, kata nali wina, Nyasaye alamuhelesia eshinyasio.

¹¹Nebutswa khulwanje, abaana befwe, nikaba ndakhatsiililila okhuyaala mbu abandu bakhoyile okhushebwa eshichilanga nishisandibwa nishiina? Nikakhaba mbu ako nakatoto, kho okhuyaala khwanje khukomusalaba kwa Kristo shikhwakharelilekhwo obutinyu bwosi tawe.

¹²Ndikomba mbu abandu abo abamukoyasinjia inywe batsililile elala bario; lekha batsililile bario mana belate abeene!

¹³Ne khulwa inywe abaana befwe, mwahulwa okhuba abalekhuule. Nebutswa mulalekha obulekhule buno bube eshibehelesi eshiokhukhola obwikombi bwenywe bwomubili bumuruche tawe. Habula muleshe obuheeli bumukhole inywe okhukhalabanila abeene khu beene.

¹⁴Shichila Amalako koosi kakhung'asilibwa mwilako elala mbu, “Heela owashio shinga olwa wiheelanga omwene.”

¹⁵Nebutswa nimwakhaba nimuserana, nimusalisania abeene khu beene shinga tsisolo nabulimo, kho muhenjelesie nebutswa munyala mwamalana abeene khu beene.

¹⁶Eliemuboolela ndielino; leshe Roho yemilile obulamu bwenywe, ne shimulakhola akobwikombi obwomubili tawe.

¹⁷Okhubela akokhwenya khwefwe khwomubili kafukulanga aka Roho yenyanga. Nako ako Roho yenyanga kafukulanga akokhwenya khwefwe okhwomubili. Bibili bino nebisuku, kano kamanyinjia mbu shionyala okhukhola akawenyanga okhukhola tawe.

¹⁸Kho nikaba mbu wimililwa nende Roho, kho shiolaba hasi wamalako khandi tawe.

¹⁹Ebikhole biobwikombi bwomubili bimanyikhanga obulayi habulafu nabio mbiebino; obwilaasi, eshifwabwi, ebikhole bindi biobuyilani;

²⁰okhwinamila ebifwanani, obulosi, obusuku, obusolani, eshikhalikhali; liruma, obwimani, nende okhwahukhana mumikanda;

²¹imbalikha, obumeesi, obulang'u, nende akandi akafwanana kario. Emuchetsiyia inywe bulano shinga olwa ndaranjilila okhumuchetsiyia khale mbu; abo abakholanga ebindu bino shibalinyola obwami bwa Nyasaye tawe.

²²Nebutswa ebiamo bia Roho nobuheeli; obusaangaafu, omulembe, obwisumilisi, eshisa, obulayi, obwisiikwa,

²³obuholo, nende obwilindi. Libulaho lilako likaninjia abandu okhukhola kano.

²⁴Ne abo abali aba Kristo Yesu bamala okhwira imelo yabwe eyomubili halala nende obwilaasi nobwikombi bwayo bwosi.

²⁵Naye Roho yakhuhelesia obulamu; ne okhuula khandi alinde obulamu bwefwe.

²⁶Shikhukhoyele okhwichiinjimisia noho okhurangana abeene khu beene noho kata okhukhalishilana omukongo abeene khu beene tawe.