Read wanga ABAGALATIA 6 Bible Online

ABAGALATIA 6 - wanga bible

ABAGALATIA 6

¹Abaana befwe, omundu yesi nanyolekha nakholile obwonooni, abo abali nenderoho mwinywe; mumukololosie munjila yobuholo. Mana nenywe mwilinde abeene, muleshe okhwinjila mukhuteemwa.

²Mukhonyane okhuchinga emisiko chienywe; munjila yino mulalonda lilako lia Kristo.

³Ne omundu yesi naba niyepaarakhwo mbu nomukhongo ne nalali ario ta, omwene aba niyekatinjia butswa.

⁴Habula buli shiamulala achele emiimachie omwene. Nichiba nichili emilayi kho anyala okhwiyitsialila khukaba nakholile, nalakafwanania khukoundi yesi aba nakholile tawe.

⁵Shichila buli shiamulala okhuula aletuukha omusikokwe omwene.

⁶Omundu ouba niyechesibwa Amakhuwa aka eshikristo akhoyeele okhusanjilana nomweechesiawe mubindu biosi ebilayi biali ninabio.

⁷Mulekatia abeene ta; abulaho ounyala okhukatia Nyasaye. Okhuba eshiomundu yaraka nishio eshia alichesa.

⁸Ouraka mubwikombi bwomubili alichesa olufu, naye ouraka mu Roho alichesa obulamu bwobumeli.

⁹Kho khulachonya okhukhola amalayi ta; shichila nikhulafwa omwoyo khulwa okhukhola amalayi ta, ebise bitsanga ebiakhulichesa ebiakhwaraka.

¹⁰Kho bulano, buli olwa khunyoola obwiyangu, okhuula khukholele abandu boosi amalayi, ne okhushila muno, khubasuubili bashiefwe mu Kristo.

¹¹Lole eminyukuta shinga olwa chili emikhongo echia emuhandichile nomukhono kwanje omwene.

¹²Abandu bateemanga okhumulunyia mbu mushebwe. Abo nibo abenyanga okhwilolosia nende okhwiyitsialila khumakhuwa kalolekhanga elwanyi womubili. Kata kario bakholanga akene ako mbu kho baleshe okhusandibwa khulwa omusalaba kwa Kristo.

¹³Kata abashebungwa abo shibalondanga Amalako ta. Benyanga butswa mbu inywe mushebwe nibeyitsiala mbu inywe mwafuchilila omulukha kuno okwomubili.

¹⁴Nebutswa, isie ndaleyitsialila khukomusalaba okwa Omwami Yesu Kristo kwonyene; shichila okhubirira mubunyali bwomusalabakwe akeshialo kafwa mwisie khandi endi omufu khukeshialo.

¹⁵Okhushebwa noho okhubula okhushebwa shishili eshindu ta. Eshindu eshikhongo nokhuba eshilonje eshiyia.

¹⁶Nyasaye ahaane omulembe nende tsimbabasi khwabo abalondanga lilako lino mubulamu bwabwe, abihaane khandi khubandube boosi.

¹⁷Mukhumalilisia, omundu yesi alaanyasiakhwo khandi ta, shichila tsimbala tsia endi ninatsio khumubili kwanje tsimanyinjia mbu endi omusumba wa Yesu.

¹⁸Abaana befwe, obukoosia obwa Omwami Yesu Kristo bube ninenywe mwesi. Amina!