Read wanga ABAEFESO 1 Bible Online

ABAEFESO 1 - wanga bible

ABAEFESO 1

¹Eyirula khu isie Paulo, ouli omurume wa Kristo Yesu khulwa okhwenya okhwa Nyasaye; yule khubandu ba Nyasaye abali Efeso[1], abali abasuubilwa mubulamu bwabwe halala nende Kristo Yesu.

²Nyasaye ouli Sefwe nende Omwami weefu Yesu Kristo bamuhelesie inywe obukoosia nende omulembe.

³Khwitsoomie Nyasaye Samwana Omwami wefwe Yesu Kristo, owakhuhelesia buli ikhabi yosi eyeshiroho eyo mushialo shiomwikulu okhubirira mu Kristo.

⁴Nyasaye nashili kata okhulonga eshialo yali niyakhwahula ifwe okhuba abebe mu Kristo kho mbu khube abatakatifu, ababula eshikha shiosi imbeliwe.

⁵Khulwa obuheelibwe, Nyasaye yakhwahula khale mbu khukholwe abaanabe okhubirira mu Yesu Kristo, okhulondana nende lichoomo liokhwenyakhwe omwene.

⁶Khwitsoomie Nyasaye khulwa obukosiabwe bwoluyali, khulwa eshihaanwashie eshikhaya eshiayakhuhelesia okhubirira mu Mwanawe omuheelwa!

⁷Okhubela khulwa omusango kwokhufwa khwa Kristo khwakholwa abalekhuule, akali mbu; obwonooni bwefwe bileshelwa. Obukoosia bwa Nyasaye,

⁸obwa yakhuhelesia mubunji khandi nobukhongo muno. Mubuchesibwe bwosi nobumanyilisibwe obwiyinikhu,

⁹Nyasaye yakhola akayenya nakhufisulila akamasilisi aka yali niyakaasia khale mbu ketsusibwe mu Kristo.

¹⁰Obuloosie buno obwa Nyasaye aliusia olwa indukho iliula nokhurera ebilonje biosi halala, biosi ebili mwikulu nende mushialo hasi owa Kristo shinga omuruchi wabio.

¹¹Ebindu biosi bikholekhanga okhulondana nende obuloosie nende okhwenya khwa Nyasaye; ne Nyasaye yakhwaahula okhuba abandube mu Kristo okhubela okhwenyakhwe omwene, okhulondana nende aka yali niyabisia okhurula khukhuchaaka.

¹²Kho ifwe abaranjilila okhunaya mu Kristo. Khwitsoomie oluyali lwa Nyasaye!

¹³Khandi inywe mwesi mwekhola abandu ba Nyasaye olwa mwahulila likhuwa liobwatoto, nilio Injiili eyamurelera obuhonia. Mwasuubila mu Kristo, ne Nyasaye yamuhelesia Roho Omutakatifu owamusubisia, niye eshibalikho eshimanyinjia mbu muli abebe.

¹⁴Roho Omutakatifu uno niye omusingo mbu khulinyoola aka Nyasaye yalaka abandube, ne lino likhusuubisinjia mbu, Nyasaye alibanunulila elala abandube boosi. Khwitsoomie oluyalilwe!

¹⁵Khulweshifune shino, okhurula olwa ndahulila akobusuubili bwenywe mu Omwami Yesu nende obuheeli bwenywe khu bandu ba Nyasaye boosi,

¹⁶shinjweyanga okhupila Nyasaye orio khulwenywe nende okhumwitsulila mumasaayo kanje tawe.

¹⁷Esaayanga nereeba Nyasaye owa Omwami wefwe Yesu Kristo, Sefwe omwene oluyali, amuhelesie Roho oulamuhelesia obuchesi nende okhumufimbulila Nyasaye kho mbu mumumanye.

¹⁸Esaaya mbu, Nyasaye yekule amakani kenywe, kanyalilwe okhulola obulafubwe, kho mbu mumanye obunaayi obwo obwa yamulanjila nende shinga obuyinda bwe tsikhabi tsiayasuubisia abandube buli,

¹⁹nende shinga obunyalibwe khwifwe abasuubila olwa buli obukhongo okhushila. Obunyali obwo bukholanga emilimo mwifwe, buli shinga amaani amakhongo

²⁰aka yekhoonyela okhulamusia Kristo okhurula mukhufwa, nokhumwikhasia khumukhonokwe omusaatsa mwikulu.

²¹Kristo arukanga ebweneyo ikulu wabaruchi bomwikulu boosi nobunyali, namani, nabami. Khandi ali nende eliira elishila ameera koosi kata akarumbulwa munyanga muno, kata akalirumbulwa mutsinyanga tsitsanga.

²²Nyasaye yara ebindu biosi hasi woburuchi bwa Kristo, mana yamukhola okhuba omuruchi webindu biosi khandi omwimilisi weikanisa.

²³Ikanisa, nomubili kwa Kristo eyimwitsusinjia naye niyetsusia ebindu biosi buli habundu.