Read wanga ABAEFESO 2 Bible Online

ABAEFESO 2 - wanga bible

ABAEFESO 2

¹Khale mwali nimwafwa muroho khulwa okhubela obukhayi nende obwonooni bienywe.

²Olwenolo mwalondanga ebiima ebibi ebieshialo, mwahulilanga oyo ourukanga ebishieno mumuya, omuruchi wurukanga bulano abandu balahulilanga Nyasaye ta.

³Toto mwene fwesi khwali shinga abo ne khwamenyanga okhulondana nende obwikombi bwefwe obwemibili chiefwe, nikhukhola akokhwenya khwomubili nende amapaaro kefwe. Mumelo yefwe yemibili shinga abandu bandi boosi, khwali nikhukhoyele okhunyoola eshinyasio shia Nyasaye.

⁴Nebutswa, Nyasaye nowetsimbabasi tsinyinji khandi obuheelibwe khwifwe nobunji muno,

⁵mbu kata olwa khwali nikhwafwa muroho khulwa obukhayi bwefwe yakhukalusilia obulamu okhubirira mu Kristo. Ne mwahonibwa khulwa obukoosia bwa Nyasaye.

⁶Nyasaye yakhulamusia halala mu Kristo mbu, khwikhale halala ninaye mwikulu.

⁷Yakhola kano kho mbu alolesie inziayo obuyinda obukhongo bwobukoosiabwe mubuheeli obwa yakhulolesilia mu Kristo Yesu.

⁸Okhubela, khulwa obukoosia bwa Nyasaye mwahonibwa okhubirira mubusuubili. Likhuwa lino shiliakholekha khulwa obunyali bwenywe abeene ta, habula neshihaanwa shia Nyasaye.

⁹Kata shikhwarula khubikhole bienywe abeene kho mbu omundu yesi yeyitsialile tawe.

¹⁰Nyasaye yakhulonga shinga khuli, mukhusanga nende Kristo Yesu yakhulonga khulwa obulamu bwebikhole ebilayi ebia yakhurecheshela khale mbu khukhole.

¹¹Enywe Abamahanga khulwa okhwibulwa, aba Abayahudi balaanganga mbu “abasinde” nabo abeene nibelanga mbu “abashebwa” (eshili butswa eshindu eshikholungwa khumubili namakhono), mwitsulile shinga mwali khale.

¹²Khale lwene olwo mwali ehale okhurula khu Kristo. Mwali abarende, ne shimwali oboluyia olwa Isiraeli tawe, shimwabasilibwa mutsindakano tsiobusuubisie etsia Nyasaye yakhola tawe. Mana mwamenya mushialo muno nimubula obunyali khandi nimubula Nyasaye.

¹³Nebutswa, bulano mukhuhambana nende Kristo Yesu, inywe abalinji ehale, mwasitibwa ahambi khulwa omusango kwokhufwa khwa Kristo.

¹⁴Okhuba Kristo omwene yakhurelera omulembe khulwa okhulimasia Abayahudi nende Abamahanga nabakhola oluyia lulala. Nomubili kukwe omwene yalikulula omuse kwali nikwabakabukhasia nikwabakhola abasuku.

¹⁵Yarusiaho lilako elia Abayahudi halala nende amakhuwa namechesio kalio, kho mbu okhurula mutsimbia tsibili tsino akhole oluyia lulala oluyiakha mubulimani ninaye omwene, ne munjila yino narela omulembe.

¹⁶Khulwa okhufwakhwe khumusalaba, Kristo yasishia obusuku bwabwe; okhubirira khumusalaba yalimasia tsimbia tsiombi mumubili mulala natsikalusia khu Nyasaye.

¹⁷Kho Kristo yetsa nayaala Injiili yomulembe khubandu boosi, khuba Amahanga abali ehale okhurula khu Nyasaye, nende khuba Yahudi abali ahambi khu Nyasaye.

¹⁸Ne nokhubirira mu Kristo, omwa ifwe fwesi, Abayahudi nende Abamahanga, khunyalilungwa mu Roho ndala okhwitsa imbeli wa Sefwe.

¹⁹Kho bulano inywe Abamahanga shimushili abacheni kata abarende ta, nebutswa bulano muli abamenyani khandi aboluyia lwa Nyasaye, muli abeinzu ya Nyasaye.

²⁰Inywe mwesi khandi mwombakhwa khumuse okwa Abarume nabalakusi aba Nyasaye basimikha, naye Yesu Kristo omwene niye lichina likhongo liomukona.

²¹Niye oulimasinjia halala omumbakho kuno kwosi nende okhukukhola okhukhula nikuba Ihekalu indakatifu khulwa OMWAMI Nyasaye.

²²Mukhusanga halala ninaye inywe mwesi khandi mumbakhungwa halala nende abandi boosi nimwikhola eshimenyo eshia Roho wa Nyasaye amenyangamwo.