Read wanga ABAEFESO 3 Bible Online

ABAEFESO 3 - wanga bible

ABAEFESO 3

¹Khulwokhubela aka Nyasaye yakhola okhulimasia Abayahudi nende Abamahanga, isie Paulo omubohe wa Kristo Yesu khulwa inywe Abamahanga esaayanga khu Nyasaye.

²Toto mwene mwahulila mbu Nyasaye mubukoosiabwe yambelesia omulimo kuno mbu kube ekweinganga khwinywe.

³Nyasaye yafimbulila lichoomo lielibiso lilie mana niyamanyia eliatsana. Ndahandika mubwimbichiti khu kano,

⁴ne nimusooma akandahandika, munyala okhweka khukhumanyilisia khwanje khwibiso lia Kristo.

⁵Khale Nyasaye shiyali niyafunulila omundu yesi libiso lino tawe, nebutswa bulano yahaanile Rohowe okhulifunulila abarumebe abatakatifu nabalakusi bebe.

⁶Libiso tsana ndielino mbu; okhubirira mu Injiili, Abamahanga bali nomukabo halala nende Abayahudi mutsikhabi etsia Nyasaye; khandi nebiungo biomubili tsana, khandi nabasanji mubusuubisie obwa Nyasaye yasuubisia okhubirira mu Kristo Yesu.

⁷Ndakholwa omukhalabani owa Injiili, khulwa eshihaanwa shiobukoosia obwa Nyasaye, eshia yambelesia okhubirira mubukholi bwobunyalibwe.

⁸Isie kata nendi omumalilishi mwene wokhubandu aba Nyasaye boosi, nebutswa Nyasaye yambelesia obukoosia obwo, mbu eyalile Abamahanga khukobuyinda bulachelwa ta, obwetsikhabi tsia Kristo.

⁹Khandi mbu, ekhole abandu boosi okhulola shinga lichoomo lielibiso lia Nyasaye lihesibwa. Nyasaye ouli omulonji webindu biosi yafisa libisolie lino mumiyika chiahwa chiosi.

¹⁰Kho mbu mubise biabulaano okhubirira mukanisa, abamalaika boburuchi nende abobunyali bomwikulu banyalilwe okhumanya obuchesi bwa Nyasaye mutsimela tsiabwe tsiosi.

¹¹Nyasaye yakhola kano okhulondana nende tsiyemitsie etsiobumeli etsiayakhuhelesia mu Kristo Yesu Omwami wefwe.

¹²Mukhulimana nende Kristo, nende okhubirira mubusuubili bwefwe muye, khumanga ikholo okhwitsa imbeli owa Nyasaye neitswoni yosi.

¹³Khulwako emusaaya mbu mulafwa emioyo shichila mbu, enyakhananga khulwenywe tawe, koosi nakoluyali khwinywe.

¹⁴Khulwe shifune shino esikamilanga Sefwe,

¹⁵owa okhurula khuye buli oluyia mwikulu nende mushialo lunyolanga eliira lialwo liatoto.

¹⁶Esaaya Nyasaye mbu okhurula khubuyinda bwoluyalilwe amuhelesie inywe okhubirira mu Rohowe obunyali obwokhutinyia mukari mwenywe,

¹⁷Khandi esaaya mbu Kristo amenyenje mumioyo chienywe okhubirira mubusuubili. Esaaya mbu muralile nimusimikha emisi chienywe mubuheeli,

¹⁸kho mbu inywe, halala nabasuubili boosi, mube nobumanyi bwokhumanyilisia shinga lwobubambukhu, noburambi, obuchingukhu, nobwiyinikhu, bwobuheeli bwa Kristo buli.

¹⁹Toto, munyalilwe okhumanya obuheeli bwa Kristo, kata olwa buba nibulanyala okhumanyilwa elala ta, mana mwitsuusibwe elala nokhufwana khwa Nyasaye.

²⁰Khu Nyasaye owa okhubirira mubunyalibwe obukholanga emilimo mwifwe ounyala okhukhola amakhuwa amakhongo muno okhushila aka khunyala okhusaba kata okhupaarakhwo;

²¹oluyali lube khuye mukanisa nende mu Kristo Yesu buli lwosi okhuula inziayo, ebisoni nebisoni Amina.