Read wanga ABAEFESO 4 Bible Online

ABAEFESO 4 - wanga bible

ABAEFESO 4

¹Isie, ouli omubohe khulwa Omwami, emutsuuba okhumenya obulamu bwahabwene, shinga kakhoyeele omulango okwa mwalaanjilwa.

²Buli lwosi mubetsenje abetietuyi, abaholo, abefwili. Khandi mwisumilisaninjie mubuheeli.

³Khole shinga munyalilwa okhulinda obulala obwa Roho ahaananga okhubirira mumulembe okumulimasinjia halala.

⁴Kuliho omubili mulala khandi Roho mulala, shinga olwa buliho obunaayi bulala obwa Nyasaye yamulanjila.

⁵Aliho Omwami mulala, obusuubili bulala, Obubatiisi bulala;

⁶aliho Nyasaye mulala ouli Samwana abandu boosi, omuruchi waboosi, oukholanga emilimo muboosi namenyanga muboosi.

⁷Buli mulala khwifwe wahebwa obukoosia okhulondana neshichelo shieshihaanwa eshia Kristo yahaana.

⁸Shinga olwa Amahandiko kaboolanga mbu; “Olwa yatikulukha natsia mwikulu, yatsia nende abahambe abanji, yahelesia abandu ebihaanwa.”

⁹Ne eshisina shielikhuwa mbu, “Yatikulukha” nishiina? Eshisina shialio shili mbu, olwambeli yekha hasi bwene mushialo.

¹⁰Kho mulala mwene oyo owekha, khandi niye omwene owakulukha ikulu muno okhubira likulu liosi kho mbu abe hosi.

¹¹Ne ebihaanwabie ebia yahaana biali mbu, balala babe abarume nabandi abalakusi aba Nyasaye, abandi abayali beinjili, abandi abaayi aba abakristo khandi abeechesia.

¹²Yakhola ario okhurechekha abandu aba Nyasaye khulwa omulimo okwokhukhalabanila Abakristo, kho bombashe omubili kwa Kristo.

¹³Kho fwesi khulilimana halala mubulala bwobusuubili bwefwe nende obumanyi bwefwe obwa Omwana wa Nyasaye; khuliikhola abandu abatuukhu abakhulile okhuula khushichelo shieshimo shiobulamba obwa Kristo.

¹⁴Kho mana shikhuliba abaana khandi ta, abachingwa namarunda nikhuhutswa eyi nende eyi nende buli amechesio kabiranga akabandu abekaati tawe. Abandu bechesinjia abandi obubeeyi nende obubatsa.

¹⁵Nebutswa khulwa okhuboola akatoto mumwoyo kwobuheeli, khukhoyeele okhukhula mutsinjila tsiosi mu Kristo ouli omurwe.

¹⁶Ne hasi wobwimilisi bubwe ebiungo biosi ebiaukhane ebiomubili bieyunga halala, ne buli eshiungo mumubili shikhonyanga okhulimasia omubili kwosi halala. Kho olwa buli eshiungo eshiahukhane shikholanga emilimo shinga olwa shikhoyele, omubili kwosi kukhulanga nikwiyumbakha mubuheeli.

¹⁷Kho muliira elia Omwami emuchetsiyinjia mbu; mulatsiililila okhumenya shinga abandu abalamanyile Nyasaye, abamapaaro kabwe nikabutswa,

¹⁸Khandi amachesi kabwe kali mushiilima tawe. Shibali nomukabo mubulamu bwa Nyasaye ahaananga ta, shichila babula amachesi khandi nabeinduli.

¹⁹Babula isoni, bakorera mubwilasi, nende okhukhola koosi keshifwabwi nibaleleshesia ta.

²⁰Kano shikali akamweka khu Kristo ta!

²¹Toto mwene mwamuhulilekhwo, khandi shinga abalondibe, mwechesibwa obwatoto buli mu Yesu.

²²Kho muleshe ebiima bienywe ebiakhale ebiachilanga nimumenya shinga mwalinji, imela yenywe yakhale eyasishibungwa nende obwikombi bwomubili.

²³Emioyo nende amakani kenywe okhuula bikalukhasibwe obuyiakha,

²⁴Khandi okhuula mwifwale imelo imbiakha eyalongwa mwikondo elia Nyasaye khandi eyilolesia mubulamu bwatoto obuli obulunjishi khandi obutakatifu.

²⁵Khulwako, muleshe Obubeeyi bwosi. Buli mundu aboolele omusuubili washie akatoto, okhubela buli shiamulala khwifwe neshiungo shiomubili kwa Kristo.

²⁶Nimwakhatilwa neliruma mulafuchilile liruma elo okhumwinjisia mubwonooni ta, kata mulahonga inyanga yosi nimuli neliruma tawe.

²⁷Mulahelesia Setani obwiyangu tawe.

²⁸Omundu owalinji omwifi, okhuula aleshe obwifi mana achache okhukhola emilimo namakhonoke yenyoolele ebiobulamubwe mubwatoto khandi anyalilwe okhukhoonya abatakha.

²⁹Mularumishila amakhuwa amabi tawe, habula akobukhoonyi konyene, akokhumbakha nikarela akenyekha, mana akamuboola kabe amalayi khwabo abamuhulilisinjia.

³⁰Mulabelesia Roho Omutakatifu wa Nyasaye tawe; okhuba Roho oyo niye eshibalikho khwinywe mbu muli abandu ba Nyasaye khandi obusuubisie mbu inyanga yitsanga eya Nyasaye alimuboholola.

³¹Kho muleshe obululu bwosi, obwikombi, noburuma, nobuyoka nende amanyeko, isila yosi yosi ilabaho tawe.

³²Nebutswa mube neshisa nende emioyo chietsimbabasi khubashienywe, ne muleshelanenje abeene khu beene shinga Nyasaye yamuleshela okhubirira mu Kristo Yesu.