Read wanga ABAEFESO 5 Bible Online

ABAEFESO 5 - wanga bible

ABAEFESO 5

¹Kho olwa muli abaana aba Nyasaye abaheelwa mukhoyile okhuteema okhuba shinga ye.

²Obulamu bwenywe okhuula bwimililwe nobuheeli, shinga Kristo yakhuheela, niyehaana omwene shinga omusango kweshiuya eshieisiakakha khandi eshihaanwa eshichamisia Nyasaye.

³Khulwa okhubela muli abandu ba Nyasaye, obuheyi noho eshifwabi noho kata obulang'u bilarumbukhakhwo mwinywe tawe.

⁴Kata shimukhoyele okhurumishila amakhuwa keshifwabi, akeshifimbwamurwe kata amang'asio akobwilaasi tawe. Habula mukhoyile okhupila Nyasaye orio.

⁵Mumanye toto mbu, omundu yesi owobuyehi, oweshifwabi kata owobulang'u (shichila obulang'u khufwana shinga okhwinamila ebifwanani) shialinyoolakhwo omukabo muburuchi bwa Kristo nende obwa Nyasaye tawe.

⁶Mulafuchilile omundu yesi okhumukaatia namakhuwa kobusilu ta; khulwa okhubela amakhuwa shinga kano kalichila liruma elia Nyasaye lietsa khu abo abalamuhulilanga ta.

⁷Kho mulasanjilanekhwo nabandu shinga abo tawe.

⁸Inywe abeene mwamenyanga mushiilima, nebutswa olwa mwekhola abandu aba Omwami, muli mubulafu. Kho okhuula mumenye shinga abandu bobulafu,

⁹okhuba nobulafu obureranga lichesa lilayi elia buli shindu shiosi eshilayi eshiobulunjishi khandi eshiobwatoto.

¹⁰Teeme okhweka akachamisia Omwami.

¹¹Mulasanjilanekhwo nende amakhuwa kabutswa kabandu bakholanga ta, akali amakhuwa keshialo shino; habula mubarusiemwo nimubarera mubulafu.

¹²Naketsisoni muno okhuboolakhwo khumakhuwa kabakholanga mumabiswi.

¹³Ne olwa ebindu biosi biliyinibwa nibirelwa mubulafu, nilwo olwa imelo yabio yatoto yililolesibwa obulayi.

¹⁴Shichila eshindu shiosi eshilolesibwa obulayi shiikholanga obulafu. Niko akachila Amahandiko nikaboola mbu; “Iwe oukonanga tsindoolo bukha, sisimukha okhurula mukhufwa naye Kristo alakhwashila.”

¹⁵Kho muchetsihe shinga olwa mumenya. Mulamenya shinga abandu abasilu ta, habula shinga abachesi.

¹⁶Mwikhonyele obulayi obwiyangu buliho shichila tsinyanga tsino ne tsimbi.

¹⁷Mulaba abayingwa ta, nebutswa muteeme okhukhabilisia obulayi aka Omwami yenyanga mukhole.

¹⁸Mulameelenje idivai ta, okhuba kalamwonoonia; habula mwitsulwemwo Roho.

¹⁹Mwimbilanenje abeene khu beene mutsitsabuli, tsinyimbo tsindakatifu; yimbile Omwami tsinyimbo nende tsitsabuli nimumwitsoomia mumioyo chienywe.

²⁰Mulira elia Omwami wefwe Yesu Kristo, mukhupilenje Nyasaye sefwe orio buli lwosi khumakhuwa koosi.

²¹Mwitutuyinjie oundi khu oundi khulwa okhuhelesia Kristo oluyali.

²²Inywe abakhasi, mwitutuyinjie khu abasaatsa benywe shinga khu Omwami.

²³Okhuba omusaatsa nomurwe kwomukhasi shinga Kristo ali omurwe okwa ikanisa; Kristo omwene niye omuhonia wabasanji aba ikanisa eyili omubilikwe.

²⁴Ne shinga ikanisa yihulilanga Kristo nilwo olwa abakhasi boosi bakhoyile okhuhulila abasaatsa babwe mumakhuwa koosi.

²⁵Abasaatsa mukhoyile okhuheela abakhasi benywe shinga Kristo yaheela ikanisa nahaana obulamu bubwe khulwayo.

²⁶Kristo yakhola ario khulwa likhuwalie mbu ahaane Ikanisa khu Nyasaye, namalile okhuchisiiya khulwa okhuchiosia mumaatsi,

²⁷mbu yehelesie omwene Ikanisa eyoluyali khandi indakatifu eyibula eshikha, eshitondonye kata likhanya, nohomba obulemu bundi bwosi.

²⁸Kho kario abasaatsa bakhoyile okhuheela abakhasi babwe shinga beheela abeene. Omusaatsa ouheela omukhasiwe yeheela omwene.

²⁹Abulaho owasila omubili kukwe omwene. Habula, akulisinjia nakutenda, shinga Kristo atendanga Ikanisa;

³⁰okhuba ifwe khuli ebiungo biomubili kukwe.

³¹Shinga Amahandiko kaboolanga mbu; “Khulwe shifune shino omusaatsa alalekha samwana nende nyina, ne ahambaane nende omukhasiwe, nabo babili boosi balekhola omubili mulala.”

³²Lino nelibiso likhongo nasi emboolanga mbu libiso lino liboolanga khumakhuwa aka Kristo nende Ikanisa.

³³Nebutswa amakhuwa kano kali khwinywe khandi mbu; buli omusaatsa okhuula aheele omukhasi wuwe, shinga olwa yeheelanga omwene, naye omukhasi okhuula ahelesie omusaatsawe oluyali.