Read wanga ABAEFESO 6 Bible Online

ABAEFESO 6 - wanga bible

ABAEFESO 6

¹Abaana, muhulilenje abebusi benywe shinga lilako elia eshikristo liboolanga; okhuba lino nelikhuwa liahabwene okhukhola.

²“Helesinjia papawo nende mamawo oluyali;” lino nilio lilako liambeli elili nende obusuubisie mbu,

³“Kho amakhuwako kabetsenje amalayi khandi omenye nohindila mushialo.”

⁴Nenywe abebusi mulabahambia abaana benywe liruma ta. Habula mubakhusie nimubebaalila mubima ebia eshikristo.

⁵Abakhalabani, muhulilenje abo abali abami benywe bomushialo muno noburi nokhutechela; ne mukhole murio nemioyo chieshilongoole shinga abakhalabanilanga Kristo.

⁶Mulakhole kano olwa baba nibamuhenjelesinjia kho mbu mubachamisie tawe; habula nemioyo chienywe chiosi mukhole aka Nyasaye yenyanga, shinga abakhalabani aba Kristo,

⁷Khalabane emilimo chienywe nemioyo chiobusaangaafu, shinga abakhalabanilanga Omwami, tawe abandu nabandu.

⁸Mwitsulile mbu Omwami alirunga buli mundu, abe omukhalabani noho omwibule khulwa emilimo emilayi chiakhola.

⁹Nenywe abami, mukholelenje abakhalabani benywe amakhuwa malala ako, muleshe okhubasiomela. Mwitsulile mbu, inywe nende abakhalabani benywe muli aba Omwami mulala mwikulu, oulalolesinjia emiawukho mubukhalachibwe tawe.

¹⁰Mukhumalilisia, mumbashe amaani kenywe mu Omwami khulwa okhubirira mubunyalibwe obukhongo.

¹¹Mwifwale ebimanulwa bia Nyasaye amuhelesinjia biosi kho mbu munyalilwe okhuhula obubatsa obwa Setani.

¹²Ifwe shikhulwananga nabandu tawe, habula khulwananga nende emikanda echiebishieno echili mumuya, abaruchi, abobunyali nende abakhongo bobunyali bweshilima mushialo muno.

¹³Kho bulano mwifwale ebimanulwa ebia Nyasaye ahaananga biosi! Mana olwa inyanga yamabi yitsa, mulanyalilwa okhusimbiila khumusuku, ne nimulwanile okhuula okhumala, mulaba nimushisimbile. .

¹⁴ Mwirecheshe! Obwatoto bube shinga omushipi mubishienje bienywe, ne obulunjishi shinga eshikhuumba khushilifu,

¹⁵nabwo obuha bwokhuyaala amakhuwa amalayi akomulembe bube shinga ebilaaro mubilenje bienywe.

¹⁶Buli lwosi muchinje obusuubili shinga ingabo; okhuba nimuli ninayo mulanyalilwa okhusimilia obura bwomulilo obwa Omumayanu oyo.

¹⁷Fuchilile obuhonia shinga ikutwa, ne Likhuwa elia Nyasaye shinga olukanga olwa Roho amuhelesinjia.

¹⁸Mukholenje kano koosi nimusaaya khu Nyasaye nende okhumusaba obukhoonyi. Musaayenje buli lwosi shinga olwa Roho amwimilila. Khulweshio mube meeso, mulachonya tawe. Musaayilenje abandu ba Nyasaye boosi buli lwosi.

¹⁹Siesi khandi musaayilekhwo mbu; Nyasaye yambelesie oburume olwa emba nenzia okhuboola, mana erumbule neitswoni amabiso aka Injiili.

²⁰Endi omurumwa khulwa Injiili yino, kata olwa endi mumbohe bulano. Musaaye mbu embe nitswoni okhurumbula Injiili shinga ekhoyeele.

²¹ Tikiko omwana wefwe omuheelwa khandi omukhalabani omusuubilwa wemilimo echia Omwami alamuboolela amakhuwa kanje koosi, kho mbu mumanye shinga olwa enzilililanga.

²²Niko akachila nemuruma khwinywe mbu amuboolele shinga olwa fwesi khutsiilililanga khandi amutinyilisie.

²³Nyasaye Sefwe nende Omwami Yesu Kristo bakhoya bahelesia abaana befwe Abakristo boosi omulembe, obuheeli nobusuubili.

²⁴Obukoosia bwa Nyasaye bube khu abo boosi abamuheelanga Omwami wefwe Yesu Kristo nobuheeli bulahwaho ta.