Read wanga ABAFILIPI 1 Bible Online

ABAFILIPI 1 - wanga bible

ABAFILIPI 1

¹Eyirula khwisie Paulo nende Timotseyo, abakhalabani ba Kristo Yesu. Yule khu Abakristo boosi abamenyanga ebu Filipi abali abasuubili mu Kristo Yesu, halala nabemilisi nende abakhonyeleli abomwikanisa:

²Nyasaye Sefwe nende Omwami Yesu Kristo bamuhelesie inywe obukoosia nende omulembe.

³Ekhupilanga Nyasaye wanje orio kulwenywe buli lwosi olwa emwitsulilanga inywe;

⁴ne buli lwosi olwa emusaayilanga mwesi, esaayanga nindikhoya,

⁵khulwa obukhoonyi bwenywe khwisie mumulimo okwobuyaali obwa Injiili okhurula khukhuchaaka okhuula bulano.

⁶Mana emanyile elala mbu Nyasaye, owachachia omulimo omulayi kuno mwinywe, alatsiililila okhukukhola okhuula olwa kulihwa khunyanga ya Kristo Yesu alikalukha.

⁷Buli lwosi emupaarangakhwo mumwoyo kwanje! Mana kho kali butswa habwene isie okhwihulila shinga olwa ndihulilanga khwinywe endinanwa. Shichila inywe mwesi mwasanga ninasi mubukoosia obwa Nyasaye yambelesia isie, kata olwa endi mumbohe bulano nende kata olwa ndali nishili omulekhuule okhuteteya Injiili nende okhuchitinyilisia.

⁸Okhuba Nyasaye nomuloli wanje mbu, emuboolelanga inywe obwatoto olwa emboolanga mbu, ndamuheela inywe shinga olwa Kristo Yesu mwene amuheelanga.

⁹Esaaya mbu, obuheeli bwenywe butsililile okhumeetekha nibukhula, halala nende obumanyi bwatoto nende obukhalachi bwahabwene,

¹⁰kho munyalilwe okhwahula akali amalayi okhushila. Mana mulaba abalekhuule okhurula mushifwabi shiosi, khandi okhubula eshikha khunyanga eya Kristo alikalushilakhwo.

¹¹Obulamu bwenywe buletsusibwamwo nebiamo ebilayi ebiobulunjishi ebia Kristo Yesu yenyene anyala Okhuhaana khulwa oluyali nende yifuma eya Nyasaye.

¹²Abaana befwe, enzenya inywe mumanye mbu, akekholekha khwisie kakhonya toto okhutswania Injiili.

¹³Ne khulwa akene ako, abalindi abeitookho boosi nende abandi boosi hano bamanyile mbu, isie endi mumbohe shichila mbu endi omukhalabani wa Kristo.

¹⁴Ne okhuba khwanje mumbohe hano khwakholile abaana befwe abanji okhuba nobusuubili obukali mu Omwami, kho mbu kachila buli lwosi babetsanga neyitswoni okhuyaala oburume bwa Nyasaye nibalali noburi tawe.

¹⁵Okhuba toto balala khubo bayaalanga oburume bwa Kristo shichila bali neshikhalikhali khandi nabasoolani, nebutswa abandi bakholanga bario nibali nelichoomo lilayi eliahabwene.

¹⁶Abeene bano bakholanga bario okhurula mubuheeli, shichila bamanya mbu Nyasaye yambelesia isie omulimo okwokhuteteya Injiili.

¹⁷Ne abandi nabo shibayaalanga aka Kristo mubwatieli ta, habula bakayaalanga nomwoyo kwokhwiyenyela abeene, bapaaranga mbu banyala okhuchila ndaba namanyakhano amanji nendi mumbohe.

¹⁸Yako shikali eshindu ta! Isie ekasangalilanga, nikaba butswa mbu oburume bwa Kristo buyaalungwa munjila yosi eyinyalikhana, kata nikakhaba munjila indayi noho imbi isie ndalatsiililila okhuba butswa omusangafu,

¹⁹shichila isie emanyile mbu, khulwa obunyali bwa masaayo kenywe nende obukhoonyi oburulanga khu Roho wa Yesu Kristo, isie ndakhalekhulwe.

²⁰Obwikombi bwanje obukhongo nende obunaayi bwanje buli mbu ndalachweyakhwo okhukhola omulimo kwanje ta, habula mbu mubise biosi, ne okhushila muno bulano buno, enzitsulemwo yitswoni kho mbu kachile erumishile obulamu bwanje bwosi okhureelela Kristo yifuma kata nefwa kata nimba mwoyo.

²¹Khwisie okhuba mwoyo ni Kristo, ne okhufwa nobukhala okhushila.

²²Nebutswa, nikakhaba mbu mukhutsilila okhuba mwoyo enyala ndakhola emilimo emilayi okhushila, kho engorwa mbu ndakhahula elileena khuko tawe.

²³Ekhwesungwa mutsimbeka tsibili; ndikombanga okhushila khwene okhwinyokha erule mubulamu buno mana embe nende Kristo, shichila kano namalayi okhushila;

²⁴nebutswa, khulwenywe kenyekha okhushila mbu embe mwoyo.

²⁵Isie esuubile kano, ne kho emanyile mbu ndalaba mwoyo. Ndalaba butswa omulamu halala ninenywe, mbu embe oumeeta khubutsililili bwenywe obulayi nende okhwikhoya mubusuubili.

²⁶Mana olwa engalukha ewamuli khandi mulaba nende eshifune eshilayi eshiokhwiyitsiala mu Kristo Yesu khulwanje.

²⁷Ne bulano eshindu eshikhongo shili mbu, yinjila yenywe eyobulamu okhuula yibe shinga olwa Injiili ya Kristo yenyanga. Kho mbu kata nimba nenyalilwa okhumucheniha noho nikhaywa, embulile mbu inywe mwasimbiila obutinyu mulichoomo elala. Ne ndalamanya mbu muli nokhwikoomba khulala khwonyene okhwokhulwanila halala nomwoyo mulala khulwobusuubili obwa Injiili.

²⁸Mularie abasuku benywe tawe; mubetsenje abeitswoni, mana kano kalabamanyia mbu, bo balakosia nenywe mulahula, shichila Nyasaye niye oumuhelesinjia obuhuli.

²⁹Inywe mwahelesibwa obwiyangu bwokhukhalabanila Kristo, shikhuli butswa okhusuubila muye khwonyene ta, habula khandi khulwokhusandibwa khululwe.

³⁰Kho bulano munyala okhusanga ninasi mwihe. Ne lihe liene liamwalola isie nelwanangamwo mutsinyanga tsiabira, mana shinga olwa muhulilanga, nilio elieshilwananga okhuula bulano.