Read wanga ABAFILIPI 2 Bible Online

ABAFILIPI 2 - wanga bible

ABAFILIPI 2

¹Obulamu bwenywe mu Kristo bumukholanga okhuba abamaani, nabwo obuheelibwe bumuleminjia emioyo. Roho wa Nyasaye yamulimasia halala mubusanjilani. Ne mulolosinjia eshisa nende tsimbabasi abeene khu beene.

²Bulano emutsuuba mbu, musangasilie elala khulwokhuba namapaaro malala, okhusanjilana mubuheeli bulala, khandi mubetsenje nomwoyo mulala nende amapaaro malala.

³Mulakholekhwo eshindu shiosi khulwa okhwiyenyela abeene ta, noho khulwa okhwenya okhwichinjimisia butswa ta, nebutswa mube abokhwitutuyia[2] abeene khu beene, buli lwosi mupaarenjekhwo abashienywe okhuba abalayi okhushila inywe abeene.

⁴Mana mulekhabila butswa akamukasila abeene ta, habula akachamisia abandu boosi.

⁵Mubetsenje nende omwoyo mulala shinga okwa Kristo Yesu yali ninakwo mbu;

⁶Kristo buli lwosi yali butswa shinga Nyasaye. Nebutswa shiyapaarakhwo mbu khulwa okhwinichilisia ateeme okhuheelana nende Nyasaye tawe.

⁷Mushilenje shiokhwinichilisia, yalekha biosi ebia yali ninabio mukhuchama khukhwe omwene.

⁸Kristo yetutuyia, mana naba omuhulili mubulamubwe bwosi khu Nyasaye okhuula okhufwakhwe khumusalaba.

⁹Khulwa eshifune shino, Nyasaye yamuchinguula muluyali olwahekulu okhushila; mana namuhelesia eliira eliahekulu okhushila akandi koosi.

¹⁰Niko akachila khuliira lia Yesu ebilonje biosi ebili mwikulu, mushialo, nende hasi weshialo, bilasikama nibimwinamila,

¹¹mana biosi bilirumbula habulafu mbu, Yesu Kristo niye Omwami muluyali lwa Nyasaye Samwana.

¹²Kho bulano abaheelwa banje, shinga olwa mwambulilanga olwa ndali ninenywe, bulano nobulayi muno kata okhushila mbu mumbulile bulano olwa emba nindi ehale okhurula khwinywe. Mutsililile okhukhalabana noburi nokhurenga okhuhesia obuhonia bwenywe,

¹³okhuba Nyasaye akholanga emilimo buli lwosi mwinywe, namukhola okhuba abanyalilwa okhumuhulila ye yenyene.

¹⁴Kholenje buli shindu obulabulula kata okhuyingana ta.

¹⁵Mana mulaba abaana aba Nyasaye abeleleshe khandi ababula eshikha, abamenyile mubandu abashiamu khandi ababi, nimuhuma eshikha. Okhuula mwashe mubo shinga tsing'ining'ini tsiakhaanga mwikulu;

¹⁶olwa mubaboolela oburume buhaananga obulamu. Nimwakhakhola murio, ndakhabe neshifune eshiokhumwiyitsialila inywe Khunyanga eya Yesu alitsa, shichila kakhamanyie mbu eshinani shianje nende emilimo chianje shibiali ebiabutswa tawe.

¹⁷Kata nikakhaba mbu obulamu bwanje bulahaanwa shinga omusango okuhaanwa khulwa obusuubili bwenywe, esaangaala nindikhoya halala ninenywe mwesi.

¹⁸Munjila ndala yene eyo, inywe mwesi okhuula musaangaale nimwikhoya halala ninasi.

¹⁹Omwami nachama, enaayanga okhuruma Timotseyo khwinywe lwangu, kho kachile aka yamboolela khwinywe shinga olwa muli kameete okhunzuuba.

²⁰Shiendi nende omundu undi shingaye ounyala okhuba nobuha bwatoto bwokhuhendela amakhuwa kenywe tawe.

²¹Abandu bandi boosi bahendelanga butswa amakhuwa kabwe abeene, nikalali aka Yesu Kristo tawe.

²²Nebutswa, inywe abeene mumanyile shinga olwa Timotseyo yamanyia okhuba owobukhoonyi, shinga olwa ye ninasi khwakholela emilimo halala shinga omwana nende samwana, khulwa eshifune shiokhulandia Injiili.

²³Kho embaaranga okhumuruma yetse khwinywe lwangu, olwa emba nindakhamanya shinga amakhuwa kanje ketsa okhuba.

²⁴Khandi esuubilanga mu Omwami mbu, isie omwene nenyalilwe okhwitsa khwinywe lwangu luno.

²⁵Embaarile mbu, nobulayi emurumile inywe omwana wefwe Epafurodito, owakhalabana ninasi khandi nalwana ninasi lihe liokhulandia Injiili ya Kristo; khandi nakhalabana shinga omurumwa wenywe khulwa okhukhoonya.

²⁶Ali namahofu khwinywe mwesi habula ahendanga omwoyo muno shichila mwali nimwahulila mbu yali omulwale.

²⁷Ne toto yali omulwale ahambi okhufwa. Nebutswa Nyasaye yamubeela tsimbabasi, ne shiyabeela ye yenyene ta, habula kata siesi; yambonia okhurula mushibela eshikhongo muno.

²⁸Endi nobuha obunji muno okhumuruma khwinywe, kho mbu mube nobutsaatsahafu olwa mumulola khandi nolwa eshibeela shianje shilahwaho.

²⁹Mumwinjisie nokhwikhoya, shinga omwana wefwe mu Omwami. Haanenje oluyali khubandu boosi abali shinga uno,

³⁰shichila yahaana obulamubwe naba ahambi okhufwa khulwa omulimo kwa Kristo. Yakhola kano mbu yakhonye munjila eya inywe abeene mulakhanyalilwe okhukhoonyelamwo tawe.