Read wanga ABAFILIPI 3 Bible Online

ABAFILIPI 3 - wanga bible

ABAFILIPI 3

¹Mukhumalilisia, abaana befwe, mwikhoyenje mu Omwami. Shiengalushilanga mukandamala okhuhandika khale ta, nebutswa bwakhaba obulayi khwinywe nengalushilamwo endio.

²Muhenjelesie yabo abakholanga ebindu ebimayanu, abali shie tsimbwa; abandu abahandililanga khukhusalaka omubili.

³Ifwe nifwe abanyoola eshishebo shiatoto, shibali abeene abo tawe, shichila ifwe khwinamilanga Nyasaye mubukhoonyi bwa Rohowe nikhutsaatsahalila obulamu bwefwe mu Kristo Yesu. Shikhuretsanga obusuubili bwefwe bwosi mumilukha echiokhukhola akemibili chiefwe tawe.

⁴Ne isie ndakharele obusuubili bwanje mubindu shinga biene ebio. Nikaba mbu omundu aliho oupaaranga mbu, anyala okhura obusuubilibwe mumilukha echiomubili butswa; nisie owakhakholile endio kata okhushila abandi boosi.

⁵Isie ndashebwa nemalile tsinyanga munane. Endi owomulwibulo olwa Abaisiraeli, owoluyia lwa Benjamini, Omuheburania owomumatsayi keene aka Abaheburania. Ne okhulondana nende okhuhulila amalako aka Abayahudi shinga olwa kali, ndali Omufarisayo,

⁶ne Ndali oweshinani muno khulwa idiini eya Abayahudi nikachila nesandia Ikanisa eya Kristo. Ndakhola buli shindu eshia Amalako kalakanga mbu, buli mundu akhole kho abe omulunjishi imbeli ewa Nyasaye.

⁷Nebutswa, ebindu ebio biosi ebia isie ndakhabalile okhuba shinga ebieinganga bulano ebibasinjia okhuba ebiakora butswa khulwa Kristo.

⁸Shibulaho eshili nobukhala shinga okhumanya Kristo Yesu Omwami wanje. Khulwa akenako buli shindu shindi shiosi shinga eshibula obukhala. Mubiosi ndasukuma eshia enzenyanga nokhunyoola Kristo;

⁹nende okhwiyunga ninaye elala. Isie shindi khandi nende obulunjishi bwanje isie omwene, bwomundu anyoolanga khulwa okhulonda Amalako tawe. Habula bulano endi nende obulunjishi obuhaanungwa okhubirira mukhusubila Kristo; obulunjishi oburulanga khu Nyasaye khandi obwisimikhanga khubusuubili.

¹⁰Aka enzenyanga butswa nokhumumanya Kristo, nokhunyoola obunyali bwobulamushibwe, nokhusanga mukhunyaakhanakhwe nende okhufwanana ninaye mukhufwakhwe,

¹¹nenaayanga mbu siesi Nyasaye yakhalamusie okhurula mukhufwa.

¹²Isie shimboolanga mbu ndamala khale okhunyalilwa kata mbu ndamala okhukholwa khale omulamba tawe. Enzilililanga okhukhola amaani kho mbu enyoole omukabo okwa Kristo Yesu yamala khale okhunyoolela omwene.

¹³Nakatoto abaana befwe, mbu isie shindibasinjia okhuba nindanyoola khale omukabo tawe; habula eshindu shilala eshiekholanga njieshino mbu, okhwibilila akali inyuma wanje, nekhola amaani okhunyoola akali imbeli.

¹⁴Kho isie enzilukhanga shilunji kho mbu enyoole omukabo, okuli omulango okwa Nyasaye okhubirira mu Kristo Yesu okhuula khubulamu obwobumeli hukulu.

¹⁵Ifwe fwesi abali abalamba muroho khwenyekhanga mbu khube namapaaro malala kano. Nebutswa nikaba mbu balala khwinywe bapaaranga lukano, kho Nyasaye alamufimbulila.

¹⁶Ne kata nikakhaba kario, leshe ifwe khutsie imbeli okhulondokhana namalako malala ako, akakhwalondile okhuula bulano.

¹⁷Abaana befwe, tsililile mwesi okhulonda eshilolelo shianje. Henje khuyabo abalondanga eshilolelo eshilayi eshia khwamumanyia.

¹⁸Ndamuboolela amakhuwa kano akhandi akhanji mutsinyanga tsiabira, ne bulano engakalushilangamwo nendila amasika, baliho abanji abobulamu bwabwe bubakholanga okhuba abasuku khukhufwa khwa Kristo khumusalaba.

¹⁹Obumalilishi bwabwe nobukori butswa, shichila obwikombi bwemibili chiabwe niye omunyasaye wabwe. Beyitsoominjia khuyako akabakhoyeele okhufimbilwakhwo omurwe. Bapaaranga butswa khubindu biomushialo muno bionyene.

²⁰Kata kario, ifwe, khuli abandu boluyia lwomwikulu, ne khandi khulindililanga nobuha okhukalukha okhwa omuhonia wefwe Omwami Yesu Kristo, okhurula mwikulu.

²¹Yakhakalukhasie emibili chiefwe emiteshele echifwitsanga, ne nachikhola okhuba shinga omubilikwe omwene okwoluyali, niyekhoonyelanga obunyali obwo obwa ali ninabwo okhureera ebindu biosi hasi woburuchibwe.