Read wanga ABAFILIPI 4 Bible Online

ABAFILIPI 4 - wanga bible

ABAFILIPI 4

¹Kho bulano, abaana befwe, inywe mwesi muli abaheelwa banje, nasi endi namahofu ninenywe! Mukholanga okhuba omusangafu, nasi emwiyitsialilanga po! Abaana befwe abakoosi, muralile obutinyu mubulamu bwenywe mu Omwami.

²Nenywe Yodia nende Sindike, emusaaya nimuchama, muteeme okhufuchilisania shinga abaheelwa mu Omwami.

³Nawe omusuubilwa washianje enzenya okhoonye abakhasi bano; okhuba bakhalabana obutinyu ninasi khulwa okhulandia Injiili halala nende Kelemendi nende abakholi bashianje boosi, abameera kabwe kali mushitabu shia Nyasaye eshia abali mwoyo.

⁴Buli lwosi mwikhoyenje okhuba halala nende Omwami, engalushilamwo khandi mbu, mwikhoyenje!

⁵Manyie abandu boosi omwoyo okwobuholo. Omwami akalukhanga lwangu luno.

⁶Mulahendela eshindu shiosi tawe, nebutswa mubusaayi bwenywe bwosi musabe Nyasaye koosi aka muba nimwenya, buli lwosi musabeenje nende omwoyo okwokhumukhupila orio.

⁷Mana omulembe kwa Nyasaye okushila obumanyilisi bwosi obwomundu kulalinda obulayi emioyo chienywe nende amapaaro kenywe mu Kristo Yesu.

⁸Abaana befwe, mukhumalilisia, yitsusie amapaaro kenywe nende amakhuwa akali amalayi khandi akahelile yifuma niko: amakhuwa katieli, amalayi, amalunjishi, ameleleshe, akobuheeli, nende akoluyali.

⁹Muretsenje mubikhole akamweka khandi akamwanyoola okhurula khwisie, okhurula mumakhuwa kanje nende khubikhole bianje. Ne naye Nyasaye oukhuhelesinjia omulembe alaba ninenywe.

¹⁰Nasi esangalile muno mu Omwami shichila bulano olunyuma lwoluhoono olurambi amapaaro kenywe kobukhoonyi khwisie kabushile khandi. Toto mwene mwahendelanga muno nebutswa shimwali nobwiyangu bwokhumanyisia tawe.

¹¹Ne shikali mbu emboolanga kano khulwa okhupaara mbu mwanzibilila tawe, shichila ndeeka okhufuchilila obulamu bwendi ninabwo.

¹²Emanyile obulamu obwobutakha nende obulamu bwokhuba ninabio. Ndeeka libiso lino mbu, habundu hosi, mubise biosi endi nende ebimbelile, kata embe nindikure noho nendi inzala, kata embe mubuyinda noho mubutakha.

¹³Endi namani akokhukhola ebindu biosi okhubirira mubunyali obwa Kristo Yesu yambelesinjia.

¹⁴Nebutswa bwali obulayi muno khulwa inywe okhukhoonya olwa ndali mumatinyu kanje.

¹⁵Inywe Abafilipi mwamanya obulayi bwene mbu, olwa ndarula Makedonia mutsinyanga etsiambeli tsiokhuyaala Injiili, inywe ninywe Ikanisa eyakhoonya yonyene; ninywe mwenyene abambelesia ebihaanwa biamapesa.

¹⁶Olwa ndali Etsesalonika nindenyanga obukhoonyi mwakhonya khandi akhanji.

¹⁷Shikali mbu ndenyanga butswa ebihaanwa bionyone tawe, habula isie ndenyanga okhulola ebikhole bienywe ebilayi nibitsiililila okhumeetekha.

¹⁸Kho bulano emuhandichilanga okhumumanyia mbu, ndanyoola buli shindu eshiamwarumila, ne nebinji muno okhushila ebiandenyanga. Bulano khulwokhubeela Epafurodito yandeerela ebihaanwa bienywe biosi endi nende buli shia shindu shiandenyanga. Bili shinga omusango kweisakakha indayi okuhaanilwe Nyasaye, okwa afuchilila khandi okumuchamisia.

¹⁹Naye Nyasaye wanje alamuhelesia biosi ebiamwenyanga okhurula khubuyindabwe obunji muno okhubirira mu Kristo Yesu.

²⁰Oluyali lube khu Nyasaye wefwe ouli sefwe ebisoni nebisoni! Amina.

²¹Amashesio koole khubandu boosi aba Nyasaye abali ba Kristo Yesu. Abaana befwe abendi ninabo hano boosi bamushesiye.

²²Abandu ba Nyasaye boosi abendi ninabo bamushiesiye, nokhushila muno abali mungo yomuruchi wa Roma.

²³Obukoosia obwa Omwami Yesu Kristo bubetsenje ninenywe mwesi.