Read wanga ABAKOLOSAI 1 Bible Online

ABAKOLOSAI 1 - wanga bible

ABAKOLOSAI 1

¹Eyirula khwisie Paulo, ouli omurume wa Yesu Kristo khulwa okhwenya khwa Nyasaye, khandi okhurula khu Timotseyo omwana wefwe.

²Yule khuba Kristo nende abaana befwe abasuubili mu Kristo aba ebu Kolosai. Nyasaye ouli sefwe amuhelesia obukoosia nende omulembe.

³Buli lwosi olwa khumusaayilanga khumupilanga Nyasaye, ouli Samwana Omwami wefwe Yesu Kristo orio;

⁴shichila khwahulile akobusuubili bwenywe mu Kristo Yesu nende khandi akobuheeli bwenywe khuba Kristo boosi.

⁵Ne lwoburume bwatoto obuli Injiili bwetsa khwinywe olwambeli, mwahulila obunaayi bwoburume obwo buhaananga. Kho obusuubili nende obuheeli bwenywe bwileetanga khukamunaayangakhwo, akamwabishilwa obulayi mwikulu.

⁶Injiili eyo yirelanga tsikhabi khandi yitswananga mushialo shiosi, shinga olwa yili butswa mwinywe okhurula khunyanga eyambeli eyamwahulila akobukosia bwa Nyasaye, mana nimuchimanya shinga olwa yili toto.

⁷Inywe mweka khukobukoosia bwa Nyasaye, okhurula khumukhalabani washiefwe Epafura, ouli omukholi omusuubilwa owa Kristo khulwefwe.

⁸Niye owakhuboolele khu Roho inywe obuheeli yamuhelesie obwa.

⁹Khulweshio okhurula olwa khwahulilekhwo amakhuwa kenywe shikhukonelanga okhumusayila tawe. Khureebanga Nyasaye okhumwitsusiamwo obuchesi obwokhwenyakhwe, nende oburechelefu bwosi nende obumanyilisi obwa Roho ahaananga khwinywe.

¹⁰Mana munyalilwe okhumenya shinga olwa Omwami yenyanga mbu buli lwosi mukhole akamuchamisia Omwami. Ne mubulamu bwenywe nimwama ebiamo ebilayi ebietsimbia tsiosi, khandi mulameeta okhumumanya Nyasaye.

¹¹Mutinyisibwe namani koosi akarulanga mumani akoluyalilwe, mbu munyalilwe okhwisumilisilia buli shindu nobwifwili.

¹²Mukhupile Sefwe orio nobusaangaali owamunyalila okhuba abakhoyile okhusanjilana khubulame obwa Nyasaye yabishila abandube mubwamibwe obwobulafu.

¹³Yakhuhonia nikhurula mubwami obweshilima, nakhwikhasia obulayi mubwami obwa Omwanawe omuheelwa,

¹⁴owa okhubirira muye khwakholwa abalekhuule, akamanyisia mbu khwaleshelwa obwonooni bwefwe.

¹⁵Kristo niye likoondo lilolekhanga elia Nyasaye oulalolekhanga ta. Niye omusiani omwikulanda Omukhongo Muno mubukhongo bwebiloonje biosi.

¹⁶Muye nimwo omwa Nyasaye yalonjelamwo ebindu biosi ebili mwikulu nende khushialo, ebilolekha nende ebilalolekha tawe, nibilimwo ebiobunyali bweshiroho, abami, abaruchi, nende obunyali. Nyasaye yalonga ebiomwikulu nende ebiomushialo biosi okhubirira muye khandi mbu biosi biliho khululwe.

¹⁷Kristo yaliho ebindu biosi nibilashiabaho ta, ne niye owachila ebindu biosi nibiba mubwikhalo obwabilimwo.

¹⁸Niye Omurwe okwomubilikwe, nikwo likanisa; niye eshinoko eshiobulamu obwomubili okwo. Niye Omwana owambeli owalamusibwa okhurula mukhufwa, kho mbu abe yenyene mwibiyangu obwambeli mubindu biosi.

¹⁹Okhuba khwali okhwenya khwa Nyasaye omwene mbu Omwana abe neimelo yosi ya Nyasaye mwene.

²⁰Ne khulwa Omwana oyo, Nyasaye yenya okhwisasania nende ebindu biosi ninaye omwene. Yakaasia omulembe okhubirira mukhufwa okhwa omwanawe khumusalaba mana sasania nende ebindu biosi omwene, biombi ebili mushialo nende ebili mwikulu.

²¹Khale mwali ehale nende Nyasaye nimuli abasukube khulwa ebikhole bienywe ebibi nende amabi akamwapaaranga.

²²Nebutswa, bulano Nyasaye yamukholile inywe okhuba abetsabe, khulwa okhufwa okhwa Omwanawe, mbu amureele inywe imbeliwe nimuli abatakatifu, abeleleshe, ababula eshikha.

²³Kho, okhuula mukhoyile okhutsiililila mubusuubili nimutinya khumube nimuralila, khandi nimulafuchilila okhuhunzulwa mbu murule khubunaayi obwamwanyolile okhurula olwa mwahulila Injiili ta. Nasi Paulo ndakholwa okhuba omukhalabani owa Injiili yino, Injiili eyayaalwa khubandu boosi mushialo.

²⁴Ne bulano isie ndikhoyela okhunyakhena khwanje khulwenywe; okhuba khulwa okhunyakhana khwanje okhwomumubili ekhoonyelelanga okhumalilisia akashileemanga khukobunyakhani bwa Kristo, khulwa omubilikwe, okuli ikanisa.

²⁵Nasi Nyasaye yaakhola okhuba omukhalabani owe Ikanisa, niyambelesia obusinjilili buno khulwa okhumukholela amalayi. Ne nomulimo kwokhuyaala mubwitsulu Injiliye.

²⁶Nilio libiso elo eliayabisa oluhoono khubandu boosi okhuula bulano, habula amalile okhulibisula habulafu khulwa abandube.

²⁷Nyasaye yenyanga mbu amanyisie abandube lilolelolie lino, eliobuyinda khandi elioluyali elia yabishila abandu boosi. Ne libiso liatsana lili mbu, Kristo ali mwinywe, eshisina mbu mulisanga halala muluyali lwa Nyasaye.

²⁸Kho nefu khumurumbulilanga akatoto aka Kristo. Mubuchesi bwosi nikhuchetsiyia buli mundu, nikhwechesia buli mundu, mbu kachile khumureele buli mundu imbeli wa Nyasaye nali omulamba mu Kristo.

²⁹Ne khulwa okhusia kano, nasi enyakhananga ninwana, ndikhoonyelanga obunyali obukhongo obwa Kristo yambelesinjia obukholanga emilimo mwisie.