Read wanga ABAKOLOSAI 2 Bible Online

ABAKOLOSAI 2 - wanga bible

ABAKOLOSAI 2

¹Kho leshe emuboolele shinga ndakhalabane obutinyu muno khulwenywe nende khulwa abo abali Elaodikia nende kata abo boosi abashili okhumanya isie mwene tawe.

²Ekholanga endio kho mbu babe neyitswoni khandi bakhung'asibwe halala mubuheeli, mana babe nende obuyinda obwobulamba obwobumanyilisi oburula muburechelefu bwatoto. Munjila yino banyala okhumanya libiso lia Nyasaye elili Kristo mwene.

³Ne niye ouli olufunguwo olwikulanga amabikho koosi akabiswa akobuchesi nende obumanyi bwa Nyasaye.

⁴Kho emuboolela bulano mbu, mulafuchilile omundu yesi okhumukatia nende amayinje, kata kabe amalayi akafwana karie tawe.

⁵Kata nemba nembulaho omwene mumubili, nebutswa endi ninenywe muroho, ne khandi ndikhoyanga olwa endolanga oburalilu bwenywe obutinyu obwa mubetsanga nimusinjila ninabwo halala mubusuubili bwenywe mu Kristo.

⁶Olwa mwafuchilila Kristo Yesu okhuba Omwami mumenyenje muye.

⁷Muyile emisi chienywe muye, mumbashe obulamu bwenywe khuye mana mube abaralilu mubusuubili bwenywe, shinga olwa mwechesibwa. Mana mukhupilenje Nyasaye orio buli lwosi.

⁸Kho mukhoya okhuhenjelesia mbu omundu yesi aleshe okhumukhola ababohe khulwa obukati obukhaya obwobuchesi obwabandu oburulanga mumechesio akahaanwa khwinywe nabandu nende akarula khu roho etsirukanga mushialo, obulali obwa Kristo tawe.

⁹Okhuba imelo yosi eya Obunyasaye yimenyanga mu Kristo, mumubilikwe;

¹⁰khandi nenywe mwamala okhuhelesibwa obulamu obulamba khulwa okhusanjilana halala ninaye. Ne niye omuruchi wamaani khu baruchi boosi abeshiroho nende abobunyali.

¹¹Khandi nenywe mwashebelwa mu Kristo, eshishebo eshilakholwa namakhono kabandu ta, nebutswa neshia Kristo omwene yakaasia, eshili mbu okhulekhulwa okhurula khubunyali obwebionoono ebiobwikombi bwomubili.

¹²Okhuba olwamwabatiisibwa, mwayabilwa halala nende Kristo, ne mububatiisibwi, kho khandi mwalamusibwa halala nende Kristo mu obusuubili bwenywe mubukholi bwa Nyasaye obwobunyali obwalamusia Kristo okhurula mukhufwa.

¹³Nenywe khale mwali abafu muroho khulwa obwonooni bienywe khandi shichila mwali Abamahanga nimubula Amalako. Nebutswa bulano Nyasaye yamuhelesiye obulamu halala nende Kristo. Nyasaye yakhuleshela obwonooni bwefwe biosi.

¹⁴Yasilisia amabi koosi akakhwali nikhubanzungwa akali nikali mubuhandiche, nayiniaho amalako kali nikakhuboha nakakhoma khumusalaba.

¹⁵Ne nali khumusalaba okhwo, Kristo yekhola omulekhuule okhurula khubunyali bwabaruchi beshiroho nende abobunyali olwa yakhola okhubonyela habulafu nabemilile shinga ababohe mukuchendakhwe okhwobuhuli.

¹⁶Kho mulafuchilile omundu yesi okhumurerao amalako khubiokhulia noho khubiokhunywa noho khuketsinyanga tsindakatifu noho akamasabo aka omwesi omutoro noho kata khuke Isabato tawe.

¹⁷Ebienebio biosi biali butswa shinga eshiinikha eshiebindu biatoto ebili okhwitsa, habula akali habwene na aka Kristo.

¹⁸Mulakatibwa nende abandu abeitsialanga habulafu nibetutuyia ne nebenamilanga abamalaika ta. Beyitsialanga khulwa okhulola amalolelo. Nebutswa koosi nakobusilu shichila obuchesi bwabwe bwetsulamwo obwikombi bwemibili.

¹⁹Omundu oyo shiali halala nende Kristo, ouli omwimilisi womubili tawe. Kristo ahelesinjia omubili amaani khandi yekhoonyelanga ebiungo biakwo neinyama yakwo okhukulimasia halala olwa kutsiililila okhukhula shinga Nyasaye yeeya.

²⁰Mwafwa nende Kristo mana mwakholwa okhuba abalekhuule okhurula khutsiroho etsirukanga khushialo. Ne eshichilanga ninumenya shinga muli abandu bomushialo shino nishiina? Eshichilanga nimuhulila amalako shinga kano mbu;

²¹“Shiolatilakhwo khushino,” “Shiolaliakho khu shilia ta; olatila khushindi eshio ta”?

²²Kano koosi kaboolanga khubindu olwa biba nibiakhamala okhurumishilwa nibibula obukhoonyi bundi bwosi tawe; khuno nokhulonda butswa amalako nende amechesio akabandu bakasinjia.

²³Okhuba toto amalako shinga kano kalolekha nikali akobuchesi mukhuhachilisia khwako mukhwinamila abamalaika nende obwitutuyi bwobwikati, nende obulindi obululu bwomubili; nebutswa amalako kano shikalikhwo nobunyali okhwikalila eshiomubili kwomundu kwenya tawe.