Read wanga ABAKOLOSAI 3 Bible Online

ABAKOLOSAI 3 - wanga bible

ABAKOLOSAI 3

¹Mwalamusibwa halala nende Kristo, kho chominjie emioyo chienywe khubindu ebili mwikulu, aha Kristo yekhalanga khushifumbishie shioburuchi khumukhono musaatsa kwa Nyasaye.

²Emioyo chienywe chisuubilile khumakhuwa komwikulu, mulachire khukomushialo tawe.

³Okhuba mwafwa, khandi obulamu bwenywe bwabiswa halala nende Kristo mu Nyasaye.

⁴Kristo niye obulamu bwenywe bwatoto, ne olwalilolekha, mwesi khandi mwakhaloleshe halala ninaye nimusanga muluyalilwe!

⁵Kho okhuula muleshele elala okhwikhoonyela emibili chienywe khulwa obwilaasi obuli mwinywe, shinga obuyilani, eshifwabi, obwikombi obwokhukhola amabi, nende obulang'u, (okhuba obulang'u buli shinga okhwinamila ebifwanani).

⁶Khulwa akenako liruma lia Nyasaye liletsa khwabo abalamuhulilanga ta.

⁷Khale inywe beene mwamenyanga okhulondana nende obwikombi bweimbia yino, lwobulamu bwenywe bwali nibwemililwa nobwikombi obwo.

⁸Nebutswa, bulano okhuula musile kano koosi; oburuma, obwikombi, nende likhobo. Amanyeko noho okhuboola okhubi bilarulakhwo muminwa chienywe tawe.

⁹Mulabehelananga tawe, okhuba mwamala okhwifwalula imela yakhale nende obukholi bwayo,

¹⁰nimwifwala imela imbia. Buno nobulongwi obuyia obwa Nyasaye omulonji wabwo abukalulanga nibukwa obuyia mwikondo lilie omwene, kho mbu achile mube abokhumumanya mubulamba.

¹¹Ne khulwa akenako, bubulaho obwahukhani hakari wa Abamahanga nende Abayahudi, abashebwa nende abasinde, abasooma nende abalasooma, ababohe nende abalekhuule, nebutswa Kristo niye omukhongo khuboosi, khandi ali mu boosi.

¹²Muli abalobole ba Nyasaye; yamuheela namwahula khululwe omwene. Kho bulano okhuula mube nende omwoyo kwetsimbabasi, neshisa, nobwihotselesi, nobuholo, nende obwifwili.

¹³Nimwisumilisaninjia nende okhuleshelana buli lwomundu yesi aba nelikhuwa khuwashie. Okhuula muleshelane abeene khu beene shinga olwa Omwami naye yamuleshela inywe.

¹⁴Ne okhumeeta khukano koosi mwifwale obuheeli, obubohanga ebindu biosi halala mubulamba obwobulala.

¹⁵Ne omulembe kwa Kristo ahaananga kukhoya okhumwimilila mubukhalachi bwenywe; omulembe kuno nikwo okwachilile Nyasaye namulanjile halala mumubili mulala. Mana mukhupenje orio khu Nyasaye.

¹⁶Likhuwa lia Kristo mubunji bwalio liosi limenyenje mwinywe. Mwechesanie nimuchetsihania abeene khu beene mubuchesi bwosi. Mwimbe etsitsabuli, tsinyimbo, nende tsinyimbo etsia eshinyasaye; mwimbile Nyasaye nende okhukhupa orio mumioyo chienywe.

¹⁷Ne liosi liosi eliamukhola kata okhuboola, kholenje koosi muliira elia Omwami Yesu, nimukhupila Nyasaye sefwe orio okhubirira muye.

¹⁸Inywe abakhasi hulilenje abasaatsa benywe, okhuba niko akamukhoyeele okhukhola shinga Abakristo.

¹⁹Abasaatsa nenywe muhelenje abakhasi benywe nimulaba abalulu khubo tawe.

²⁰Nenywe abaana nomulimo kwenywe kweshikristo okhuhulilanga abebusi benywe buli lwosi, okhuba akenako niko akachamisinjia Nyasaye.

²¹Nenyu abebusi mulasinyisie abaana benywe ta, shichila banyala okhufwililila emioyo.

²²Abakhalabani nenywe hulilenje abami benywe mumakhuwa koosi. Mulabahulilenje olwa baba nibamuhenjelesinjia shichila mbu mwenyanga okhubachamisia tawe; nebutswa mukholenje murio nemioyo emieleleshe khulwo khubeela muritsanga Nyasaye.

²³Ne liosi liosi eliamukhola, kholenje nomwoyo kwosi, shinga abakholelanga OMWAMI Nyasaye halali abandu butswa tawe.

²⁴Mwitsulile mbu Omwami alamuhelesia omurungo okwayabishila abandube. Shichila Kristo niye toto Omwami owamukhalabanilanga.

²⁵Ne omukholi wamabi yesi alirungwa khulwa amabi akakholanga, shichila Nyasaye akhalachilanga buli mulala khushichelo shilala.