Read wanga 1 ABATSESALONIKA 1 Bible Online

1 ABATSESALONIKA 1 - wanga bible

1 ABATSESALONIKA 1

¹Eyirula khwisie Paulo, Sila[1] nende Timotseyo. Yule khubasanji abomwikanisa lia Tsesalonika, abali aba Nyasaye Sefwe nende Omwami Yesu Kristo: Obukoosia nende omulembe bubetsenje ninenywe.

²Ifwe khumupilanga Nyasaye orio khulwenywe mwesi tsinyanga tsiosi, khandi khumurumbulanga inywe buli lwosi mukhusaaya khwefwe.

³Okhuba khwitsulilanga imbeli wa Nyasaye Sefwe, shinga olwa muretsanga obusuubili bwenywe mubikhole, shinga lwobuheeli bwenywe bwamukhola nimukhalabana obutinyu, khandi shinga lwobunaayi bwenywe mu Omwami wefwe Yesu Kristo bwaralila.

⁴Abaana befwe, khumanyile mbu, Nyasaye yamuheela khandi yamwahula inywe okhuba abebe toto.

⁵Okhuba khwareera Injiili khwinywe, ne shikali amakhuwa butswa konyene ta, nebutswa khwaleera nobunyali nende Roho Omutakatifu, nende obumanyi oburalilu khu obwakatoto. Mumanyile shinga khwamenya olwa khwali ninenywe; bwali khubulayi bwenywe.

⁶Mwalonda obulumu bwefwe nende obwa Omwami; ne kata nimwanyakhana okhushila, mwafuchilila likhuwa lia Nyasaye nobusaangaali oburulanga khu Roho Omutakatifu.

⁷Kho mwamala mube eshilolelo khubasuubili boosi mu Makedonia nende mu Akayia.

⁸Shikali butswa mbu oburume obwamakhuwa aka Omwami bwarulila mwinywe nibutswana Makedonia nende Akayia mwosi ta, nebutswa akakhwahulila khukobusuubili bwenywe mu Nyasaye katswana habundu hosi. Kho libulaho, bulano, eliakhwenyekha okhuboola.

⁹Abandu abo boosi baboolanga shinga olwa mwakhwinjisia olwa khwamucheniha, khandi shinga olwa mwashukhanila Nyasaye watoto nimulekha ebifwanani.

¹⁰Khandi shinga mulindililanga omwanawe Yesu okhukalukha narula mwikulu. Nyasaye yamulamusia Yesu uno okhurula mukhufwa naye Yesu alikhuhonia okhurula muburuma bwa Nyasaye obwitsanga.