Read wanga 1 ABATSESALONIKA 2 Bible Online

1 ABATSESALONIKA 2 - wanga bible

1 ABATSESALONIKA 2

¹Abaana befwe, inywe abeene mumanyile mbu okhwitsa khwefwe shikhwali okhukhaya butswa tawe.

²Mumanyile shinga olwa khwali nikhunyasibwe khandi nikhunyechilwe ebu Filipi nikhushili okhwitsa khwinywe ebu Tsesalonika. Khandi kata olwobufukuli bwameetekha, Nyasaye wefwe yakhuhelesia itswoni okhumuyaalila Injiliye.

³Okhumutinyilisia khwefwe mbu musuubile shikhwarula mubukori kata mubuchoomi obweshifwabwi, noho kata shikhuteemanga okhurechekha omundu yesi tawe.

⁴Nikalali khuboolanga shinga Nyasaye yenyanga khuboole, shichila yakhufuchilila okhuba abakhoyile okhuyaala Injiili. Shikhuteemanga okhuchamisia abandu ta, habula okhuchamisia Nyasaye, ouchelanga emioyo chiefwe.

⁵Mwamanya obulayi bwene mbu shikhwayetsa khwinywe namakhuwa akokhubehelesia, noho kata shikhwarumishila amakhuwa akokhufunishila obulang'u tawe. Nyasaye nomuloli wefwe.

⁶Shikhwakhaaba okhwitsoomibwa nende omundu yesi, kata okhurula khwinywe noho okhurula khubandi tawe.

⁷Nebutswa shinga olwa khuli abarume aba Kristo, khwakhabanzile mbu mukhukholele akakhwenya. Halali khwali abaholo olwa khwali ninenywe, shinga nyina abaana olwa atembelesinjia abaanabe omwene.

⁸Khulwa obuheeli bwefwe khulwenywe, khwali khwerechekha okhusanjilana ninenywe mu Injiili okhurula khu Nyasaye nende kata obulamu bwefwe bwene. Shichila mwali abolukoosi muno khwifwe!

⁹Mwitsulile toto, abaana befwe, shinga olwa khwakhalabana nikhutitikhana! Khwakhalabana eshilo neshiteere kho mbu khuleshe okhuba omusiko khwinywe olwa, khuba nikhumuyaalilanga Injiili eya Nyasaye.

¹⁰Inywe halala nende Nyasaye muli abaloli befwe, mbu okhwiyila khwefwe khwinywe abasuubili khwali okhutakatifu, okhwahabwene, khandi okhubula eshikha.

¹¹Mumanyile mbu, khwakholela buli shiamulala khwinywe shinga olwa samwana abaana akholelanga abaana bebe omwene.

¹²Khwamutsuuba, nikhumulemia emioyo khandi khwatsiililila okhumutsuuba mbu, mumenye obulamu obwokhuchamisia Nyasaye; oumulaanganga inywe okhusanga mubwamibwe nende muluyalilwe.

¹³Khandi shiliho eshifune shindi eshichila nikhupila Nyasaye orio buli lwosi. Olwa khwamulerela likhuwa lia Nyasaye, mwalihulila nimulifuchilila, shimwalifuchiilila shinga likhuwa lirula khumundu ta, nebutswa shinga likhuwa lia Nyasaye, ne nindio kali kario. Okhuba Nyasaye akholelanga emilimo mwinywe abasuubilanga.

¹⁴Abaana befwe, amakhuwa malala kekholekha khwinywe niko akekholekha khumakanisa aka Nyasaye Yudea, khubandu abali aba Kristo Yesu. Inywe mwanyakhana obusandibwi bulala obwo okhurula khubandu benywe beene, butswa shinga olwa nabo banyasibwa nabayahudi.

¹⁵Abayahudi bano beera Omwami Yesu nende abalakusi, khandi nibakhusandia ifwe. Nabeshisinyo muno khu Nyasaye! Abalulu khu buli shiamundu!

¹⁶Kata bateema okhukhwikalila mbu khuleshe okhunyalila Abamahanga Injiili yokhubahonia. Munjila yino bamala okhwitsusia obwonooni bwabwe biosi ebiabakholanga tsinyanga tsiosi. Ne bulano oburuma bwa Nyasaye bumalile okhwikha khubo!

¹⁷Abaana befwe, ifwe kata nikhwahukhasibwa okhurula khwinywe khulwa tsinyanga tsindiiti mumubili, ne mumapaaro khwalinji halala ninenywe khandi nobuha mbu khumulolekhwo khandi.

¹⁸Khwenyanga khukalushe khumulole. Isie Paulo khulwanje ndateema akhanji okhumucheniha, nebutswa Setani shiyakhufuchilila tawe.

¹⁹Mukosi ninywe obunaayi bwefwe, Obusangali bwefwe, khandi ninywe eshifune shiokhwilaha khwobuhuli bwefwe imbeli owa Omwami wefwe Yesu olwa alikalukha.

²⁰Toto mwene ninywe okhwikhoya khwefwe khandi Obusangali bwefwe!