Read wanga 1 ABATSESALONIKA 3 Bible Online

1 ABATSESALONIKA 3 - wanga bible

1 ABATSESALONIKA 3

¹Mukhumalilisia shikhwali abanyala okhumeeta okhwisumilisia khandi tawe. Kho khwafuchilisania mbu khutsililile okhumenya mu Atsene.

²Olwa khuba nikhumurumila Timotseyo, omwana wefwe oukhalabananga halala ninefwe khulwa Nyasaye mubuyaali obwa Injiili ya Kristo. Khwamuruma mbu amutinyilisie khandi akhoonye obusuubili bwenywe.

³Kho kachile abuleho mwinywe owakhalekha obusuubili khulwa obusandibwi buno. Inywe abeene mwamanya mbu obusandibwi shinga buno buli mubulosie obwokhwenya khwa Nyasaye khwifwe.

⁴Olwa khwali nikhushili ninenywe khwaranjilila okhumuboolela khale mbu, toto mwene khutsitsanga okhusandibwa; ne shinga olwa mwesi mumanyile obulayi, akenako niko akamala nikekholekha toto.

⁵Ne niko akachila nimuruma Timotseyo. Shindali owifwila okhushila muno tawe, nikachila nimuruma mbu amanyilisie akobusuubili bwenywe. Esuubila shikanyala okhuba mbu Setani yamuteema, mana emilimo chiefwe chiosi chibe nichiali butswa emikhaya tawe!

⁶Ne bulano buno Timotseyo amalile okhukalukha okhurula ewenywe, ne akhureereere amakhuwa amalayi akobusuubili bwenywe nobuheeli bwenywe. Akhuboolele mbu buli lwosi mukhwitsulilanga obulayi, nimulibwa amahofu akokhulolana ninefwe shinga olwa fwesi khandi khulibungwa amahofu akokhulolana ninenywe.

⁷Ne niko akachila nikhulemibwe emioyo abaana befwe khulwenywe mumatinyu kefwe koosi nobusandibwi khulwa obusuubili bwenywe.

⁸Bulano khuli abalamu, nimuba nimuralila mu Omwami.

⁹Bulano khunyala okhupila Nyasaye wefwe orio kulwenywe. Khuli nobusaangaali khulwenywe, mana kachilanga nikhumukhupila orio.

¹⁰Eshilo neshiteere khumusabanga Nyasaye nemioyo chiefwe chiosi mbu, akhunyalile okhulolana ninenywe khandi amuhelesilie elala akaba nikashileemile mubusuubili bwenywe.

¹¹Nyasaye sefwe omwene halala nende Omwami wefwe Yesu Kristo bakhoya bakhukasilia injila yokhwitsa ewa muli.

¹²Khandi Omwami akhoya yakhola obuheeli bwenywe abeene khu beene nende khubandu boosi bumeeteshe mana bube obukhongo shinga obuheeli bwefwe khwinywe,

¹³Munjila yino alamutinyilisia, mana mube abahabwene khandi abatakatifu imbeli owa Nyasaye wefwe khandi Sefwe, olwa Omwami Yesu alikalukha nende abo boosi abali abebe.