Read wanga 1 ABATSESALONIKA 4 Bible Online

1 ABATSESALONIKA 4 - wanga bible

1 ABATSESALONIKA 4

¹Elimalilisia abaana befwe ndielino mbu; khwamwechesia shinga olwa mukhoyile okhumenya kho mbu muchamisie Nyasaye. Ne toto mwene nolwa mwamenyilenje. Ne bulano khumusaaya nikhumutsuuba muliira elia Omwami Yesu Kristo mbu, mumeete okhukhola kata okhushilakhwo yaho.

²Okhuba mumanyile amebaalo akakhwamuhelesia mubunyali obwa Omwami Yesu Kristo.

³Nyasaye yenyanga mbu mube abatakatifu khandi musile obuyilani.

⁴Buli omusaatsa khwinywe okhuula amanye shinga amenya nomukhasiwe munjila eyobutakatifu khandi eyoluyali,

⁵obulali nobwikombi bwobwilaasi shinga Abamahanga abalamumanyile Nyasaye tawe.

⁶Mwikhuwa lino omundu yesi alonoonela Omukristo washie noho kata okhumubatsa tawe. Khwamuboolela amakhuwa kano khale khandi khumuchetsiyia obutinyu mbu, Omwami alabahelesia abakholanga amakhuwa ako eshinyasio.

⁷Nyasaye shiyakhulanga mbu khumenyenje mubwilasi ta, habula mbu khubetsenje abatakatifu.

⁸Kho kario oyo yesi oufukula amechesio kano shiafukulanga omundu ta, nebutswa afukulanga Nyasaye oumuhelesinjia inywe Rohowe Omutakatifu.

⁹Shibulaho eshifune shichila emuhandichile khumakhuwa kobuheeli khulwa abusuubili bashienywe tawe. Inywe abeene mwibaalilungwa nende Nyasaye shinga olwa muheelana abeene khu beene.

¹⁰Ne toto nindio mubakholelanga abaana befwe boosi abali mumbali tsiosi etsia Makedonia. Kho abaana befwe, khumusaaya mbu mukhole murio kata okhushilasiakhwo.

¹¹Mube nelichoomo eliokhwichendelesia mumulembe, nokhuhendela emilimo chienywe, okhukhalabanila eshiamulia inywe abeene, shinga olwa khwamala okhumuboolela.

¹²Nimukhola murio mulahebwa oluyali nende abo abalali abasuubili tawe, khandi shimulatamba eshindu shiosi tawe.

¹³Abaana befwe, khwenya mbu inywe mumanye obwatoto khwabo abamala okhufwa, kho mbu muleshenje okhubeelela shinga abo ababula obunaayi.

¹⁴Khwasuubila mbu Yesu yafwa mana khandi nalamukha, mana khusuubila mbu Nyasaye alabakalusia halala nende Yesu yabo abafwa nibasuubila muye.

¹⁵ Akakhumwechesinjia bulano namechesio aka Omwami mbu; ifwe abaliho mwoyo khunyanga eya Omwami alikalukha shikhuliranjilila okhuba nende Omwami abo abamala okhufwa nibashili tawe.

¹⁶Omwami mwene aliikha okhurula mwikulu noluyoka olukhongo lwokhulachilisia, nende okhulanjilisia okhukhongo khwomumalaika omukhulundu, nende olwika olwa Nyasaye olwokhulaanga. Mana abeene abo abali nobusuubili mu Kristo Yesu nibashili okhufwa bakharanjilile okhulamusibwa.

¹⁷Mana ifwe abakhuliba nikhushiliho mwoyo olwene olwo khwakhabukulwe halala ninabo mumaleesi okhwakanila Omwami ikulu mulwanga. Kho khulibetsanga nende Omwami obushia nobushia.

¹⁸Khulweshio mutinyilisanie abeene khu beene namakhuwa ako.