Read wanga 1 ABATSESALONIKA 5 Bible Online

1 ABATSESALONIKA 5 - wanga bible

1 ABATSESALONIKA 5

¹Abaana befwe, shibulaho eshichila emuhandichile khukebise nende akokhuula khwabio olwa amakhuwa kano kalikholekha tawe.

²Okhuba inywe abeene mumanyile obulayi Inyanga eya Omwami yilitsa shinga lwomwifi yetsanga mushilo.

³Olwa abandu baliba nibashiboolanga mbu, “Amakhuwa koosi kali obulayi khandi omulembe kuliho,” habwenaho obusasishi bulibasundusia, shinga inzibula olwa yisundusinjia omukhasi ouli inda, ne shibaliba nende aha bahonokoshela tawe.

⁴Nebutswa abaana befwe, shimuli mushiilima ta, ne indukho eyo yilamusundusia shinga omwifi ta;

⁵okhuba mwesi pe muli abandu abobulafu, khandi abaana abeshiteere. Shikhuli abeshilo, kata abeshilima tawe.

⁶Kho khuleshe okhukonanga tsindoolo shinga abandu bandi bakholanga; habula khube meeso khandi abokhwihotselesia.

⁷Okhuba abenabo abakona tsindoolo, bakonanga eshilo; nabo abameera bameelanga bario mushilo.

⁸Nebutswa ifwe olwa khuli abeshiteere, okhuula khwitembelesinjie habwene. Khwifwale obusuubili nende obuheeli shinga eshitsengwa eshiokhushilifu, ne obunaayi bwefwe obwobuhonia bube shinga ikutwa.

⁹Nyasaye shiyakhwahula ifwe okhunyakhanila muburumabwe tawe, habula khulwa okhunyoola obuhonia okhubirira mu Omwami wefwe Yesu Kristo,

¹⁰owakhufwila ifwe kho mbu khunyalilwe okhumenya halala ninaye, kata nikhuba mwoyo noho nikhwakhaba nikhwafwa olwa alitsa.

¹¹Khulweshio mutinyisaninjie nimumbakhana abeene khu beene shinga olwa mukholanga murio.

¹²Abaana befwe, khumusaaya mbu mubahelesie oluyali olwa habwene abo abakhalabananga hakari mwinywe, nibamwimilila, nende okhumwibaalila mubulamu obwa eshikristo.

¹³Mubahelesinjie oluyali olukhongo nobuheeli, khulwa emilimo chiabakholanga. Mubetsenje nomulembe abeene khu beene.

¹⁴Abaana befwe, khumwitsusia mbu, chetsiyie abakara, nimutinyisia abeindenga, mukhonye abateshele, nimubesimilisilia abandu boosi.

¹⁵Muhenjelesie mbu, omundu yesi alarunga owashie obubi khububi ta, nebutswa mukhole libe lichoomo lienywe buli lwosi okhukholelanga abeene khu beene nende khubandu boosi amakhuwa amalayi.

¹⁶Musangalenje buli lwosi.

¹⁷Mulachweya okhusaaya tawe.

¹⁸Mukhupile Nyasaye orio mumakhuwa koosi. Kano niko aka Nyasaye yenya khulubeka lwenywe mu Kristo Yesu.

¹⁹Mulekalila Roho Omutakatifu tawe;

²⁰mulalechelesia obulakusi obwoburume obwobunyali tawe.

²¹Muhenjelesie amakhuwa koosi; nimuhanda khukali amalayi,

²²ne murule khububi bwetsimbia tsiosi.

²³Nyasaye oukhuhelesinjia omulembe amukhole abatakatifu munjila tsiosi alindenje obulamu bwenywe bwosi; emioyo nende emibili, mube abalamba ababula eshikha shiosi khukhwitsa okhwa Omwami wefwe Yesu Kristo.

²⁴Nyasaye owamulaanga nomwisikwa khandi alahesia akayasuubisia.

²⁵Abaana befwe, khandi mukhusaayilenjekhwo fwesi

²⁶Mushiesie abasuubili bashienywe nobutsaatsahafu shinga mushiesinjia abomunzu mwenywe.

²⁷Emulachilisia obutinyu muliira elia Omwami, mbu ibarwa yino yisomelwe abasuubili boosi.

²⁸Obukoosia obwa Omwami wefwe Yesu Kristo bubetsenje ninenywe.