Read wanga YOSHWA 1 Bible Online

YOSHWA 1 - wanga bible

YOSHWA 1

¹Olunyuma lwokhufwa khwa Musa omukhalabani owa OMWAMI Nyasaye, OMWAMI Nyasaye yaboolela Yoshwa omusiani wa Nuni omukhonyeleli wa Musa ari,

²“Omukhalabani wanje Musa amalile okhufwa. Bulano mwirecheshe okhwambukha omwalo kwa Yorodani, iwe nende abandu ba Isiraeli boosi, mana mwinjile mushialo shiemuhelesinjia inywe.

³Ndalamuhelesia buli habundu ahamusenakhwo shinga olwa ndasuubisia Musa.

⁴Olwakho lwenywe lwelubeka lwemulambo lularula khushiangalamwe okhuula khubikulu bia Lebanoni, ebili elubeka lwemasaba. Nalwo olwelubeka lwebukwe lularula khumwalo omukhongo kwa Yufurate, okhubirira mushialo shia Abahiti okhuula khunyanza ya Mediterenia, eyili elubeka lwa Mumbo.

⁵Abulaho omundu oulakhuhula iwe Yoshwa, khuluhono lwolaba noshiliho mwoyo. Ndalabetsanga ninawe shinga olwa ndalinji nende Musa. Ndalabetsanga ninawe buli lwosi. Shindalakhulekha ohulwe, kata okhukhwibilila tawe.

⁶Obe owamaani khandi oweitswoni, okhuba niwe oulemilila abandu bano okhubukula eshialo shia ndasuubisia okhuhelesia abakuuka babwe.

⁷Habula obe owamaani khandi oweitswoni muno. Mana orekhwo omwoyo okhulinda amalako koosi aka Musa omukhalabani wanje yakhulachilisia. Shiolalekhakhwo okhulinda kata elala khuko ta, ne olanyalilwa mubuli eshindu shiosi eshia olakholanga.

⁸Okhuula eshitabu shiamalako shino oshisoomenje buli lwosi, khandi oyililisinjie khushio eshilo neshiteere. Mana olole mbu, olondanga buli lilako eliahandikwamwo. Mana olanyalilwa mumakhuwa koosi.

⁹Witsulile mbu, ekhulachilisiye mbu, obe owamaani khandi oweitswoni. Shiolaria kata okhufwa omwoyo ta, shichila isie OMWAMI Nyasayewo endi ninawe habundu hoosi aha otsia.”

¹⁰Mana Yoshwa nalachilisia abemilisi babandu ari,

¹¹“Mubirire mutsikambi tsiabandu nimubalachilisia muri, ‘Recheshe ebiokhulia bienywe, shichila olunyuma lwetsinyanga tsitaru, mulambukha omwalo kwa Yorodani kuno, nimutsia okhubukula eshialo eshia OMWAMI Nyasaye wenywe amuhelesinjia mbu, shibe eshienywe.’ ”

¹²Mana Yoshwa naboolela aboluyia lwa Rubeni, olwa Gadi, nende abandi aboluyia lwa Manase ari,

¹³“Mwitsulile lilako lia Musa omukhalabani owa OMWAMI Nyasaye yamulachilisia naboola ari, ‘OMWAMI Nyasaye wenywe alamuhelesia eshialo shino, eshili ebukwe womwalo kwa Yorodani okhuba eshimenyo shienywe.’

¹⁴Abakhasi benywe, nende abaana benywe nende emiruko chienywe balamenya hano. Nebutswa abelihe benywe nibemanuule khulwa lihe balaranjilila Abaisiraeli bashiabwe okhwambukha khulwa okhubakhoonya,

¹⁵okhuula olwa balaba nibabukuule omukunda kuli elubeka lwa Mumbo womwalo kwa Yorodani, okwa OMWAMI Nyasaye wenywe amuhelesiye, olwa OMWAMI Nyasaye alaba namalile okhuhelesia tsimbia tsiosi etsia Abaisiraeli habundu aha balamenya nomulembe, nolwa munyala okhukalukha hano okhumenya mumukunda kwenywe okuli ebukwe womwalo kwa Yorodani, okwa Musa omukhalabani owa OMWAMI Nyasaye yamuhelesia.”

¹⁶Mana nibakalusia Yoshwa bari, “Khulakhola koosi aka okhulachilisiye, khandi khulatsia hosi hosi aha olakhuruma.

¹⁷Shinga olwa khwahulila Musa mumakhuwa koosi, nolwa khulakhuhulila iwe. OMWAMI Nyasayewo akhoya yaba ninawe shinga olwa yali nende Musa!

¹⁸Omundu yesi yesi oukhuyinga, noho oukhaya okhuhulila kata elala khumalakoko, okhuula yerwe. Habula obe owamaani khandi oweitswoni!”