Read wanga YOSHWA 10 Bible Online

YOSHWA 10 - wanga bible

YOSHWA 10

¹Adonizedeki, owali omuruchi welitookho lia Yerusalemu[3] yahulila mbu, Yoshwa yali natiilile khandi nasasiye litookho lia Ayi, khandi niyerire omuruchi walio shinga olwa yali nakholeele litookho lia Yeriko nende omuruchi walio, khandi nahulila mbu, abandu belitookho lia Gibeoni bali nibakholile indakano yomulembe nende Abaisiraeli, ne khane bali nibamenyanga mubo.

²Amakhuwa ako kareera oburi obukhongo mwitookho lia Yerusalemu shichila litookho lia Gibeoni liali eliamaani mumatookho akali hasi woburuchi obwo. Okhumeetakhwo, litookho lia Gibeoni liali eliamaani okhushila elia Ayi, Khandi abasaatsa balio bali abalwani abalayi muno.

³Mana Adonizedeki naruma oburume khumuruchi Hohamu, owarukanga litookho lia Heburoni, khumuruchi Piramu, owarukanga litookho lia Yarimutsi, khumuruchi Yafia, owarukanga litookho lia Lakishi, nende khumuruchi Debiri, owarukanga litookho lia Egiloni, nababoolela ari,

⁴“Itse muukhoonye okhuseera abandu ba Gibeoni, shichila abandu belitookho elo bakholile indakano yomulembe nende Yoshwa halala nende abandu ba Isiraeli.”

⁵Mana abaruchi barano abo, owa Amori, owa Yerusalemu, owa Yeburoni, owa Yarimutsi, owa Lakishi nende owa Egiloni nibasanjilana, nibabotokhana litookho lia Gibeoni ne nibaliseera.

⁶Mana abandu belitookho lia Gibeoni nibarumila Yoshwa likhuwa nali mukambi Giligali nibaboola bari, “Shiolakhulekha ifwe abasumbabo ta, yitsa bwangu okhukhoonye! Khuhonie! Abaruchi boosi ba Amori abali mushialo shiebikulu, bekhung'asiye basanjilane halala okhukhuseera!”

⁷Kho Yoshwa natikulukha okhurula Giligali nende abelihebe boosi halala nende abalwanibe abalulu.

⁸OMWAMI Nyasaye naboolela Yoshwa ari, “Shiolabaria ta, ebahaanile mumakhono kenywe. Abulaho kata mulala khubo oulanyalilwa okhukhuhula.”

⁹Yoshwa nende abelihe boosi bachenda eshilo shiosi nibatikulukha okhurula Giligali okhutsia Gibeoni, ne nibaseera Abamori masundusia.

¹⁰OMWAMI Nyasaye nakhola Abamori okhutiilwa noburi, ne olwa balola abalihe lia Abaisiraeli nibetsanga, belukha. Abaisiraeli babasinzila Gibeoni khandi nibalondachila abali nibasikaale okhuula khunjila yemwalo welitookho lia Betsihoroni nende okhuula Azeka nende Makeda, ewa beerera abandu abanji muno.

¹¹Olwa abelihe ba Abaisiraeli bali nibalondachilanga Abamori, OMWAMI Nyasaye yakhola ifula yamachina amakhongo okhukwa nikakhupa Abamori nibali khunjila okhuula khwitookho lia Azeka, mana amachina ako nikeera Abamori abanji okhushilakhwo abeerwa nende abelihe ba Isiraeli.

¹²Khunyanga yene ya Abaisiraeli bahulilakhwo Abamori, Yoshwa yasinjila imbeli wabandu ba Isiraeli boosi ne nasaaya khu OMWAMI Nyasaye naboola ari, “Iwe eliuba, sinjila noholelile tsi khu Gibeoni, iwe omwesi, sinjila mwibanda lia Ayiyaloni.”

¹³Mana eliuba nilisinjila hakari mwikulu niliholelile tsi, nakwo omwesi kwosi nikusinjila okhuula olwa abandu ba Isiraeli barunga eshikwoli khubasuku babwe khulwokhubahula. Kano kahandikwa mushitabu shia Yashari mbu, eliuba liasinjila mwikulu hakari nililayeelakhwo ta khulwa inyanga yoosi.

¹⁴Inyanga ya Nyasaye yahulilakhwo okhuhaba khwomundu namundu shinga eyo, ishili okhubakhwoho, khandi ishili okhulolekhakhwo tawe okhuula bulano. Okhuba OMWAMI Nyasaye mwene yabakhupanila Abaisiraeli.

¹⁵Olunyuma, Yoshwa nende abandube bamala bakalushe mukambi Giligali.

¹⁶Abaruchi ba Amori barano abo belukha nibebisa mumbinga eyili Makeda.

¹⁷Mana Yoshwa nanyoola likhuwa mbu, bali nibebisile mumbinga ya Makeda.

¹⁸Yoshwa nalaka ari, “Serenjesie amachina amakhongo mwikale obwinjililo bweimbinga eyo. Mureho abelihe balindeho,

¹⁹nebutswa mulekhalaho abeene tawe. Tsiililile okhulondachila abasuku benywe nimurulila enamukongo wabwe. Shimulabaleshekhwo benjila mumatookho kabwe tawe! OMWAMI Nyasaye wenywe amunyalile okhubahula.”

²⁰Yoshwa nende Abaisiraeli babakhupa ne nibabasinza boosi, nabo batiti khubahonokokha, belukha nibatiisa mumatokho kabwe okhwibisa mutsingoba.

²¹Mana abelihe ba Yoshwa nibakalukha Makeda mukambi wa Yoshwa yali boosi mumulembe. Abulaho kata mulala mushialo eshio owaboola likhuwa liosi liosi okhufukula Abaisiraeli tawe.

²²Mana Yoshwa naboola ari, “Ikuleho imbinga eyo mana mundeerere abaruchi barano abo elwanyi.”

²³Kho imbinga eyo niyikulwa nabo abaruchi belitookho lia Yerusalemu, elia Heburoni, elia Yarimutsi, elia Lakishi nende elia Egiloni nibayinibwa elwanyi,

²⁴nibareerwa khu Yoshwa. Yoshwa nalanga abalihe boosi ba Isiraeli mbu betse wa yali, ne nalaka abemilisi babwe mbu betse baseene khumakosi kabaruchi abo. Abemilisi abo nibakhola bario.

²⁵Mana Yoshwa naboolela abemilisibe abo ari, “Shimulariekhwo, kata okhufwa omwoyo tawe. Mwitinyie, muume ikholo shichila kano niko aka OMWAMI Nyasaye alakholela abasuku benywe boosi abamuseeranga.”

²⁶Mana Yoshwa niyeera abaruchi abo, naboya nende okhweleesia emibili chabwe khumisaala chirano, echia batong'akhwo nibeeleelile okhuula khungoloobe.

²⁷Eliuba niliyeelanga, Yoshwa yalaka mbu, emibili echio chiakulwe mana chisukunwe mumbinga ya bali nibebisilenjemwo. Amachina amakhongo nikarebwa khubwinjililo bweimbinga eyo. Amachina ako kashiliho okhuula olwa leelo.

²⁸Yoshwa yaseera ne natiila litookho lia Makeda nende omuruchi walio inyanga eyo. Yoshwa niyeera buli mundu mwitookho elo. Abulaho owalekhwa nashili mwoyo tawe. Mana Yoshwa niyeera omuruchi welitookho lia Makeda shinga olwa yali niyeerire omuruchi welitookho lia Yeriko.

²⁹Olunyuma lwokhuseera Makeda, Yoshwa nabelihebe barulaho nibatsiililila okhuula khwitookho lia Libuna ne nibaliseera.

³⁰OMWAMI Nyasaye khandi nanyalila Abaisiraeli okhuhula abelitookho elo nende omuruchi walio. Shibalekhakhwo omundu yesi yesi okhutong'a nashili mwoyo ta, nebutswa beera buli omundu mulio. Beera omuruchi walio shinga olwa bali nibeerire omuruchi wa Yeriko.

³¹Olunyuma lwako, Yoshwa nende abelihebe barulaho nibatsiililila okhuula khwitookho lia Lakishi, nibalibotokhana ne nibaliseera.

³²OMWAMI Nyasaye nanyalila Abaisiraeli okhuhula abelitookho lia Lakishi khunyanga yakhabili ya lihe elo. Yoshwa nabelihebe nibeera buli mundu mwitookho elo shinga olwa bali nibeerire buli mundu mwitookho lia Libuna.

³³Horamu omuruchi welitookho lia Gezeri yetsa okhukhoonya abelitookho lia Lakishi, nebutswa Yoshwa nabelihebe nibamuhula halala nabelihebe khandi nibabeera boosi.

³⁴Khandi Yoshwa nabelihebe nibarula Lakishi nibatsiililila okhuula khwitookho lia Egiloni, nibalibotokhana nende okhuliseera.

³⁵Balibukula khunyanga ndala yeneyo, ne nibeera buli mundu shinga olwa bali nibeerire abomwitookho lia Lakishi.

³⁶Olunyuma, Yoshwa nende abelihebe barula Egiloni nibatikulukha mubikulu okhuula khwitookho lia Heburoni, ne nibaliseera

³⁷Balitiila nibabukula ne nibeera omuruchi walio nende buli mundu owali mulio, khandi basasia amatookho kandi akabotokhana litookho elo, ne nibeera abandu bako boosi shinga olwa bali nakholile mwitookho lia Egiloni.

³⁸Kho Yoshwa nende abelihebe nibakalukha nibatsia okhuseera litookho lia Debiri.

³⁹Batiila litookho elo nende omuruchi walio nende amatookho kandi amatuutu akalibotokhana. Khandi nibeera abandu balimwo boosi, nibalalekhakhwo kata mulala tawe. Bakholela litookho lia Debiri shinga olwa bali nibakholeele litookho lia Heburoni nende elia Libuna nende abaruchi bako.

⁴⁰Khulweshio Yoshwa yahula lihanga liosi. Yahula abaruchi beshialo shiebikulu, abelubeka womuhololokhwe kwebukwe, nende abomuukholomokho mwebikulu bia mumbo, halala nende abali mushialo eshiumu shiemulambo. Shiyalekhakhwo omundu yesi nali mwoyo ta, yeera buli mundu. Nolwa OMWAMI Nyasaye, Nyasaye wa Isiraeli yali niyalachilisia mbu, bakhole bario.

⁴¹Yoshwa yatsiililila okhuhula abandu boosi, okhuchaachila Kadeshibarinea okhuula Gaza, nende okhuchaachila Gosheni okhuula Gibeoni.

⁴²Yoshwa yanyalilwa okhubukula lihanga elo liosi shichila OMWAMI Nyasaye, Nyasaye wa Isiraeli yakhupanilanga Abaisiraeli.

⁴³Mana olunyuma Yoshwa nende abelihebe nibakalukha mukambi Giligali.