Read wanga YOSHWA 11 Bible Online

YOSHWA 11 - wanga bible

YOSHWA 11

¹Olwa Yabini omuruchi welitookho lia Hazori yahulilakhwo amakhuwa ako, yaruma likhuwa khubaruchi bandi abamenyile hambi ninaye, nababoolela mbu bareere abelihe babwe halala basanjilile okhulwana Abaisiraeli. Yaruma likhuwa elo khu Yobabu omuruchi welitookho lia Madoni, nende khubaruchi ba Shimuroni nende Akishafu,

²nende khubaruchi bali mushialo shieshikulu elubeka lwemasaba, mwibanda liomwalo kwa Yorodani, okuli emulambo weinyanza ya Galilaya, mushialo eshili hasi khundulo webikulu nende khubali khundulo khweinyanza ya hakari hambi khwitookho lia Dori.

³Yaruma khandi likhuwa khu Abakanani boosi abamenya tsimbeka tsiosi etsiomwalo kwa Yorodani, khubaruchi ba Abamori, khuba Abahiti, khuba Abaperisi, nende khuba Abayebusi abali mushialo shieshikulu, nende khandi khuba Abahiwi abamenyile emwalo weshikulu shia Herimoni mushialo shia Mizifa.

⁴Beetsa nende ebimanulwa biabwe biosi, nende tsisishili tsinyinji halala nende amakaari amanji, nende omukanda omukhongo kwabelihe abanji shinga omuyeshe kwokhulukuku lwokhunyanza.

⁵Abaruchi abo boosi nende abelihe babwe bekhung'asia halala nibakhupa ikambi yabwe khwiyabo liamaatsi ka Meromu khulwa okhuseera Isiraeli.

⁶OMWAMI Nyasaye naboolela Yoshwa ari, “Shiolabaria tawe, shichila Isie OMWAMI Nyasaye, ndalabeera boosi. Mukamba ebise shinga bino balaba nibafwile boosi. Nimwakhamala okhulwana, mutete emisi chiebilenje bietsifarasi tsiabwe khandi musambe amakaari kabwe aka lihe.”

⁷Kho Yoshwa nende abelihebe boosi nibabaseera masundusia khwiyabo liamatsi ka Meromu.

⁸Mana OMWAMI Nyasaye nanyalila Abaisiraeli okhubahula. Abaisiraeli babahula nende okhubalondachila okhuula emasaba khumatookho ka Misirefotsi Maimu nende Sidoni Ikhongo, nende lwebukwe okhuula khwibanda lia Mizipa. Abelihe ba Yoshwa balwana abasuku okhuula olwa bali nibamalile okhubera boosi.

⁹Yoshwa yabakholela aka OMWAMI Nyasaye yali namulachilisiye; Yarema emisi chiebilenje bietsifarasi tsiabwe khandi nasamba amakaari kabwe akelihe.

¹⁰Mana Yoshwa nashiukhana natiila litookho lia Hazori halala nomuruchi walio (Mutsinyanga etsio litookho lia Hazori nilio elialinji eliamaani muno mukandi koosi).

¹¹Mana nibeera buli mundu owali mwitookho elo, abulaho owalekhwamwo okhuba omulamu, nalio litookho elo nilisambwa nomulilo.

¹²Yoshwa nabukula amatookho ako koosi halala nabaruchi babwe nabeera. Nasasia amatookho ako koosi, shinga Musa omukhalabani owa OMWAMI Nyasaye yali niyalachilisia.

¹³Kata kario Abaisiraeli shibasambakhwo litookho liosi khumatookho kombakhwa khubikulu tawe, okhuyiniakhwo litookho lia Hozari, elia Yoshwa yasamba.

¹⁴Abaisiraeli babukula ebindu biosi nende emiruko okhurula mumatookho ako nibebishila abeene. Nebutswa nibeera buli mundu, abulaho owalekhwa okhuba omulamu.

¹⁵Kano niko aka OMWAMI Nasaye yali niyalaka omukhalabaniwe Musa okhukhola. Naye Musa yali niyaboolele Yoshwa, mana Yoshwa nalonda lilachilisio elo. Yoshwa nakhola buli shindu eshia OMWAMI Nyasaye yali niyalachilisia Musa.

¹⁶Kho Yoshwa nabukula eshialo shiosi, eshieshikulu nende emwalo webikulu ebili elubeka lwemasaba nende lwemulambo, eshialo shiosi eshia Gosheni nende eshiangalamwe shili emulambo washio okhuula mwibanda liomwalo kwa Yorodani.

¹⁷Olwakho olwa Abaisiraeli lwanzila khushikulu shia Halaki eshili elubeka lwemulambo hambi khwitookho lia Edomu okhuula Baaligadi elubeka lwemasaba elili mwibanda lia Labanoni elili emulambo weshikulu shia Harimoni. Yoshwa yalwana nabaruchi beshialo eshio khulwa oluhoono olurambi, nebutswa Yoshwa yabahula boosi mana nabeera boosi.

¹⁹Litookho eliakhola indakano yomulembe nende Abaisiraeli liali elia Gibeoni, ewa Abahiwi bandi bamenyanga. Abaisiraeli bahula amatookho kandi koosi.

²⁰OMWAMI Nyasaye yali natinyiye ikholo yabwe khulwa okhulwana Abaisiraeli, kho mbu amatookho koosi kasasibwe pe khandi buli mundu yeerwe nalabelelelwa tawe. Kano niko aka OMWAMI Nyasaye yali niyalachilisia Musa.

²¹Mubise ebio Yoshwa yatsia nasasia oluyia lwa emindu emikhongo echilangwa Anakimu echiamenyanga mushialo shiebikulu mumatookho ka Heburoni, Debiri, Anabu nende akandi koosi akali mushialo shieshikulu eshia Ebuyahudi nende shia Isiraeli. Yoshwa yabasasia boosi pe halala nende amatookho kabwe.

²²Yoshwa nende abelihebe beera abandu boosi boluyia lwa Anakimu abamenyanga mushialo eshio, okhuyiniakho batiti khubo abemenyanga mumatookho aka Gaza, Gatsi nende Ashidodi.

²³Yoshwa yabukula eshialo eshio shiosi shinga OMWAMI Nyasaye yali niyalachilisia Musa. Yoshwa nahelesia Abaisiraeli eshialo eshio okhuba obulaame bwabwe. Yoshwa nakabila buli oluyia omukunda kwashio. Abaisiraeli mana nibamenya nomulembe.