Read wanga YOSHWA 12 Bible Online

YOSHWA 12 - wanga bible

YOSHWA 12

¹Musa yali niyamala okhwimilila Abaisiraeli okhuseera abaruchi babili abali ebukwe womwalo kwa Yorodani nende okhubukula eshialo shiabwe. Eshialo eshia abaruchi bano barukanga shiachachilanga khwibanda lia Arinoni okhuula khwibanda liomwalo kwa Yorodani khandi okhuula khushikulu shia Harinoni elubeka lwemasaba.

²Omuruchi Sihoni yamenyanga mwitookho lia Heshiboni; ne yarukanga inusu yelihanga lia Giliadi okhurula khwitookho lia Aroeri (elili khundulo khwelibanda lia Arinoni) khandi okhurula khwitookho elili hakari kari welibanda elo okhutsia okhuula khumwalo kwa Yaboki okuli khulwakho lwa Amoni.

³Olwakho lwoburuchibwe elubeka lwomumbo lwali libanda liomwalo kwa Yorodani okhuchaachila khunyanza ya Galilaya emulambo okhuula khwitookho lia Betsi-yeshimotsi (elili ebukwe weinyaza Yomunyu), mana khandi lwatsitsanga okhuula hasi weshikulu shia Pisiga.

⁴Musa nende Abaisiraeli bahula khandi omuruchi Ogi welitookho lia Bashani. Yali omuruchi owokhumalilisia owa khubaruchi abakhongo aboluyia lwa Abarefahimu, ne yarukanga namenyile mumatookho ka Ashitarotsi nende Edireyi.

⁵Lihanga lia yarukanga lialinji eshikulu shia Herimoni, litookho lia Seleka, nende eshialo shia Bashani shiosi okhuula khulwakho lwa Geshuri nende Maaka, nende inusu yeshialo shia Giliadi, okhuula khushialo shiomuruchi Sihoni wa Heshiboni.

⁶Musa nende Abaisiraeli bahula abaruchi abo babili. Musa omukhalabani owa OMWAMI Nyasaye nakaba eshialo eshia abaruchi abo, khubetsimbia tsia Rubeni, Gadi nende inusu yoluyia lwa Manase okhuba obulaame babwe.

⁷Yoshwa nende Abaisiraeli bera abaruchi boosi abali mumukunda okuli elubeka lwemumbo womwalo kwa Yorodani, okhuchaachila kwitookho lia Baaligadi elili mwibanda lia Lebanoni okhuula khushikulu shia Halaki eshili elubeka lwemulambo hambi nende eshialo shia Edomu. Yoshwa nakabila buli oluyia olwa Abaisiraeli omukabo kwabwe kwomukunda okwo okhuba obulaame bwabwe inziayo.

⁸Omukunda okwo kwali eshialo eshiebikulu bili emwalo elubeka lwa Mumbo, libanda liomwalo kwa Yorodani nende ebikulu ebili mwibanda elo, ebisia ebili ebukwe nende eshiangalamwe shili elubeka lwemulambo. Kuno nikwo omukunda okwa tsimbia tsino tsiamenyangamwo mbu Abahiti, Abamori, Abakanani, Abaperisi, Abahiwi nende Abayebusi.

⁹Abandu ba Isiraeli bahula abaruchi abamatookho kano; mbu Yeriko, Ayi (elili hambi khu Betseli,)

¹⁰Yerusalemu Heburoni,

¹¹Yarimutsi, Lakishi,

¹²Egiloni, Gezeri,

¹³Debiri, Gederi,

¹⁴Horima, Aradi,

¹⁵Libuna, Adalamu,

¹⁶Makeda, Betseli,

¹⁷Tapua, Heferi

¹⁸Afeki, Lasharoni,

¹⁹Madoni, Hazori,

²⁰Shimironi-Meroni, Akushafu,

²¹Taanaki, Megido,

²²Kedeshi, Yokeneamu (elili mu Karameli,)

²³Dori (elili khundulo khweinyanza) Giimi elili mu Galilaya

²⁴nende Tiriza. Boosi nabaruchi amakhumi kataru nende mulala.