Read wanga YOSHWA 13 Bible Online

YOSHWA 13 - wanga bible

YOSHWA 13

¹Olwa Yoshwa yali nakofule, khandi nayindiale mumiyika, OMWAMI Nyasaye yamuboolela ari, “Omalile okhukofula muno, ne eshialo shia okhoyile okhubukula shishili eshinji muno.

²Eshialo shioshili okhubukula neshia Abafilisiti nende eshia Geshuri,

³eshialo eshia Abawimu eshili elubeka lwemulambo. Eshialo shili okhurula khumwalo kwa Shihori okuli khulwakho olwa Abamisiri, okhutsia okhuula khulwakho lwa Ekironi elili emasaba shialinji eshia Abakanani. Abaruchi ba Abafilisiti bamenyanga Gaza, Ashidodi, Ashikeloni, Gatsi nende Kironi,

⁴Obukule eshialo shiosi eshia Abakanani okhurula khwitookho lia Ara, elialinji elia Abasidoni, okhuula khwitookho lia Afeki elili khulwakho olwa Abamori;

⁵Okhoyeele khandi obukule eshialo eshia Abagebali bamenyangamwo; khandi obukule eshialo shiosi shia Lebanoni okhurula khwitookho lia Baalgadi elili emulambo weshikulu shia Herimoni okhuula khunjila eya Hamatsi.

⁶Eshialo eshio neshio eshia Abasidoni abamenyanga mushialo shiebikulu hakari webikulu bia Lebanoni nende Miserefotsi Maini. Ndalalondamwo abandu bamenyangamwo abo boosi, olwa Abaisiraeli benjila mubialo biabwe. Okhuula okabile Abaisiraeli eshialo eshio, shinga olwa ekhulachilisiye.

⁷Kho bulano kabila omukunda kwobulame kuno khubetsimbia tisa tsia Abaisiraeli nende khuinusu yaboluyia lwa Manase.”

⁸Musa omukhalabani owa OMWAMI Nyasaye yali niyamala okhukabila abetsimbia tsia Rubeni, Gadi nende inusu eya luyia lwa Manase, omukunda kwali ebukwe womwalo kwa Yorodani.

⁹Omukunda kwabwe kwolanga khwitookho lia Aroeri elili khundulo welibanda lia Arinoni, kwabukulilangamwo litookho elialinji hakari welibanda elo, halala nende omuhololokhwe kwosi okwa Madeba okhuula khwitaala lia Diboni,

¹⁰halala namatookho koosi aka Sihoni, omuruchi wa Abamori yarukanga nali Amori mwitookho lia Heshiboni.

¹¹Kwoolanga khandi khu Giliadi eshialo shiaba Geshuri nende Maaka, eshikulu shiosi shia Herimoni, nende Bashani shiosi okhuula Saleka.

¹²Kwoolanga khwihanga liomuruchi Ogi, owa okhumalilikha owakhuluyia lwa Abarefahimu owali niyarukanga litookho lia Ashitarotsi nende elia Edireyi. Musa yali nahulile abandu abo khandi nabalondile okhurulamwo.

¹³Habula Abaisiraeli shibalonda abandu ba Geshuri nende Maaka tawe, bashimenyile mu Abaisiraeli okhuula olwa leelo.

¹⁴Musa shiyali niyahelesia aboluyia lwa Lawi omukunda tawe. OMWAMI Nyasaye yali niyalachilisia mbu omukabo kwa Abalawi kularulanga khumisango eshiabandu balasambilanga OMWAMI Nyasaye owa Isiraeli khushimalilo shiemisango.

¹⁵Musa yali niyahelesia eshitonye shiomukunda okwo khubuli eshilibwa eshia aboluyia lwa Rubeni okhuba obulaame bwabwe.

¹⁶Omukunda kwabwe kwoolanga khwitookho lia Arinoni nende litookho lili hakari welibanda elo; halala nomukhololokhwe okuli Medeba.

¹⁷Kwabukulanga halala Heshiboni nende amatookho akali khumukhololokhwe kano; Diboni, Bamotsi Baali, Betsi Baalimeoni,

¹⁸Yahazi, Kedemotsi, Mefaatsi,

¹⁹Kiriatsaimu, Sibuma, Zeretsi-Shahari elili khushikulu mwibanda,

²⁰Betsipoeri, ebikholomokho ebieshikulu shia Pisiga, nende Betsi-yeshimotsi.

²¹Kwabukulanga eshialo shiosi eshiarukungwa nomuruchi Sihoni. Musa yamuhula halala nabaruchi ba Abamidiani bano mbu, Ewi, Rekemu, Zuri, Huri, nende Reba. Sihoni yekhoonyela abo boosi okhuruka tsimbia tsiabandu bomushialoshie.

²²Mulala khubandu ba Abaisiraeli beera yali omufumu mbu Baalamu omusiani wa Boeri.

²³Olwakho lwoluyia lwa Rubeni elubeka lwomumbo lwali omwalo kwa Yorodani. Ako niko amatookho nende amataala akahebwa ebilibwa bioluyia lwa Rubeni okhuba obulaame bwabwe.

²⁴Musa yali niyahelesia khandi eshitonye shiomukunda khubebilibwa bioluyia lwa Gadi okhuba obulaamebwe.

²⁵Omukunda kwabwe kwabukulilangamwo litookho lia Yazeri halala nende amatookho kandi koosi akali mushialo shia Giliadi. Khandi kwabukulilangamwo inusu yomukunda kwa Amoni okhuula khwitookho lia Aroeri elili ebukwe welitookho lia Raba.

²⁶Omukunda kwabwe kwachachilanga khwitookho lia Heshiboni okhuula khu elia Ramatsi Mizipe nende Betonimu, okhurula khwitookho lia Mahanaimu okhuula khulwakho lwa Lodebari.

²⁷Ne mwibanda lia Yorodani, kwabukulilangamwo amatookho ka Betsi Haramu, Betsinimura, Sukotsi nende Zafoni, halala nende lihanga liosi liomuruchi Sihoni wa Heshiboni yarukanga. Olwakho lwabwe olwa elubeka lwemumbo lwali omwalo kwa Yorodani okhuula khunyanza ya Galilaya elubeka lwemasaba.

²⁸Kano niko amatookho nende amataala akahebwa abebilibwa boluyia lwa Gadi okhuba obulaame bwabwe.

²⁹Musa yali niyahelesia eshitonye shiomukunda inusu yokhuboluyia lwa Manase okhulondana nebilibwa biabwe okhuba obulaame bwabwe.

³⁰Omukunda kwabwe kwachachilanga khwitookho lia Mahanaimu nikubirira Bashani, eshialo shiosi shiomuruchi wa Bashani Ogi yarukanga nende amatookho koosi amakhumi kasasaba aka Yairi, akali mu Bashani.

³¹Kwabukulanga inusu yomukunda kwa Giliadi, halala nende okwa Ashitarotsi nende Edireyi, amatookho amakhongo akali mu Bashani akomuruchi Ogi yarukanga. Emikunda echio chiosi chiali chiakabilwa inusu yabandu ba Makiri, omusiani wa Manase, okhulondokhana nende tsinzu tsiabwe.

³²Nolwa Musa yakabila Abaisiraeli omukunda okwali ebukwe wa Yeriko nende Yorodani olwa yali nali mumuhololokhwe kwa Moabu.

³³Nebutswa Musa shiyakabilakhwo aboluyia lwa Lawi omukunda ta. Yababoolela mbu omukabo kwabwe kularulanga khumisango echihanilwa OMWAMI Nyasaye wa Isiraeli.