Read wanga YOSHWA 14 Bible Online

YOSHWA 14 - wanga bible

YOSHWA 14

¹Omwisaaliisi Eleazari nende Yoshwa nende abemilisi bebilibwa biaboluyia olwa Abaisiraeli bakabila Abaisiraeli omukunda kwa Kanani okwali Mumbo womwalo okwa Yorodani. Ne kwakabulwa kuri;

²Shinga olwa OMWAMI Nyasaye yali niyalachilisia Musa, omukunda kwabwe kwakabiwa tsimbia shienda neinusu etsia Abaisiraeli khulwa okhupa ikha;

³Okhuba Musa yali niyakaba khutsimbia tsibili neinusu omumunda okwali ebukwe womwalo kwa Yorodani; Nebutswa shiyakabilakhwo Abalawi omukunda kwosi kwosi tawe.

⁴Abolwibulo lwa Yosefu bali tsimbia tsibili; Olwa Manase nende olwa Efuraimu, nabo Abalawi shibahebwakhwo obulaame bwosi tawe, bahebwa butswa amatookho akokhumenyamwo nende emikunda echia okhwayamwo tsing'ombe nende emiruko chiabwe.

⁵Abaisiraeli bakabana eshialo shinga olwa OMWAMI Nyasaye yali niyalachilisia Musa.

⁶Inyanga yindi abandu bandi khuboluyia lwa Yuda betsa khu Yoshwa Giligali. Mulala khubo owali Kalebu omusiani wa Yefune Omukenizi naboolela Yoshwa ari, “Iwe omanyile aka OMWAMI Nyasaye yaboolela Musa omundu wa Nyasaye, olwa yali nali mwitaala lia Kadeshibarineya okhulondana nende isie ninawe.

⁷Ndali nendi owemiyika amakhumi kane olwa Musa omukhalabani owa OMWAMI Nyasaye yaruma okhurula Kadeshibarineya okhwitsa okhulambuula eshiali shino. Ndamuboolela aka toto shinga ndali nendutsi.

⁸Nebutswa abasaatsa bandatsia ninabo bakhola Abaisiraeli okhutilwa noburi. Halali isie ndahulila OMWAMI Nyasaye wanje nomwoyo kwosi.

⁹Khulwa okhubeela ako Musa yamboolela niyasubisia ari, ‘Toto bwene eshitonye eshieshialo shiochendelekhwo eshio, shilaba eshishio nende abolwibulolwo inziayo, Shichila wahulile OMWAMI Nyasayewo nomwoyo kwosi.’

¹⁰Okhurula inyanga eya OMWAMI Nyasaye yaboola nende Musa bulano chiwele emiyika amakhumi kane nende chirano. Ako kali olwa Abaisiraeli bali nibashichendanga mushitsiimi, neye OMWAMI Nyasaye shinga olwa yasubisia ario nolwa ashinindanga okhubaho omulamu. Nengakhwo! Ndusiye amiyika amakhumi munane nende chirano,

¹¹ne eshili namaani bulano shinga aka ndali ninako inyanga yilia eya Musa yarumilakhwo okhwitsa. Eshili namaani akanyala okhulwana mwihe kata akokhukhola omulimo kundi kwosi.

¹²Bulano ekhusaba mbu umbelesie eshialo eshieshikulu eshia OMWAMI Nyasaye yasuubisia okhumba inyanga eya isie nende abanoonelesi bashianje khwachelela nikhumuboolela aka khwali nikhulutsi. Khwamuboolela inywe olwenolwo mbu, oluyia lwemindu emikhongo chilangwa mbu Anakimu chialiyo nichiamenya mumatookho amakhongo akabootokhasibwa amasiisi. Haundi OMWAMI Nyasaye alakhoonya ebaloonde barulemwo, shinga lwomwene yaboola.”

¹³Mana Yoshwa nasabila Kalebu tsikhabi okhurula khu OMWAMI, ne namuhelesia litookho lia Heburoni okhuba obulaamebwe.

¹⁴Kalebu yasuubila mu OMWAMI Nyasaye, naye OMWAMI Nyasaye namuhelesia litookho lia Heburoni. Abolwibulolwe bashimenyangamwo okhuula olwa leelo.

¹⁵Ako nikashili okhwikholekha litookho lia Heburoni; lialangungwa mbu Ariba. Omundu walangungwa mbu Ariba yali omukhongo muboluya lwa Abanakinu. Mana eshialo eshio nishiba nomulembe.