Read wanga YOSHWA 16 Bible Online

YOSHWA 16 - wanga bible

YOSHWA 16

¹Olwakho lwemulambo womukunda okwakabilwa abolwibulo lwa Yosefu lwachachila khumwalo kwa Yorodani ahambi nende litookho lia Yeriko, khushinoko shietsisebele tsili ebukwe walio, mana nilutsiililila nilubira litookho lia Yeriko elo nilubira mushitsiimi nilwinjila mushialo shiebikulu okhuula Betseli.

²Okhurula khwitookho lia Betseli elo lwolanga khwitookho lia Luzi, nilubiraho okhuula khwitookho lwa Atarotsi Ada ewa aboluyia lwa Araki bamenyanga.

³Mana lutsia elubeka lwa Mumbo habundu woluyia lwa Abayafulele bali, okhuula emwalo welitookho lia Betsi Horoni. Lwatsiililila okhurulaho okhuula khwitookho lia Gezeri mana niluhwela khunyanza eya Hakari.

⁴Abetsukhulu ba Yosefu abali aboluyia lwa Efuraimu nende olwa Manase bakabwa omukunda kuno okhuba obulaame bwabwe. Tsimbia etsio tsibili tsiali etsiolwibulo lwa Yosefu.

⁵Kuno nikwo omukunda kwakabilwa oluyia lwa Efuraimu okhulondana nebilibwa biabwe. Olwakho lwabwe elubeka lwemulambo lwachachilanga ebukwe welitookho lia Atarotsi Ada okhuula emukulu welitookho lia Betsi Horoni;

⁶Mana lutsiililila okhuula khunyanza eya Mediterenia. Okhurula khwitookho lia Mikimetsatsi elubeka lwemasaba lwakotoola niluhenjile ebukwe khwitookho lia Tanatsi Shilo nilutsiililila okhuula khwitookho lia Yanoa elubeka lwebukwe.

⁷Mana nilurula Yanoa nilukholomokha khwitookho lia Atarotsi nende Naara okhuula khwitookho lia Yeriko niluhwela khumwalo kwa Yorodani.

⁸Olwakho lwarula khwitookho lia Tapua nilutsia Mumbo khumuchela kwa Kana mana niluhwela munyanza ya Hakari. Kuno nikwo omukunda okwakabilwa abebilibwa bioluyia lwa Efuraimu okhuba obulaame bwabwe.

⁹Olwakho olwo lwabukulilangamwo amataala nende ebisoma akalinji mukari mwatsinzakho tsiolwibulo lwa Manase; nebutswa akenako kahebwa aboluyia lwa aba Efuraimu.

¹⁰Aboluyia lwa Efuraimu shibalonda nibarusia tsimbia etsia Abakanani abamenyanga mwitookho lia Gezari tawe, nishio eshichila Abakanani abo nibashimenyile muboluyia lwa Efuraimu okhuula olwa leelo; nebutswa balunyibwa okhukhola emilimo shinga abasumba.