Read wanga YOSHWA 17 Bible Online

YOSHWA 17 - wanga bible

YOSHWA 17

¹Eshitonye eshiomukunda okwali elubeka lwa Mumbo womwalo okwa Yorodani shiakabilwa balala khubebilibwa bia Manase, omusiani omukhulundu wa Yosefu. Makiri yali omusiani omukhulundu wa Manase; naye Makiri yali nomusiani oweliira mbu Giliadi. Makiri yali omulwani owelihe omululu, naye Yoshwa yali niyamukaba khale omukunda kwa Giliadi nende Bashani, amatookho akali ebukwe womwalo kwa Yorodani.

²Bulano Yoshwa nakabula omukunda okwali Mumbo womwalo kwa Yorodani khutsimbia tsia Manase etsiali nitsitonyile. Abeshisaatsa abolwibulo lwa Manase bali; Abiezeri, Heleki, Asirieli, Shekemu, Hefari nende Shemida. Abasaatsa bano boosi bali abakhongo bebilibwa biabwe khandi eshilibwa shiabwe shianyoolanga omukunda elubeka lwa Mumbo womwalo kwa Yorodani.

³Giliadi omwitsukhulu wa Manase yali nomwanawe omusiani oulangwa mbu Zelofehadi oulebulakhwo omwana omusiani tawe. Nebutswa yebula abakhaana barano, ne ameera kabwe kali; Mahila, Nua, Hogila, Milika nende Tiriza.

⁴Batsia khumwisaaliisi Eleazari, nende khu Yoshwa nende khu abemilisi babwe nibababoolela bari, “OMWAMI Nyasaye yalachilisia Musa okhukhukaba eshitonye shiomukunda shinga olwa yakabila abekho befwe abeshisaatsa.” Kho abakhaana abo nibakabwa omukunda halala nabekho babwe abeshisaatsa shinga OMWAMI Nyasaye olwa yali niyalachilisia.

⁵Niko akachila oluyia lwa Manase nilunyoola emikabo ekhumi okhumeeta khumukunda kwa Giliadi nende Bashani echili ebukwe womwalo kwa Yorodani,

⁶shichila olwa abolwibulolwe abeshikhasi halala nende abeshisaatsa bakabilwe omukunda. Omukunda kwa Giliadi kwakabilwa abolwibulo lwa Manase olwali nilutonyile.

⁷Omukunda kwa Manase kwarulanga Asheri okhuula kwitookho lia Mikimetsatsi elili elubeka webukwe welitookho lia Shekemu. Olwakho olwo lwatsiililila elubeka lwemulambo nilubukulilamwo abandu ba Entapua.

⁸Omukunda kwa Tapua kwali khulwakho hakari womukunda kwa Manase nende okwa Efuraimu, litookho liene liali elia oluyia lwa Efuraimu nebutswa omukunda okwalibotokhana kwali okwa oluyia lwa Manase.

⁹Olwakho olwo lwakholomokha okhuula khumuchela kwa Kana. Amataala akali elubeka lwemulambo womwalo okwo kali akoluyia lwa Efuraimu, nebutswa amatala ako kali mumukunda kwoluyia lwa Manase; Olwakho lwoluyia lwa Manase lwali emasaba womuchela okwo ne niluhwela khunyanza eya Mediterenia.

¹⁰Aboluyia lwa Efuraimu banyoola omukunda elubeka lwa Mumbo, nabo aboluyia lwa Manase nibanyoola omukanda elubeka lwemasaba, nayo inyanza ya Hakari niyo eyali olwakho lwabwe elubeka lwemulambo, Litookho lia Asheri liali elubeka lwemasaba, nalio litookho lia Isakari elubeka lwebukwe.

¹¹Hakari wamatookho ka Asheri nende Isakari kaliho amatookho nende amatala kandi amanji kaboluyia lwa Manase babukula. Amatookho ako kali Betsishani nendeamu halala nende amatahane, babukula Dori elili khundulo khweinyanza, Endori, Taanaki nende Magido halala nende amataala kabotokhane;

¹²Nebutswa abandu boluyia lwa Manase, shibanyalilwa okhulonda abandu bamenyanga mumatookho ako tawe, kho Abakanani batsiililila okhumenyamwo.

¹³Kata olunyuma olwa Abaisiraeli bekhola khuba abamaani, shibanyalilwa okhulonda Abakanani okhurula mumikunda echio tawe, habula Abaisiraeli babalunyia okhubakholela emilimo namaani.

¹⁴Abatsinzibulo tsia Yosefu bareeba Yoshwa bari, “Eshichila nokhuhelesia eshitonye shilala shionyene eshiomukunda okhuba obulaame bwefwe nishiina? Nefu khuli abanji muno shichila OMWAMI Nyasaye yakhuhelesia ikhabi yokhwibulana.”

¹⁵Yoshwa nabakalusia ari, “Nimuba nimuli abanji muno, ne eshialo shieshikulu shia Efuraimu neshitiiti khwinywe, kho munyala okhutsia mushitsuru mushibere, mana mubukule omukunda okwo okhurula mubetsimbia tsia Abaperisi nende Abarefahimu.”

¹⁶Nabo nibamukalusia bari, “Eshialo shieshikulu eshio shishinyala okhukhuhela ifwe tawe, nebutswa Abakanani bamenyanga mumabanda bali nende amakaari kelihe akebibia, boosi abamenyile mwitookho lia Betsishani nende amataala kalibotokhane nende abamenyile mwibanda lia Yezireli.”

¹⁷Mana Yoshwa naboolela tsimbia tsia Efuraimu nende oluyia lwa Manase olwali Mumbo ari, “Toto bwene abandu bomuluyia lwenywe nabanji muno, ne khandi muli abamaani muno. Shindalamuhelesia omukabo mulala kwonyene tawe.

¹⁸Ndalamuhelesia omukunda okwokhushikulu khandi. Kata nikuli okweshitsuru, mulakubera, mana nimukubukula okhuba okwenywe okhurula khulwakho okhuula khulundi. Nabo Abakanani kata nibali namakaari akebibia akelihe khandi nibali abamaani muno, mulabalonda nimubarusia mumikunda chiabwe echio.”