Read wanga YOSHWA 18 Bible Online

YOSHWA 18 - wanga bible

YOSHWA 18

¹Olunyuma olwa Abaisiraeli okhuhula abandu abo, aboluyia lwosi lwa Isiraeli bakhung'ana halala Shilo, mana abesaaliisi nende abakhoonyeleli babwe nibombakhaho liheema litakatufu elia OMWAMI Nyasaye.

²Tsiali nitsishiliho tsimbia musaafu etsiali nitsishili okhukabilwa omukunda.

³Kho Yoshwa nareeba Abaisiraeli ari, “Mulalinda khulwa oluhoono shiina kho mutsie mwinjile nende okhubukula eshialo shia OMWAMI Nyasaye, Nyasaye wabakuuka benywe yamuhelesia?

⁴Mwahule abasaatsa bataru mubuli oluyia. Ndalabaruma okhulaambuula omukunda okwo mana bahandiche akabalaba nibaluutsi khukwo, okhulondana nende obulaame bwabuli oluyia shinga olwa bakhoyile okhukabilwa. Mana bandeerere aka betsa okhuba nibaluutsiyo.

⁵Balakabula omukunda okwo mumikabo musaafu. Oluyia lwa Yuda lutoonye mumukunda kwalwo elubeka lwemulambo nalwo oluyia lwa Yosefu lube mumukunda kwalwo elubeka lwemasaba.

⁶Nimwakhamala okhuhandika aka mulola khumikabo musaafu echiomukunda okwo, mundeerere hano, nasi ndalamukhupila ikha khuchio imbeli ewa OMWAMI Nyasaye wefwe.

⁷Nebutswa oluyia lwa Abalawi shilulakabwakhwo omukunda ninenywe ta, shichila omukabo kwabwe nokhukhalabanila OMWAMI Nyasaye shinga abesaaliisi. Ne aboluyia lwa Gadi, Rubeni nende inusu yaboluyia lwa Manase bamala okhukabwa obulaame bwabwe ebukwe womwalo kwa Yorodani, obwa Musa omukhalabani owa OMWAMI Nyasaye yabakabila.”

⁸Shinga abasaatsa abo bachaaka okhutsia okhulaambula omukunda okwo, Yoshwa yabalacbhilisia ari, “Tsie mulaambule omukunda okwo mana muhandiche aka mulola khukwo. Mana mukalushei khwisie nasi ndalakhupa ikha khulwenywe hano eshilo imbeli ewa OMWAMI Nyasaye.”

⁹Kho abasaatsa abo nibarulaho nibatsia nibalaambuula omukunda okwo. Mana nibahandika akabalola khukwo khushilabu shieliseelo, nibahandika amatookho koosi nibakakabuulemwo mumikabo musaafu. Mana nibakalukha khu Yoshwa eshilo, mukambi ewa yali.

¹⁰Mana Yoshwa nakhupa ikha khulwa okhumanya okhurula khu OMWAMI Nyasaye shinga olwa akhoyeele okhukabila buli oluyia olwa Abaisiraeli, olwali nilutoonyile eshitonye shiomukunda okwo.

¹¹Ikha yambeli yakwila aboluyia lwa Benjamini. Yabakabila omukunda okwali hakari woluyia lwa Yuda nende aboluyia lwa Yosefu.

¹²Olwakho lwabwe elubeka lwemasaba lwachaachila khumwalo kwa Yorodani, mana lutikulukha khubutenje bweshikulu shili emasaba welitookho lia Yeriko, ne elubeka lwemumbo, olwakho lwabirira mushikulu okhuula khushitsiimi eshili hambi nelitookho lia Betsaweni.

¹³Olwakho olwo nilutsiililila elubeka lwemulambo welitookho lia Luzi (elia eliira lindi mbu Betseli), mana nilukholomokha khwitookho lia Atarotsi Ada, elili khushikulu eshili elubeka lwa Mumbo, emwalo welitookho lia Betsi Horoni.

¹⁴Mana olwakho olwo nilukotosha okhurula Mumbo weshikulu eshio nilutsia emulambo welitookho lia Kariatsi Bali, (elia eliira lindi mbu, Kariatsi Yerimu). Litookho elo nelioluyia lwa Yuda. Olwo nilwo olwali olwakho elubeka lwa mumbo.

¹⁵Olwakho lwelubeka lwemulambo lwachaachila khundulo welitookho lia Kariatsi Yearimu, nilutsia ebukwe weisebele yamaatsi ka Nefutoa.

¹⁶Olwakho olwo lwakholomokha emwalo weshikulu eshihengaane nende libanda lia Hinomu, elili elubeka lwemasaba welibanda lia Abarefahimu. Okhurula yaho lwatsiililila elubeka lwemulambo nilubirira mwibanda lia Hinomu okhuula khundulo welitookho lia Yerusalemu elubeka lwemulambo, niluula khusebele ya Enirogeli.

¹⁷Mana nilukotola elubeka lwemasaba khwitookho lia Erishemeshi nilutsia khwitookho lia Gelilotsi elihengaane nende injila ya Adumimu. Mana nilukholomokha emwalo welichina liomusiani wa Bohani, (owali omusiani wa Rubeni).

¹⁸Mana nilubirira elubeka lwemasaba lweshisia shihengaane nende libanda lia Yorodani. Ne nilukholomokha okhuula mwibanda,

¹⁹nilubirira elubeka lwemasaba lweshisia shielitookho lia Betsi Hogila. Olwakho lwelubeka lwemulambo lwahwela habundu womwalo kwa Yorodani kutsushilanga amaatsi kakwo munyanza yomunyu. Olwo nilwo olwali olwakho lwelubeka lwemulambo.

²⁰Omwalo kwa Yorodani nikwo okwali olwakho elubeka lwebukwe. Tsino nitsio etsiali tsinzakho tsiomukunda okwa aboluyia lwa Benjamini bakabwa okhuba obulaame bwabwe.

²¹Amatookho akakabilwa aboluyia lwa Benjamini kali Yeriko Betsi-Hogila, Emeki Kezizi,

²²Betsi-Araba, Zemaraim, Betseli,

²³Awimu Pera, Oyhira

²⁴Chefaramoni, Ofini nende Geba. Koosi kali amatookho ekhumi nakabili halala namatala akakabotokhane.

²⁵Kaliho amatookho kandi ekhumi nakane nende amataala kako akakabilwa aboluyia lwa Benjamini. Amatookho ako kali Gibeoni, Rama, Beerotsi,

²⁶Mizipa, Chefira, Moza

²⁷Rekemu, Iripeeli, Rarala,

²⁸Zela, Haelefu, Yebusi noho Yerusalemu, Gibea nende Kiriatsi Yearimu. Kuno nikwo omukunda okwa aboluyia lwa Benjamini bakabwa okhuba obulaame bwabwe.