Read wanga YOSHWA 19 Bible Online

YOSHWA 19 - wanga bible

YOSHWA 19

¹Ikha yakhabili yakwila abebilibwa biaboluyia lwa Simeoni. Omukunda kwabwe okwabakabwa kwali mumukunda okwali nikwakabilwa oluyia lwa Yuda.

²Omukunda noho okwo kwali, amatookho ka Beerisheba, Sheba, Molada,

³Hazari, Shuali, Bala, Ezemu,

⁴Elitoladi, Betsuli, Horima

⁵Zikilagi, Betsi Marikabotsi, Hazari Susa,

⁶Betsi Lebaotsi, nende Sharuheni. Koosi kali amatookho ekhumi nende kataru halala namatala akakabotokhane.

⁷Oluyia lwa Simeoni lwakabwa khandi amatookho kandi kane nende amataala akakabotokhane. Amatookho keene ngakano mbu, Aini, Rimoni, Etseri nende Ashani.

⁸Omukunda okwo kwakhung'asinjia amatookho koosi nende amataala akakabotokhane okhuula elubeka lwemulambo khwitookho lia Baalatsi Beeri, (eliamanyikha khandi mbu Rama). Kuno nikwo omukunda okwa abebilibwa bioluyia lwa Simeoni bakabilwa okhuba obulaame bwabwe.

⁹Khulwa okhubela omukunda kwali nikwakabilwa aboluyia lwa Yuda omunji muno, mutiti khukwo kwamala kukabilwa aboluyia lwa Simeoni.

¹⁰Ikha yakhataru yakwila abebilibwa ebioluyia lwa Zebuluni. Omukunda okwa bakabilwa kwoolanga khwitookho lia Saridi.

¹¹Okhuchachila Saridi, olwakho lwabwe lwola Mumbo khwitookho lia Mareali, nilwitiisia khwitookho lia Dabeshetsi nende khumuchela okuli ebukwe welitookho lia Yokineamu.

¹²Okhuchachila khwitookho lia Saridi olwakho lwabwe lwoola ebukwe khulwakho lwelitookho lia Kisilotsi Tabori, mana lutsiililila okhuula khwitookho lia Daberatsi mana nilutikulukha khwitookho lia Yafia

¹³Okhuchachila aho lwatsiililila ebukwe okhuula khwitookho lia Gatsi Hefari nende Etsikazini, ne nilukotokha elubeka welitookho lia Neha elili khunjila notsia khwitookho lia Rimoni.

¹⁴Elubeka lwemasaba, olwakho lwakotola niluchomile khwitookho lia Hanatsoni niluhwela khwibanda lia Ifitaheli.

¹⁵Olwakho olwo lwakhung'asilinjiamwo amatookho ekhumi nakabili halala nende amataala akakabootokhane. Malala khumatookho ako kali Katatsi, Nahalali, Shimuroni, Idala nende Betselehemu.

¹⁶Kano niko amatookho nende amataala akakabotokhane, kabebilibwa ebioluyia lwa Zebuluni bakabwa okhuba obulaame bwabwe.

¹⁷Ikha yakhane yakwila abebilibwa biaboluyia lwa Isakari.

¹⁸Omukunda kwabwe kwoola khumatookho ka Yezerili, Chesulotsi, Shunemu,

¹⁹Hafaraimu, Shinoni, Anaharatsi

²⁰Rabitsi, Kishioni, Ebezi,

²¹Remetsi, Eni Ganini, Eni Hada nende Betsipazesi.

²²Olwakho khandi lwoola khushikulu shia Tabori, khwitookho lia Shahazuma nende Betsi Shemeshi, niluhweela khumwalo kwa Yorodani. Koosi kali amatookho ekhumi nakasasaba nende amataala akakabotokhane.

²³Amatookho ako halala namataala kako kali mumukunda kwa abebilibwa bioluyia lwa Isakari bakabwa okhuba obulaame bwabwe.

²⁴Ikha yakharano yakwila abebilibwa bioluyia lwa Asheri.

²⁵Omukunda kwabwe kwakhung'asilinjiamwo amatookho ka Helikatsi, Hali, Beteni, Akishafu,

²⁶Alamu Meleki, Amadi nende Mishali. Elubeka lwomumbo koolanga khwitookho lia Karimeli nende Shihori Libunatsi.

²⁷Elubeka lwebukwe olwakho olwo lwolanga khwitookho lia Betsi Dagoni, nilwitila khuluyia lwa Zebuluni nende libanda lia Ifataheli elili khunjila elubeka lwemasaba notsitsanga khwitookho lia Betsameki nende Neiyeli. Olwakho olwo lwatsiililila okhuula emasaba khwitookho lia Kabuli,

²⁸Eburoni, Rehobu, Hamoni, nende Kana okhuula khwitookho lia Sidoni.

²⁹Olwakho mana nilukotokha khwitookho lia Rama niluula khwitookho lia Tiro eliabotokhanwa netsingoba mana nilukotokha nilutsia khwitookho lia Hosa ne niluhwela khunyaza eya Mediterenia. Lwakhung'asiliamwo litookho lia Mahalabu. Akizibu

³⁰Uma, Afeki nende Rehobu. Koosi kali amatookho amakhumi kabili nende kabili namataala kako.

³¹Amatookho kano nende amataala kako kali mumukunda kwabebilibwa bioluyia lwa Asheri bakabwa okhuba obulame bwabwe.

³²Ikha yakhasasaba yakwila abebiliibwa ebioluyia lwa Nafutali.

³³Olwakho lwomukunda kwabwe elubeka lwemasaba lwachachila khwitaala lia Helefu okhuula khumusaala kwomuruba okuli mwitookho lia Zananimu, okhuula khwitookho lia Adaminekebu okhuula khu elia Yamunia okhutsia okhuula khwitookho lia Lakumu mana niluhwela khumwalo okwa Yorodani.

³⁴Okhurula khwitookho lia Helefu olwakho lwatsia elubeka lwomumbo khwitookho lia Azinotsi Tabori, nilurulaho nilutsia khwitookho lia Hukoki okhuula khuluyia lwa Zebuluni elubeka lwemulambo; nilula elubeka lwomumbo khuluyia lwa Asheri nende khumwalo kwa Yorodani ebukwe.

³⁵Amatookho kali nikabotokhasibwa tsingoba kali Zidimu, Zeri, Hamatsi, Rakatsi, Chineretsi,

³⁶Adama, Rama, Hazori,

³⁷Kedeshi, Edireyi, Eni Hazori,

³⁸Yironi, Migidaleli, Horemu, Betsatsi nende Betsi Shemeshi. Koosi kali amatookho shienda halala namataala akakabotokhane.

³⁹Amatookho kano namattaala akakabotokhane kali mumukunda okwa abebilibwa bioluyia lwa Nafutali bakabwa okhuba obulaame bwabwe.

⁴⁰Ikha yamusaafu yakwila abebilibwa ebioluyia lwa Dani.

⁴¹Omukunda okwo kwakhung'asilinjiamwo amatookho ka Zora, Eshitaoli, Irishemeshi,

⁴²Shaalibimu, Ayaloni, Itsila,

⁴³Eloni, Timuna, Ekironi,

⁴⁴Eliteke, Gibetsoni, Baalatsi,

⁴⁵Yehudi, Beneberaki, Gitsirimoni,

⁴⁶Mejarikoni nende Rakoni, halala nende omukunda okuli Yopa.

⁴⁷Olwa abolwibulo lwa Dani banulwa omukunda nabasuku babwe, batsia nibaseera litookho lia Laishi. Balitiila nibeera abandu bali nibamenyamwo mana nibalibukula okhuba eliabwe. Bamenya mulio khandi nibakalukhasia elira lialio, nibalilanga mbu Dan, owali kuuka wabwe.

⁴⁸Amatookho kano nende amataala kakabotokhane kali mumukunda okwa abebilibwa bioluyia lwa Dani bakabilwa okhuba obulaame bwabwe.

⁴⁹Olwa Abaisiraeli bali nibamalile okhukabana omukunda, bakaba Yoshwa omusiani wa Nuni eshitonye shiomukunda okhuba obulaamebwe.

⁵⁰Shinga OMWAMI Nyasaye yali niyalaka, bamuhelesia litookho lia Timinatsi-Sera eliali mushialo shieshikulu shia Efuraimu, elia yali nasabile. Niyombakha khandi litookho elo mana namenyamwo.

⁵¹Echio nichio emikunda echia Eleazari omwisaaliisi, nende Yoshwa omusiani wa Nuni nende abemilisi bebilibwa ebioluyia olwa Abaisiraeli bakaba khulwa okhukhupa ikha nibali Shilo imbeli ewa OMWAMI Nyasaye nibali habwinjililo weliheema elia OMWAMI Nyasaye litakatifu. Kho nibamala bario okhukaba omumunda okwo.