Read wanga YOSHWA 2 Bible Online

YOSHWA 2 - wanga bible

YOSHWA 2

¹Mana Yoshwa naruma abanoonelesi babili okhurula mukambi ya Akashia, nabalachilisia mbu, batsie banoonelesie mumaasilisi eshialo shia Kanani, ne okhushila muno litookho lia Yeriko. Olwa boola mwitookho elo, batsia okhwiyalisia munzu eyomukhasi omutamba oulangwa mbu, Rahabu.

²Omuruchi welitookho lia Yeriko yahulila mbu, abandu bandi Abaisiraeli betsile mushilo okhulaambuula eshialo eshio.

³Kho omuruchi oyo naruma likhuwa khu Rahabu naboola ari, “Abasaatsa bali munzuwo abo betsile okhulaambuula eshialo shiosi! Khulweshio barusie elwanyi!”

⁴Nebutswa omukhasi oyo yali nabisile abasaatsa abo, mana nakalusia omuruchi ari, “Toto mwene, abasaatsa bandi betsile munzu mwanje, nebutswa shiemanyile ewa barulile tawe.

⁵Ne olwa eshiliibwa shibeele nishienyanga okhwikalwa eshialo nibwakhela, barulile nibatsia, ne shiemanyile ewabatsiile tawe. Balondachile bwangu haundi munyala okhubatiila.”

⁶Nebutswa Rahabu yali nabisile abasaatsa abo ikulu khushitsafu shieinzu, nabafunishekhwo amakata akakaasibungwakhwo obuusi bweikitani, aka yali nabakaale ikulu.

⁷Mana abarume bomuruchi abo nibarula mwitookho elo bwangu muno, ne eshiliibwa nishikalwa. Balondachila khubanoonelesi ba Abaisiraeli abo okhuula habundu aha omuhanda kwakaanilanga nende omwalo kwa Yorodani.

⁸Ne abanoonelesi abo nibashili okhwiyalisia mushilo, Rahabu yaniina ikulu ewa bali,

⁹ne nababoolela ari, “Emanyile mbu, OMWAMI Nyasaye amuhelesiye eshialo shino. Murisiye buli mundu mushialo shino.

¹⁰Okhuba khwahulila shinga olwa OMWAMI Nyasaye yakhamia amaatsi keinyanza inzakhanyu imbeli wenywe, olwa mwali nimurulanga Misiri. Khandi khwahulila shinga olwa mwera Sihoni nende Ogi abaruchi babili ba Abamori, abali nibamenyela ebukwe womwalo kwa Yorodani.

¹¹Bwangu bwene olwa khwahulilakhwo butswa amakhuwa ako, fwesi khwaria. Fwesi nikhuwa itswoni shichila inywe. OMWAMI Nyasaye wenywe niye Nyasaye ouli hekulu mwikulu, khandi ali hano khushialo.

¹²Bulano mwitsube imbeli wanje muliira elia OMWAMI Nyasaye wenywe mbu, mulakholela abolwibulo lwanje amalayi shinga aka isie emukholeele. Ne mumbelesie eshifwanani eshiemusuubisiliamwo.

¹³Musuubisie mbu, shimuleera papa wanje, mama wanje, abasiani befwe, abakhaana befwe nende aba olwibulo lwabwe boosi ta! Mulakhwire tawe.”

¹⁴Abanoonelesi abo nibakalusia Rahabu bari, “Nyasaye akhoya yakhwira ifwe, nikhuba nikhulakhola shinga olwa khuboolile tawe! Noba nolaboolelakhwo omundu yesi yesi aka khwakhanoonelesinjia ta, khukhusuubisia mbu, olwa OMWAMI Nyasaye akhuhelesia eshialo shino, khulakhukholela amalayi.”

¹⁵Rahabu yali niyamenya munzu eyombakhwa mukari mwelisisi lielitookho, kho nabisilia abasaatsa abo mwitirisha okhwikha elwanyi, niyekhoonyela omukoye.

¹⁶Rahabu nababoolela ari, “Tsie mwibise mubikulu. Abakhabilisi bomuruchi bakhamunyoola. Mwibise ebweneyo khulwa tsinyanga tsitaru okhuula olwa bachelela. Olunyuma munyala okhwinyokha.”

¹⁷Mana abasaatsa abo nibamukalusia bari, “Khulalinda obusuubisie bwokhukholile nikhusuubisia.

¹⁸Kano niko aka khukhoyile okhukhola; olwa khwinjila nikhuseera eshialo shienywe, obohe eshitasi eshiakhanyu shino khwitirisha elia wakhwishiliamwo elwanyi. Oreere halala munzumwo, papawo, mamawo, abaana benywe nende abeinzu ya papawo boosi.

¹⁹Omundu yesi yesi niyetsukhana yarula elwanyi mana yafwa, eshitsayishie shiba khuye omwene. Eshitsayishie shishiba khwifwe tawe. Nebutswa omundu yesi yesi naba nasaalisibwa nali munzuyo ninawe, eshitsayishie shilaba khwifwe.

²⁰Nebutswa noboolela omundu yesi yesi aka khunoonelesiyenje, shikhuba khulalinda obusuubisie bwefwe bwokhukholile nikhukhusuubisia tawe.”

²¹Rahabu nafuchilila mana nabaseebula. Olwa bali nibamalile okhutsia, yaboha eshitasi eshiakhanyu khwitirisha elo.

²²Abanoonelesi abo batsia nibenjila mubikulu ne nibebisamwo. Abakhabilisi bomuruchi bakhaaba abanoonelesi abo khulwa tsinyanga tsitaru, nebutswa shibabanyoola ta, kho abakhabilisi abo nibakalukha Yeriko.

²³Mana abanoonelesi babili abo nibeekha okhurula mubikulu, nibambukha omwalo kwa Yorodani, nibakalushila ewa Yoshwa yali. Nibaboolela Yoshwa amakhuwa koosi akali nikekholeeshe.

²⁴Mana nibasuubisia Yoshwa bari, “Khumanyile toto mbu, OMWAMI Nyasaye akhuhelesiye eshialo eshio shiosi. Abandu boosi abamenyilemwo bakhuriire ifwe.”