Read wanga YOSHWA 20 Bible Online

YOSHWA 20 - wanga bible

YOSHWA 20

¹Mana OMWAMI Nyasaye naboolela Yoshwa

²mbu aboolele Abaisiraeli ari, “Mwahule amatookho akobwilushilo aka ndalachilisia okhubirila khu Musa.

³Omundu yesi niyetsukhana yeera owashie anyala okhutsia mumatookho ako mana yehonokoshe okhurula khumundu oukhabanga okhumwira khulwa eshitsayi shiasasiye metsukhana.

⁴Omundu wiirire oyo anyala okhwilushila khu elala khumatookho kano; mana atsie habundu ahabayasilinjia eshiina habwinjililo welitookho elo mana yenoosilie abakofu akamwikholeshekhwo. Mana abakofu abo balamwinjisia mwitookho, nibamuhelesia habundu ahokhumenya ninabo.

⁵Ne omwikho womundu wirirwe oyo niyakhamulondakhwo okhuula mwitookho elo, abandu bamenyile mwitookho elo balahana omwiiri oyo khumwikho womundu ufwiile oyo tawe. Abandu abo okhuula bamulinde shichila omundu oyo yerire owashie khulwa okhwitsukhana, shabeele namukoneshele neliruma tawe.

⁶Omundu oyo alamenya mwitookho elo okhuula olwa alaba nayaasibwe habulafu, khandi; alamenye mwitookho elo okhuula olwa Omwisaaliisi Omukhulundu ouba narukanga tsinyanga etsio aba namalile okhufwa. Omundu oyo anyala okhukalukha mwitookholie, elia yali niyelukhamwo.”

⁷Kho elubeka lwa Mumbo womwalo okwa Yorodani bahula amatookho ka Kedeshi elili mwitaala lia Galilaya mushialo shieshikulu shia Nafutali, Shekemu, elili mushialo shiebikulu shia Efuraimu, nende Heburoni elili mushialo shia Yuda.

⁸Ebukwe womwalo kwa Yorodani khushitsiimi eshiakwalala ebukwe welitookho lia Yeriko, bahula litookho lia Bezeri mumukunda kwoluyia lwa Rubeni, Ramotsi elili mu Giliadi, elili mumukunda okwoluyia lwa Gadi nende Golani elili mu Bashani mumukunda kwoluyia lwa Manase.

⁹Kano niko akali amatookho kokhwilushilamwo akahulilwa abandu boosi ba Isiraeli nende kata omurende yesi oumenyanga mubo. Omundu yesi owitsukhana niyerire owashie anyala okhwilushilamwo khulwa okhwihonokosia okhurula khumundu wuba nakhabanga okhumwira. Omundu witsukhane niyerire owashie oyo shialerwa nashili okhuyaasibwa habulafu mushina tawe.