Read wanga YOSHWA 21 Bible Online

YOSHWA 21 - wanga bible

YOSHWA 21

¹Abemilisi bebilibwa ebiaboluyia lwa Lawi batsia khumwisaaliisi Eleazari, nende Yoshwa omusiani wa Nuni nende abemilisi bebilibwa bietsimbia tsia Isiraeli,

²nibali mwitookho Shilo mushialo shia Kanani; Abemilisi boluyia lwa Lawi nibababoolela bari, “OMWAMI Nyasaye yalaka okhubirila khu Musa mbu khukabwe amatookho kakhumenyamwo nende obwayilo bwako khulwa emiruko chiefwe.”

³Kho Abaisiraeli nibalonda lilachilisio elia OMWAMI Nyasaye elo, ne nibakabila Abalawi malala khumatookho kabwe nobwayilo bwako okhurula khumikunda chiabwe abeene.

⁴Buli beshilibwa bakabungwa amatookho kabwe khulwa okhukhupa ikha. Abolwibulo lwa Haroni abomwitookho lia Kohatsi nibo abaranjilila okhukabwa amatookho. Bakabwa amatookho ekhumi nende kataru okhurula khumikunda chiatsimbia tsia Yuda, Simeoni nende Benjamini.

⁵Nabo abebilibwa bandi ba Kohatsi abatong'a bakabwa amatookho ekhumi okhurula khumikunda chietsimbia tsia Efuraimu, Dani nende inusu yoluyia lwa Manase olwa Mumbo.

⁶Abolwibulo lwa Gerishoni bakabwa amatookho ekhumi nende kataru okhurula khumikunda chietsimbia tsia Isakari, khuketsimbia tsia Asheri, Nafutali, nende oluyia lwa Manase olwebukwe oluli mwitookho lia Rashani.

⁷Abebilibwa biolwibulo lwa Merari bakabwa amatookho ekhumi nende kabili okhurula khumikunda echietsimbia tsia Rubeni, Gadi nende Zebuluni.

⁸Khulwa okhukhupa ikha, abandu ba Isiraeli bakabila Abalawi amatookho ako nende emikunda chiobwayilo echiali ahambi ninako shinga olwa OMWAMI Nyasaye yali niyalachilisia okhubirila mu Musa.

⁹Kano niko ameera akamatookho aketsimbia tsia Yuda nende Simeoni akakabilwa

¹⁰abolwibulo lwa Haroni abali abeshilibwa shia Kohatsi abarula mulwibulo lwa Lawi. Nibo abaranjilila okhukabwa okhulondana nokhukwa khweikha.

¹¹Bakabwa litookho lia Araba, (Araba liali eliira lia samwana Anaki), bulano litookho elo lilangungwa mbu Heburoni elili mushialo shieshikulu shia Yuda halala nende omukunda kwalio okwa obwayilo.

¹²Nebutswa omukunda okwa mushibakala okwa litookho elo nende amataala kalio, kwali nikwamala okhukabilwa Kalebu omusiani wa Yefune okhuba obulaamebwe.

¹³Okhumeeta khwitookho lia Heburoni eliali elala khumatookho akobwilushilo, akandi akakabilwa abolwibulo lwa Haroni kali, Libuna,

¹⁴Yatiri, Eshitemoa,

¹⁵Holoni, Debiri

¹⁶Aini Yuta, nende Betsishemeshi halala nobwayilo bwako. Koosi kali amatookho shienda okhurula mutsimbia tsia Yuda nende Simeoni.

¹⁷Ne okhurula mumikunda chioluyia lwa Benjamini bakabilwa amatookho kane kano; Gibeoni, Geba,

¹⁸Anatsotsi nende Alimoni, halala nende obwayilo bwako.

¹⁹Koosi kali amatookho ekhumi nakataru halala nobwayilo bwako akakabilwa abolwibulo lwa Haroni. Ekhumi nende kataru koosi halala, nende obwayilo bwako.

²⁰Abebilibwa bioluyia lwa Lawi bali nibatonyile bakabwa amatookho kane okhurula mumukunda okwoluyia lwa Efuraimu.

²¹Bakabwa amatookho kane kano; Shekemu elili mushialo shieshikulu shia Efuraimu, liali elala khumatookho akobwilushilo Gezeri.

²²Kibuzaimu nende Betsi Horoni halala nemikunda chiako echiobwayilo.

²³Bakabwa amatookho kane okhurula khumukunda okwoluyia lwa Dani. Amatookho ako kali Eliteke, Gibetsoni

²⁴Aijaloni nende Gatsirimoni.

²⁵Okhurula khumukunda kwoluyia lwa Manase olwali mumbo bakabwa amatookho kabili kano; Tanaki nende Gatsirimoni.

²⁶Amatookho koosi kabebilibwa bioluyia lwa Kohatsi bakabwa kali ekhumi halala nobwayilo bwako.

²⁷Abebilibwa bia Gerishoni aboluyia lwa Lawi bakabwa amatookho kabili akali mumukunda okwoluyia lwa Manase olwebukwe. Amatookho ako kali; Golani eliali mu Bashani, (elala khumatookho akobwilushilo) nende Beeshitera halala nobwayilo bwako.

²⁸Bakabwa amatookho kane halala nobwayilo bwako okhurula mumukunda okwoluyia lwa Isakari. Amatookho ako kali Kishioni, Deberatsi,

²⁹Yarimutsi nende Enganimu.

³⁰Bakabwa amatookho kane okhurula mumukunda okwoluyia lwa Asheri. Amatookho ako kali Mishali, Abiidoni

³¹Helikatsi nende Rehobu.

³²Bakabwa amatookho kataru okhurula mumukunda okwoluyia lwa Nafutali. Amatookho ako kali Kedeshi elili mu Galilaya (elala khumatookho akobwilushilo), Hamotsi-Dori, nende Karitani.

³³Abebilibwa biahukhane abolwibulo lwa Gerishoni bakabwa amatookho ekhumi nende kataru koosi halala, nende obwayilo bwako.

³⁴Abebiliibwa bia Merari khuboluyia lwa Lawi abali nibatoonyile, bakabwa amatookho kane okhurula mumukunda kwoluyia lwa Zebuluni. Amatookho ako kali Yokineamu, Karita,

³⁵Dimina nende Nahali.

³⁶Bakabwa amatookho kane okhurula mumukunda okwoluyia lwa Rubeni. Amatookho ako kali Bezeri, Yahazi

³⁷Kedemotsi nende Mefaatsi.

³⁸Bakabwa amatookho kane okhurula mumukunda okwoluyia lwa Gadi. Amatookho ako kali Ramotsi, elili mwitookho lia Giliadi elala khumatookho akobwilushilo, Mahanaimu,

³⁹Heshiboni nende Yezeri.

⁴⁰Mana abebiliibwa biaboluyia lwa Merari nibakabwa amatookho ekhumi nende kabili koosi halala, nende obwayilo bwako.

⁴¹Amatookho koosi akaboluyia lwa Lawi bakabwa okhurula mumikunda chioluyia lwa Abaisiraeli, akali amakhumi kane nende munane halala nende obwayilo bwako.

⁴²Buli litookho khuko lialinji nende obwayilo bwalio.

⁴³OMWAMI Nyasaye yahelesia Abaisiraeli omukunda kwosi okwa yali niyetsuba okhuhelesia abakuuka babwe. Nibakubukula ne nibamenyamwo.

⁴⁴OMWAMI Nyasaye yabanyalila okhumenya mumulembe mushialo eshio shiosi, shinga olwa yali niyasuubisia abakuuka babwe. Abulaho omusuku yesi yesi owabahulanga ta, shichila OMWAMI Nyasaye yanyalilanga Abaisiraeli okhuhula abasuku babwe boosi.

⁴⁵OMWAMI Nyasaye Yosia buli obusuubisie, obwa yali niyasuubisia abandu ba Isiraeli. Ne bwosi bwosibwa.