Read wanga YOSHWA 22 Bible Online

YOSHWA 22 - wanga bible

YOSHWA 22

¹Mana Yoshwa nalanga halala abemilisi boluyia lwa Rubeni, olwa Gadi nende inusu yaboluyia lwa Manase.

²Nababoolela ari, “Mukholile buli shindu eshiomukhalabani owa OMWAMI Nyasaye Musa yamulachilisia okhukhola, khandi mulondile amalako kanje koosi.

³Okhuula bulano mushili okhulekhanakhwo nende Abaisiraeli bashienywe tawe. Mubelenje meeso okhulinda amalako aka OMWAMI Nyasaye wenywe.

⁴Bulano OMWAMI Nyasaye wefwe yahelesiye Abaisiraeli obuhuluushi shinga olwa yasuubisia abashienywe. Khulweshio, nebise bienywe ebiokhwinyokha mukalushe nango wenywe mumukunda kwa Musa omukhalabani owa OMWAMI Nyasaye yamuhelesia, ebukwe womwalo kwa Yorodani.

⁵Muteeme okhulola mbu, mulondanga amalako ka Musa yamulachilisia. Muheelenje OMWAMI Nyasaye wenywe, nimukhola aka yenya, nimuhulila amalakoke. Mube abesiikwa khuye nimumukhalabanila nomwoyo kwenywe kwosi nende amaani kenywe koosi.”

⁶Kho Yoshwa nabasabila ikhabi, ne nabaseebula nabo nibakalukha nango wabwe.

⁷Ne Musa yali niyakaba inusu yaboluyia lwa Manase omukunda okwali mwitookho lia Bashani, nayo inusu yindi eyaboluyia olwo, halala nende abasiani babwe yali niyabakaba omukunda okwali Mumbo womwalo kwa Yorodani. Olwa Yoshwa yabaseebula, yabasabila ikhabi,

⁸ne nababoolela ari, “Kalushe natsingo tsienywe nende obuyinda obunji, nende emiruko eminji, netsifetsa, nende tsitsahabu, nende emikasa, nene ebibia, nebifwalo ebinji muno. Mukabane nende abasiani benywe ebia muyaayile mubasuku benywe.”

⁹Kho aboluyia lwa Rubeni, olwa Gadi nende oluyia lwa Manase olwebukwe, nibaseebulana nende Abaisiraeli bandi Shilo, mu Kanani, nibachaaka okhukalukha nango mumukunda kwabwe kwa Giliadi okwa bali nibakabilwa shinga olwa OMWAMI Nyasaye yali niyalachilisia Musa.

¹⁰Olwa aboluyia lwa Rubeni, olwa Gadi nende inusu yaboluyia lwa Manase lwebukwe, boola khwitookho lia Gelilotsi, elili hambi nende omwalo kwa Yorodani, nibombakha eshimalilo shiemisango eshikhongo khandi eshichamisia muno khumwalo okwo.

¹¹Olwa Abaisiraeli bahulila mbu, abandu boluyia lwa Rubeni, olwa Gadi nende inusu yaboluyia lwa Manase olwebukwe bali niboombaashe eshimalilo shiemisango mumukunda kwa Gelilotsi, khulwakho lwomwalo kwa Yorodani khulubeka lwa Abaisiraeli,

¹²Abaisiraeli boosi bekhung'asia Shilo khulwa okhutsia okhulwana abetsimbia etsio.

¹³Mana Abaisiraeli nibaruma Finehasi omusiani wa Eliazari owali omwisaaliisi mushialo shia Giliadi khuboluyia lwa Rubeni, Gadi nende inusu yabooluyia lwa Manase.

¹⁴Baruma abasaatsa ekhumi okhutsia ninaye, buli mulala okhurula mubuli oluyia lwa Abaisiraeli khandi ouli omukhulundu wabuli eshiliibwashie mutsimbia tsia Abaisiraeli.

¹⁵Niboola mushialo shia Giliadi khuboluyia lwa Rubeni, olwa Gadi nende inusu yaboluyia lwa Manase olwebukwe. Nibaboolela abetsimbia etsio bari,

¹⁶“Mwakhafunaka murie obusuubili bwenywe nende Nyasaye wa Isiraeli? Mwakhashiukhana murie okhurula khu OMWAMI Nyasaye ne nimwiyumbashila abeene eshimalilo shiemisango khulwa okhukhaya okhumuhulila?

¹⁷Mwitsulile obumayanu bwa khwakholela OMWAMI Nyasaye nikhuli Peori. OMWAMI Nyasaye yakhuhelesia eshinyasio shiolumbe. Khushinyoolanga eshinyasio eshio okhuula bulano khulwa obwonooni obwo. Obwonooni obwo shibwahela ta?

¹⁸Mulakhaya okhuhulila OMWAMI Nyasaye inyanga yino noho? Nimukhaya okhumuhulila inyanga yino, mukamba OMWAMI Nyasaye aba alasinyishila abandu ba Isiraeli boosi.

¹⁹Nebutswa bulano nimuba nimupaara mbu, eshialo shienywe shineshieleleshe, eshiamunyala okhwinamilamwo OMWAMI Nyasaye ta, yitse ewa khuli mushialo eshia OMWAMI Nyasaye ewa liheemalie litakatifu lili, mana mukabane ninefwe omukunda. Nebutwa shimulakhaye OMWAMI Nyasaye noho okhukhola abandi khwifwe okhuba abakhayi khulwa okhumbakha eshimalilo shiemisango shindi okhumeeta khu eshia OMWAMI Nyasaye wefwe tawe.

²⁰Mwitsulile akekholekha khu Akani omusiani wa Zera, olwa yakhaya okhulonda lilako liokhusasia ebindu biosi ebiali nibiyaayilwe. Oluyia lwosi olwa Abaisiraeli lwanyoola eshinyasio khulwa obwonooni obwo. Akani shiyafwa yenyene khulwa obwonooni obwo tawe.” [4]

²¹Aboluyia lwa Rubeni, olwa Gadi nende inusu yaboluyia lwa Manase olwebukwe nibaboolela abakhulundu abetsimbia tsia Abaisiraeli etsia Mumbo bari,

²²“Nyasaye niye owobunyali! Ne niye OMWAMI Nyasaye! Nyasaye niye owobunyali! Niye OMWAMI Nyasaye! Amanyile eshichila nikhukhola ako, ne khwenya mbu mwesi khandi mumanyekhwo! Ne nikhuba nikhukhayile okhumuhulila ye, noho nikhulamusuubiile ta, kho mukhwiire!

²³OMWAMI Nyasaye mwene akhuhelesie eshinyasio, nikhuba nikhukhayile okhumuhulila, nikhumbakha eshimalilo shiemisango shiefwe abeene khulwa okhusambilakhwo emisango noho okhumalilakhwo emisango chieimele noho echiokhureera omulembe.

²⁴Tawe! Khwombakha eshimalilo shiemisango eshio shichila khwali noburi mbu, mutsinyanga tsiitsanga abolwibulo lwenywe bakhareeba abolwibulo lwefwe bari, ‘Inywe shimulikhwo nelikhuwa liosi liosi khu OMWAMI Nyasaye wa Isiraeli ta?

²⁵OMWAMI Nyasaye yaraho omwalo kwa Yorodani okhuba olwakho hakari wefwe nende inywe abolwibulo lwa Rubeni nende ifwe abolwibulo lwa Gadi. Khulweshio shimulikhwo nelikhuwa liosi liosi khu OMWAMI ta?’ Mana kachilile abolwibulo lwenywe bakholile abolwibulo lwefwe nibalekha okhwinamila OMWAMI Nyasaye.

²⁶Khulweshio shikhwayombakha eshimalilo shiemisango khulwa okhusambilakhwo emisango kata okhuhaanilakhwo ebihaanwa tawe.

²⁷Habula khwashiumbakha khulwa okhuba eshifwanani khubandu befwe nende abenywe nende abetsinzibulo tsitsa okhubaho olunyuma lwefwe mbu, ifwe toto khwinamilanga OMWAMI Nyasaye imbeli weliheema litakatifu khulwa okhumukholela emisango chiefwe echiokhusamba nende echiokhureera omulembe. Kano kali khulwa okhwikalila abolwibulo lwenywe okhuboolela abolwibulo lwefwe mbu, ‘Shimulikhwo nelikhuwa liosi liosi khu OMWAMI tawe.’

²⁸Khwombakha eshimalilo shiemisango eshio kho mbu, abolwibulo lwenywe nibakhaboola bario, abolwibulo lwefwe nabo balibaboolela bari, ‘Lole! Abakuuka befwe bombakha eshimalilo shiemisango eshifwanana nende eshia OMWAMI Nyasaye. Eshimalilo shiemisango eshio shishiali eshiokhusambilakhwo ebihaanwa noho emisango ta, nebutswa bashiumbakha khulwa okhuba eshifwanani mbu, fwesi khuli aba OMWAMI Nyasaye.’

²⁹Shikhunyala okhukhaya OMWAMI Nyasaye noho okhulekha okhumuhulila bulano khulwa okhumbakha eshimalilo shiemisango mbu, khuhaanilekhwo emisango emisambe kata chieimele kata okhukholelakhwo emisango chindi chiosi chiosi tawe. Shikhunyala okhumbakha eshimalilo shiemisango shindi nishilali eshimalilo shiemisango eshia OMWAMI Nyasaye wefwe, eshili mwiheemalie litakatifu tawe.”

³⁰Olwa omwisaaliisi Finehasi nende abemilisi ekhumi aba yali niyetsile ninabo okhurula khutsimbia tsia mumbo bahulilakhwo akaboluyia lwa Rubeni, olwa Gadi nende olwa Manase lwebukwe baboola, basangaala muno.

³¹Mana omwisaaliisi Finehasi omusiani womwisaaliisi Eliazari naboolela aboluyia lwa Rubeni, olwa Gadi nende olwa Manase ari, “Bulano khumanyile mbu OMWAMI Nyasaye ali ninefwe. Shimufukuule OMWAMI Nyasaye ta, khulweshio muhoniye abandu ba Isiraeli okhurula mushinyasio eshia OMWAMI Nyasaye.”

³²Mana omwisaaliisi Finehasi nende abakhulundu abo nibaseebula aboluyia lwa Rubeni nende olwa Gadi nibali mumukunda kwa Giliadi, nibeenyokha nibakalukha Kanani khu Abaisiraeli, ne nibaboolela abaliyo koosi akali nikekholeeshe Giliadi.

³³Olwa bahulilakhwo akomwisaaliisi Finehasi nende abakhulundu ekhumi abo baboola, basangaala muno, nibetsoomia OMWAMI Nyasaye. Shibamala khandi baboolekhwo amakhuwa kokhuseera aboluyia lwa Rubeni nende olwa Gadi nende akokhusasia eshialo shiabwe tawe.

³⁴Aboluyia lwa Rubeni nende Gadi nibakulikha eshimalilo shiemisango eshio eliira mbu, “Obuloli,” Nibaboola bari, “Neshiobuloli hakari wefwe fwesi mbu, OMWAMI Nyasaye niye Nyasaye wefwe.”