Read wanga YOSHWA 23 Bible Online

YOSHWA 23 - wanga bible

YOSHWA 23

¹Olunyuma lwetsinyanga tsinyinji, OMWAMI Nyasaye yali niyahelesia Abaisiraeli obuhuluushi okhurula khubasuku babwe abali nibababootokhana. Khubise ebio Yoshwa yali niyakofula muno.

²Kho nalanga halala Abaisiraeli, abakofu, abemilisi, abayaasi nende abakhongo ba Abaisiraeli boosi, nababoolela ari, “Emalile okhukofula muno bulano.

³Mumalile okhulola koosi aka OMWAMI Nyasaye wenywe yakholeele amahanga kano khulwa inywe. OMWAMI Nyasaye, Nyasaye wenywe niye owamulwanilenje inywe.

⁴Emalile okhukabila abetsimbia tsienywe omukunda kwosi okwa amahanga ka ndahula, okuli hakari womwalo kwa Yorodani nende inyanza ya Hakari eyili elubeka lwomumbo.

⁵OMWAMI Nyasaye wenywe alakhola amahanga ako okhumwilukha nikakalukha inyuma, khandi alakaloonda imbeli wenywe. Mulabukula omukunda kwabwe shinga olwa OMWAMI Nyasaye yamusuubisia.

⁶Khulweshio okhuula mube meeso nimulinda nende okhukhola amakhuwa koosi akahandikwa mushitabu shiamalako ka Musa. Shimulakhayekhwo okhuhulila kata elala khuko tawe.

⁷Shimulasanjilanekhwo mwikhuwa nende tsimbia etsiatong'a mwinywe kata okhwinamila abanyasaye babwe tawe. Shimulasayekhwo khubanyasaye babwe, kata okhwitsuba nimurumbula ameera kabwe tawe.

⁸Habula mutsiililile okhuba abesiikwa khu OMWAMI Nyasaye, shinga olwa mwabelenje okhuula bulano.

⁹OMWAMI Nyasaye yarusiye imbeli wenywe amahanga amakhongo khandi akobunyali, olwa mwabele nimwinjilanga mushialo shino, ne abulaho omusuku yesi yesi owanyaliilwe okhumuhula inywe tawe.

¹⁰Mulala khwinywe anyala okhwilukhasia abasuku eshikhumila, (1,000) shichila OMWAMI Nyasaye wenywe amulwanilanga inywe shinga olwa yamusuubisia.

¹¹Khulweshio mube meeso, nimuheela OMWAMI Nyasaye wefwe.

¹²Nimuba nimukhaya okhuhulila OMWAMI Nyasaye, ne nimusanjilana namahanga akashili hakari mwinywe, nende okhuteshiania ninabo,

¹³kho mumanye toto mbu, OMWAMI Nyasaye wenywe shialarusia amahanga ako imbeli wenywe olwa muba nimwinjilanga mumikunda echio tawe. Nebutswa amahanga ako kalaba khwinywe shinga omureko noho obuko, khandi abalulu shinga lwomundu akhunywekha khumukongo neindabushi, noho shinga lwomundu atsoma tsimonitsio namahwa. Amatinyu kamakana kano kalatsiililila khwinywe, okhuula olwa alabulaho kata mulala khwinywe oulaba natoonyile mushialo eshinulu shino, eshia OMWAMI Nyasaye wenywe yamuhelesia.

¹⁴“Bulano tsinyanga tsianje etsiokhufwa tsiulile. Buli mulala khwinywe amanyile mumwoyokwe nende mumapaaroke mbu, OMWAMI Nyasaye wenywe yamuhelesia buli shindu eshia yakhusuubisia. OMWAMI Nyasaye yakholile buli shindu eshia yakhusuubisia okhukhukholela ifwe, shibulaho eshia yakhaywa okhuusia.

¹⁵Nebutswa shinga olwa yakhola buli eshia yamusubisia, nolwa alakhola buli libi khwinywe shinga olwa yalaka mbu, alanyala okhukhola.

¹⁶Kho nimuba nimulalinda indakano eya OMWAMI Nyasaye, Nyasaye wenywe yamulaka mbu mulinde, ne nimukhalabanila nende okhwinamila abanyasaye bandi, kho mwirumalie alamuhelesia eshinyasio. Bwangu bwene abulaho mwinywe oulamenya mushialo eshilayi shino, eshia yamuhelesiye tawe.”