Read wanga YOSHWA 24 Bible Online

YOSHWA 24 - wanga bible

YOSHWA 24

¹Mana Yoshwa nakhung'asia tsimbia tsiosi tsia Abaisiraeli halala Shekemu. Yalanga abakofu, abemilisi, abayaasi nende abasinjilili ba Abaisiraeli okhwitsa imbeli weliheema litakatifu.

²Mana Yoshwa naboolela abandu ba Isiraeli boosi ari, “OMWAMI Nyasaye wa Isiraeli aboolanga ari, ‘Khale, abakuuka benywe, Tera samwana Aburahamu nende Nahori bamenyanga injelekha womwalo kwa Yufurate nibenamila abanyasaye bandi.

³Ne ndarusia kuuka wenywe Aburahamu injelekha womwalo okwo nimwimilila okhubira mushialo shiosi shia Kanani. Ndenjiyia olwibulolwe, nimuhelesia omwana omusiani oulangwa mbu Isaka,

⁴naye Isaka nimuhelesia Yakobo nende Esau. Ndakabila Esau omukunda okweshikulu shia Edomu okhuba obulaamebwe, nebutswa Yakobo nende abolwibulolwe bakholomokha nibatsia Misiri.

⁵Olunyuma lwa tsinyanga tsinyinji, ndaruma Musa nende Haroni Misiri khubakuuka benywe, mana nindeerera eshialo shia Misiri amasila amakhongo. Nebutswa ndamwimilila inywe okhurula mushialo eshio.

⁶Ndarusia abakuuka benywe Misiri, nabo Abamisiri nibabalondachila namakaari kabwe nende tsifarasi tsiabwe etsielihe. Nebutswa olwa abakuuka benywe boola khunyanza Inzakhanyu,

⁷bahabila isie okhubahonokosia, ne nendeera eshiilima hakari wabwe nende Abamisiri. Ndakhola amaatsi keinyanza okhuyombookha khubo mana nibeyinikhamwo. Mwalola abeene netsimoni tsienywe aka ndakholela Abamisiri. “ ‘Mwamenya mushitsiimi emiyika eminji.

⁸Mana nimureera mumukunda kwa Abamori, abali nibamenyanga ebukwe womwalo kwa Yorodani. Bamulwana, nebutswa ndamunyalila okhubahula. Mwabukula omukunda kwabwe, nasi nebasasia imbeli wenywe.

⁹Mana Balaki omusiani wa Zipori, owali omuruchi wa Abamoabu nalwana nende Abaisiraeli. Yalanga omulakusi Balamu omusiani wa Beori mbu amulaame inywe eshilaamo shiobubi.

¹⁰Nebutswa shindamufuchilila mbu amulaame inywe eshilaamo shiobubi tawe, ne nimukhola okhumusabila ikhabi.

¹¹Mwambukha omwalo kwa Yorodani nimuula khwitookho lia Yeriko. Abandu bamenya mu Yeriko nibamulwana, abandi bamulwana bali; Abamori, Abaperisi Abakanani, Abahiti, Abagirigashi, Abahiwi nende Abayebusi. Nebutswa ndamunyalila okhubahula boosi.

¹²Olwa mwenjila mumikunda chiabwe ndabakhola okhuria khandi okhutechela kho mbu mulonde abaruchi babili ba Abamori okhurula mumikunda echio. Nisie owamuhulila. Shikali mbu mwabahula khulwa amaani kenywe nende ebimanulwa bienywe tawe.

¹³Ndamuhelesia omukunda okwa mulalimakhwo ta, nende amatookho akamulayombakha tawe. Bulano mumenyanga mumukunda okwo, nimulia tsinzabibu okhurula khumitsabibu echia mularaka ta, nende emiseituni okhurula khumisaala echia mularaka tawe.’ ”

¹⁴“Khulweshio bulano muhelesinjie OMWAMI Nyasaye oluyali, nimumukhalabanila mushilongoole khandi mubwisikwa. Rusieho abanyasaye ababakuuka benywe benamilanga nibashili Mesopotamia nende Misiri, mana mukhalabanile OMWAMI Nyasaye yenyene.

¹⁵Nimuba nimuleenya okhukhalabanila OMWAMI Nyasaye ta, mwahule inyanga yino owa mwitsa okhukhalabanilanga, abanyasaye ababakuuka benywe benamilanga Mesopotamia, noho abanyasaye Abamori aba mumenyile mumukunda kwabwe bulano; Nebutswa khulwa isie nende abeinzu yanje khukhalabanilanga OMWAMI Nyasaye.”

¹⁶Mana abandu nibakalusia bari “Shikhunyala okhulekha OMWAMI Nyasaye mbu khukhalabanile abanyasaye bandi tawe!

¹⁷OMWAMI Nyasaye wefwe yarusia abakuuka befwe mushialo shia Misiri, ewa bali abasumba, khandi khumanyile akamakana aka yakholayo. OMWAMI Nyasaye yakhulinda obulayi khunjila yosi eya khwabirilakhwo, nende mumikunda chiosi echia amahanga kakhwabiramwo.

¹⁸“Olwa khwenjilanga mumukunda kuno, OMWAMI Nyasaye yakhurusiliamwo Abamori boosi abali nibamenyangamwo. Kho fweesi khulakhalabanila OMWAMI Nyasaye, shichila ye yenyene niye Nyasaye wefwe.”

¹⁹Naye Yoshwa naboolela abandu ari, “Mulapare mbu nobwangu okhumukhalabanila OMWAMI Nyasaye tawe. OMWAMI Nyasaye niye Nyasaye Omutakatifu, Noweimbalikha oulachama okhuyingana nabanyasaye bandi tawe khandi shianyala okhumuleshela obwonooni bwenywe tawe.

²⁰Ne nimuba nimulekha okhumwinamila, nimwanza okhwinamila ebifwanani biabanyasaye bandi, aba alamukalukhanakhwo nokhumuhelesia eshinyasio. Alamwiira mwesi, kata naba niyali omulayi khwinywe olwambeli.”

²¹Abandu abo nibakalusia Yoshwa bari, “Tawe! Khwitsa okhumukhalabanila OMWAMI Nyasaye.”

²²Yoshwa nababoolela ari, “Abeene muli abaloli khwinywe abeene mbu, mwahule okhukhalabanila OMWAMI Nyasaye.” Nabo nibakalusia bari, “Kali habwene, abeene khuli abaloli khwifwe.”

²³Yoshwa nabalachilisia ari, “Sasie ebifwanani ebiabanyasaye biosi ebia muli ninabio mana musuubisie mbu mulaba abesiikwa khu OMWAMI Nyasaye, Nyasaye wabandu ba Isiraeli.”

²⁴Abandu abo nibakalusia Yoshwa bari, “Khulakhalabanila OMWAMI Nyasaye wefwe, khandi khulalonda amalakoke.”

²⁵Khunyanga yeneyo olwa abandu bali nibakhung'anile mwitookho Shekemu, Yoshwa yakaasia Indakano hakari wabwe nende Nyasaye. Indakano eyo yali namalako aka okhuula Abaisiraeli baloonde.

²⁶Yoshwa nahandika amalako ako mushitabu eshiamalako aka OMWAMI Nyasaye khulwa abandube. Yoshwa nakhola abandu okhusinjisia lichina likhoongo hashisina homusaala omukhongo okwomuruba okwali ahambi neliheema elia OMWAMI Nyasaye.

²⁷Mana Yoshwa naboolela abandu boosi ari, “Lichina lino lilaba omuloli wenywe. Lihulile amakhuwa koosi aka OMWAMI Nyasaye akhulachilisiye. Kho lilabetsanga obuloli bwokhufukula inywe, okhumwitsulisia muleshe okhwikana Nyasaye wefwe.”

²⁸Mana Yoshwa naseebula abandu, nabo nibakalukha buli mundu mumukundakwe.

²⁹Olunyuma lwako Yoshwa omusiani wa Nuni omukhalabani owa OMWAMI Nyasaye yafwa, nali nemiyika eshikhumi nelikhumi (110) ebise ebio.

³⁰Abaisiraeli nibamuyabila mumukundakwe mwitookho lia Timinatsi-Sera mushialo eshieshikulu shia Efuraimu emasaba weshikulu shia Gaashi.

³¹Khulwa tsinyanga tsiosi etsia Yoshwa yali nashiliho mwoyo, Abaisiraeli bakhalabanila OMWAMI Nyasaye, ne olunyuma lwokhufwakhwe, batsiililila okhukhalabanila OMWAMI Nyasaye oluhoono lwa abemilisi babwe abalola abeene koosi aka OMWAMI Nyasaye yakholela Abaisiraeli bali nibashiliho mwoyo.

³²Ne amakumba ka Yosefu, akabandu ba Isiraeli bali nibetsa ninako okhurula Misiri kayabilwa Shekemu mushitonye shiomukunda kwa Yakobo yali niyakula okhurula khubasiani ba Hamori samwana Shekemu khulwa ebitonye bieifetsa eshikumi shilala. Omukunda okwo kwakabilwa aboluyia lwa Yosefu okhuba obulaame bwabwe.

³³Olwa omwisaaliisi Eleazari omusiani wa Haroni yesi yafwa, Abaisiraeli bamuyabila mwitookho lia Gibea. Litookho elo liali mushikulu shia Efuraimu ne niliakabilwa abaana ba Finehasi.