Read wanga YOSHWA 3 Bible Online

YOSHWA 3 - wanga bible

YOSHWA 3

¹Inyanga yalondakhwo mumabwibwi, Yoshwa nende Abaisiraeli boosi barula mukambi ya Akashia, nibatsia khumwalo okwa Yorodani, aha bamenya hatiiti niberechekhanga okhwambukha omwalo okwo.

²Olunyuma lwetsinyanga tsitaru, abemilisi babwe batsia mukambi,

³nibalachilisinjia abandu bari, “Olwa mulola abesaaliisi nibachinjile lisanduku elia Indakano eya OMWAMI Nyasaye wenywe, murule mukambi yenywe nimubalondakhwo.

⁴Balamumanyisia injila eya mulondakhwo, shichila mushili okhubaakhwo hano. Nebutswa shimulasitekhwo ahambi khwisanduku lia Indakano elo tawe. Mube ehale khulio oluchendo oluhela ikilomita ndala.”

⁵Mana Yoshwa naboolela Abaisiraeli ari, “Mwisiiye abeene, shichila mukamba OMWAMI Nyasaye alamukholela akamakana amakhongo.”

⁶Mana Yoshwa naboolela abesaaliisi mbu, babukule lisanduku lia Indakano bemile imbeli wabandu. Nabo abesaaliisi nibakhola bario.

⁷Mana OMWAMI Nyasaye naboolela Yoshwa ari, “Aka enzia okhukhola inyanga yino kalachila Abaisiraeli boosi bachaache okhukhuhelesia oluyali shinga omundu omukhoongo, khandi balamanya mbu, toto endi ninawe shinga olwa ndalinji nende Musa.

⁸Oboolele abesaaliisi bachinjile Lisanduku lieindakano mbu, olwa boola khumwalo kwa Yorodani, okhuula beshe baseene mumaatsi mana basinjilemwo.”

⁹Kho Yoshwa nalanga Abaisiraeli nababoolela ari, “Itse hano emuboolile aka OMWAMI Nyasaye, Nyasaye wenywe aboolile mbu, alakhola”.

¹⁰Yoshwa natsiililila okhuboola ari, “Bulano mulamanya toto bwene mbu, Nyasaye ouliho mwoyo ali ninenywe, ne khandi alaloonda narusia imbeli wenywe amahanga kano, Abakanani, Abahiti, Abahiwi, Abaperisi, Abakigoshi, Abamori nende Abayebusi.

¹¹Lisanduku lieindakano elia OMWAMI Nyasaye ourukanga eshialo shiosi, lilambukha omwalo kwa Yorodani imbeli wenywe.

¹²Bulano mwaule abasaatsa ekhumi nababili, buli mulala okhurula mubuli oluyia lwa Abaisiraeli.

¹³Olwa abesaaliisi bachinjile Lisanduku lieindakano eya OMWAMI Nyasaye ourukanga eshialo shiosi baseena ebilenje biabwe mumaatsi, amaatsi akomwalo okwo kalalekha okhubira, nako amaatsi karulanga emukulu nikatsia emwalo, kaleema nikebunjelesia habundu halala.”

¹⁴Abaisiraeli nibarulaho nibatsia okhwambukha omwalo kwa Yorodani, nabo abesaaliisi nibemila imbeli wabwe nibachinjile Lisanduku lieindakano.

¹⁵Tsiali tsinyanga etsia lichesa, tsinyanga etsiomwalo kwa Yorodani kwetsulanga okhuula khutsinguku tsiakwo. Bwangu bwene olwa abesaaliisi baseena mumaatsi ako,

¹⁶kalekha okhubira mana nikebuunjelesia emukulu hetookho lilangwa mbu, Adamu elili elubeka wa Zaretsani. Amaatsi kakholomokhanga emwalo nikatsia munyanza yomunyu ikhoongo kaleshela elala okhukholomokha, mana abandu nibanyalilwa okhwambukha omwalo kwa Yorodani hambi nende litookho lia Yeriko.

¹⁷Olwa abandu bali nibachendanga nibambukha hasi ahomu, abesaaliisi abali nibachinjile Lisanduku lieindakano eya OMWAMI Nyasaye, beema hakari mumwalo kwa Yorodani khwiloba eliumu okhuula olwa abandu boosi bamala okhwambukha.