Read wanga YOSHWA 4 Bible Online

YOSHWA 4 - wanga bible

YOSHWA 4

¹Olwa Abaisiraeli boosi bali nibamalile okhwambukha omwalo okwa Yorodani, OMWAMI Nyasaye yaboolela Yoshwa ari,

²“Yahula abasaatsa ekhumi nababili, buli mulala okhurula mubuli oluyia lwa Abaisiraeli,

³mana obalachilisie mbu, buli mulala khubo abukule lichina elala habundu bwene aha abesaaliisi bali nibasinjiilenje mumwalo. Obaboolele bachinje amachina ako mana bakare habundu aha mulakhoma ikambi inyanga yino.”

⁴Kho Yoshwa nalanga halala abasaatsa abo ekhumi nababili, buli mulala okhurula mubuli oluyia lwa Abaisiraeli,

⁵ne nababoolela ari, “Tsie imbeli wa Lisanduku lia Indakano eya OMWAMI Nyasaye wenywe, hakari womwalo kwa Yorodani. Buli mulala khwinywe okhuula abukule lichina nalichinjila khwibekalie. Buli mundu nelichina liabandu aboluyialwe.

⁶Amachina ako kakhetsusinjie abandu aka OMWAMI Nyasaye akhukholeele. Mutsinyanga tsitsanga, abaana benywe nibamureeba eshifune shiamachina ako khwinywe,

⁷mubaboolele mbu, amaatsi komwalo okwa Yorodani keema okhubira olwa abesaaliisi bambusia Lisanduku lia Indakano eya OMWAMI Nyasaye mumwalo okwo. Amachina ako kaletsusinjia Abaisiraeli buli lwosi eshikhole eshiekholekha hano.”

⁸Abandu ba Isiraeli abo nibakhola shinga olwa Yoshwa yali nabalachilisiye. Nibabukula amachina ekhumi nakabili hakari mumwalo okwa Yorodani shinga olwa OMWAMI Nyasaye yali nalachilisiye Yoshwa, buli oluyia lwa Abaisiraeli lichina lialwo, nibachinga nibareera mukambi, mana nibakarenjekha hasi.

⁹Yoshwa khandi nasinjisia amachina ekhumi nakabili hakari weinyanza, aha abesaaliisi bali nibemile nibachinjile Lisanduku lieindakano. Amachina ako kashilimwo okhuula olwa leelo.

¹⁰Abesaaliisi abachinganga Lisanduku lia Indakano elo, batong'a nibasinjiile hakari mumwalo okwa Yorodani, okhuula olwa buli shindu eshia OMWAMI Nyasaye yali nalachile Yoshwa mbu abandu bakhole shiali nishiikholeeshe, shinga olwa Musa yali niyebaaliile Yoshwa. Abandu nibambukha bwangu muno.

¹¹Olwa bali nibambushe boosi, abesaaliisi abali nibachinjile Lisanduku lieindakano eya OMWAMI Nyasaye elo, bambukha nibatsia imbeli wabandu abo.

¹²Mana aboluyia lwa Rubeni, olwa Gadi nende inusu khuboluyia lwa Manase nibamanuule ebimanulwa khulwa lihe, nibaranjilila okhwambukha omwalo abandu bandi nibashili shinga olwa Musa yali nabalachilisiye.

¹³Ahambi abandu ebikhumila amakhumi kane (40,000) nibamanuule ebimanulwa khulwa lihe bambukha injelekha nibatsia khumuhololookhwe okuli ahambi nende Yeriko. Naye OMWAMI Nyasaye yali nali ninabo.

¹⁴Aka OMWAMI Nyasaye yakhola inyanga eyo, kachila Abaisiraeli balola Yoshwa okhuba omundu omukhongo. Bahelesia Yoshwa oluyali mubulamubwe bwosi, shinga olwa bahelesinjia Musa.

¹⁵Mana OMWAMI Nyasaye naboolela Yoshwa

¹⁶ari, “Laka abesaaliisi bachinjile Lisanduku lia Indakano elo barule mumwalo okwa Yorodani betse elwanyi.”

¹⁷Yoshwa nakhola ario.

¹⁸Ne bwangu bwene olwa abesaaliisi boola khulukuku lwomwalo, amaatsi kachaaka okhubira khandi niketsula okhuula khulukuku shinga olwa kalinji.

¹⁹Abandu bambukha omwalo kwa Yorodani khunyanga yekhumi, yomwesi kwambeli, mana nibakhupa ikambi yabwe Giligali, eyili ebukwe welitookho lia Yeriko.

²⁰Yoshwa nalaka abandu okhusinjisia habwene yaho amachina ekhumi nakabili, akabali nibabukuule mumwalo kwa Yorodani.

²¹Mana naboolela Abaisiraeli ari, “Mutsinyanga tsitsanga olwa abaana benywe bamureeba eshifune shiamachina ako,

²²okhuula mubaboolile shinga olwa Abaisiraeli bambukha omwalo okwa Yorodani khwiloba eliumu.

²³Mubaboolele mbu, OMWAMI Nyasaye wenywe yakhamulusia amaatsi komwalo okwa Yorodani okhuula olwa mwesi mwamala okhwambukha, shinga olwa yakhamulusia amaatsi akeinyanza Inzakhanyu, okhuula olwa khwamala ifwe okhwambukha.

²⁴Khulwa amakhuwa kano, abandu boosi khushialo balamanya shinga lwobunyali obwa OMWAMI Nyasaye buli obukhongo, nenywe mulahelesinjia OMWAMI Nyasaye wenywe oluyali inziayo.”