Read wanga YOSHWA 5 Bible Online

YOSHWA 5 - wanga bible

YOSHWA 5

¹Abaruchi boosi ba Abamori, abali elubeka lwa Mumbo womwalo kwa Yorodani nende abaruchi ba Abakanani, abamenya khundulo weinyanza yahakari, bahulila mbu, OMWAMI Nyasaye yali nakhamiye amaatsi komwalo kwa Yorodani okhuula olwa Abaisiraeli bali nibambuushe, Abaruchi abo bafwe emioyo muno khandi nibahwa amaani khulwa Abaisiraeli.

²Mutsinyanga etsio, OMWAMI Nyasaye naboolela Yoshwa ari, “Wiraanye tsimbalo tsimemu okhurula khumachina koburale, mana oshebe Abaisiraeli khandi olwa khabili.”

³Kho Yoshwa niyeraanya tsimbalo etsio ne nashebela Abaisiraeli habundu ahalangwa mbu, Eshikulu shieshishebo.

⁴Eshifune eshiachila Yoshwa nabasheba shiali mbu, abasaatsa boosi abarula Misiri nende abasaatsa boosi abali nibanyala okhulwana lihe, bali nibafwila mushitsiimi olwa bali khunjila nibarulanga Misiri.

⁵Abasaatsa boosi abarula Misiri bali bashebwa nebutswa abali nibebulilwa khunjila mushitsiimi nibarulangayo, bali nibashili abasinde.

⁶Okhuba Abaisiraeli bachenda mushitsiimi emiyika amakhumi kane okhuula olwa abasaatsa boosi abelihe abali nibarula Misiri bafwa boosi, shichila shibahulilanga amalako aka OMWAMI Nyasaye tawe. Nyasaye yali niyabetsubila mbu, shibalimenyakhwo mushialo shia yali niyasuubisia okhuhelesia abakuukanyene ta, eshialo eshiyinda khandi eshinulu.

⁷Kho abaana abasiani aba bandu abo bebula, bali nibashili abasinde, ne abo nibo abolwibulo oluyia, olwa Yoshwa yasheba.

⁸Olwa Yoshwa yali namalile okhusheba abeshisaatsa abo boosi, batong'a mukambi okhuula olwa bahona.

⁹OMWAMI Nyasaye naboolela Yoshwa ari, “Leelo luno, erusiye khwinywe tsisoni etsiokhuba abasumba Misiri.” Shino nishio eshifune eshichila habundu yaho nihalangwa mbu, Giligali[1] okhuula olwa leelo.

¹⁰Olwa Abaisiraeli bali nibashili mukambi yabwe Giligali, khumuhololokhwe hambi Yeriko, bakhola lisabo lia Pasaka khungoloobe inyanga eyekhumi nakhane eyomumwesi okwo.

¹¹Inyanga yalondakhwo niyo eyali inyanga yambeli eya baliakhwo ebiokhulia ebiraache okhurula mushialo shia Kanani. Biali ingano eyitsiyilwe nende emikaate echibulamwo limela.

¹²Ne imana niyilekha okhulakakha okhurula mwikulu, mana Abaisiraeli nibalachilolakhwo khandi tawe. Ne okhurula khunyanga eyo, Abaisiraeli balitsanga ebiokhulia ebiarakungwa Kanani.

¹³Olwa Yoshwa yali nali ahambi khwitookho lia Yeriko, yetsukhana butswa naluutsi omundu omusaatsa nasinjiile imbeliwe, natiilile okukanga. Kho Yoshwa natsia ewa yali, ne namureeba ari, “Iwe oli mulala khubelihe befwe noho oli omusuku?”

¹⁴Omundu oyo namukalusia ari, “Tawe, isie endi hano shinga omuseesia wabelihe aba OMWAMI Nyasaye.” Yoshwa niyenama hasi imbeliwe ne naboola ari, “Omwami, isie endi omukhalabaniwo. Wenya mbu, ekhole shiina?”

¹⁵Naye omuseesia owa OMWAMI Nyasaye oyo namukalusia ari, “Fwalula ebilaarobio, shichila osinjiile habundu hatakatifu.” Mana Yoshwa nakhola ario.