Read wanga YOSHWA 6 Bible Online

YOSHWA 6 - wanga bible

YOSHWA 6

¹Ebiliibwa bielitookho lia Yeriko biali biekalwa khandi nibialindwa khulwa okhwikalila Abaisiraeli mbu, baleshe okhwinjilamwo. Abulaho owanyala okhwinjilamwo kata okhurulamwo tawe.

²Mana OMWAMI Nyasaye naboolela Yoshwa ari, “Ehaananga litookho lia Yeriko, abaruchi balio nende abelihe balio bamaani mumakhonoko.

³Iwe nende abelihebo okhuula muchende nimubotokhana litookho elo lulala khunyanga, khulwa tsinyanga tsisasaba.

⁴Abesaaliisi musaafu buli mulala nachinjile itarumbeta, batsie imbeli welisanduku lieindakano eya OMWAMI Nyasaye. Khunyanga yamusaafu, iwe nabelihebo muchende nimubotokhana litookho elo okhuula musaafu, nabo abesaaliisi nibakhupa tsitarumbeta.

⁵Mana abesaaliisi abo bakhupe tsitarumbeta lulala obutinyu. Bwangu bwene olwa muhulila obuyoka bwatsio, abandu boosi okhuula baayule obutinyu nako amasiisi kelitookho kalakwa. Ne buli mundu alaseera niyenjila shilunji mwitookho elo.”

⁶Mana Yoshwa nalanga abesaaliisi nababoolela ari, “Bukule lisanduku lieindakano, nabo abandu musaafu khwinywe mutsie imbeli walio nibachinjile tsitarumbeta.”

⁷Mana nalachilisia abandu mbu, bachaache okhuchenda nibabotokhana litookho, nibemiliilwe nabalindi, nibali imbeli welisanduku lieindakano eya OMWAMI Nyasaye.

⁸Olwa Yoshwa yali namalile okhuboolela abandu ario, abesaaliisi musaafu abali nibachinjile tsitarumbeta musaafu, batsia imbeli nibatsikhupa; nabo ebesaaliisi bali nibachinjile lisanduku lieindakano eya OMWAMI Nyasaye nibabalondakhwo inyuma.

⁹Omukanda kwabelihe batsia imbeli wabesaaliisi abali nibakhupanga tsitarumbeta abo, nabo abelihe bandi abalindi bali inyuma welisanduku elo. Mubise ebio biosi tsitarumbeta tsiali nitsikhupungwa.

¹⁰Nebutswa Yoshwa yali nalachilisiye abandube mbu, shibalaayulakhwo, noho kata okhuyochelakhwo ye nashili okhubafuchilila tawe.

¹¹Kho Yoshwa nakhola lisanduku lieindakano eya OMWAMI Nyasaye okhubotokhana mwitookho lulala. Kho nibakalukha nibakona mukambi eshilo eshio.

¹²Mana Yoshwa nabuukha inyanga yalondakhwo mumabwibwi, khandi abesaaliisi nibabukula lisanduku lieindakano eya OMWAMI Nyasaye elo.

¹³Abesaaliisi musaafu abali nibakhupanga tsitarumbeta musaafu abo bemila nibachenda imbeli welisanduku lieindakano eya OMWAMI Nyasaye. Nakwo omukanda kwabelihe nikwimila imbeli wabelisanduku, nabo abelihe bandi abalindi nibaba inyuma welisanduku elo. Tsitarumbeta natsio tsiatsiililila okhukhupwa.

¹⁴Mana khunyanga yakhabili eyo nibachenda nibabotokhana litookho elo lulala khandi, ne nibakalukha mukambi. Bachenda nibabotokhana litookho elo bario khulwa tsinyanga tsisasaba.

¹⁵Khunyanga yomusaafu babuukha mumabwibwi ne nibachenda nibabotokhananga litookho, nibakhola shinga olwa bakholanga buli lwosi. Inyanga eyo niyo eya babotokhanakhwo litookho okhuula musaafu yonyene.

¹⁶Nibakhabotokhana okhuula musaafu, olwa abesaaliisi bali nibakherechekha okhukhupa tsitarumbeta, Yoshwa yalachilisia abandu naboola ari, “Mukhupe tsingalakala, shichila OMWAMI Nyasaye amuhelesiye litookho lino!

¹⁷Litookho lino nende abindu biosi ebilimwo okhuula bisasibwe biosi pe, bibe omusango khu OMWAMI Nyasaye. Okhurusiakhwo Omutamba mbu Rahabu oyo nende abeinzuye bonyene nibo abalatong'a, shichila yabisa abanoonelesi befwe.

¹⁸Ne shimulabukulekhwo eshindu shiosi shiosi eshikhoyile okhusasibwa tawe. Nimubukula, mulaba nimwirereere amatinyu nende obusasishi mukambi yenywe.

¹⁹Buli shindu eshiakaasibwa okhurula khufetsa, khutsahabu, khumukasa nende khushibia, nebiahule ebitakatifu ebia OMWAMI Nyasaye. Okhuula fibiikhwe mwibiishilo elia OMWAMI Nyasaye.”

²⁰Mana abesaaliisi nibakhupa tsitarumbeta. Ne bwangu bwene olwa abandu bahulila nitsikhupanga, baayula obutinyu mana amasiisi kelitookho elo nikalikulukha. Kho abandu boosi nibatikulukha shilunji nibenjila mwitookho nibalibukula.

²¹Beera abandu boosi, abasaatsa, abakhasi, ababuukha nende abakofu, nibekhoonyelanga tsinganga tsiabwe. Khandi beera tsing'ombe, amakondi nende tsisishili tsiabwe.

²²Naye Yoshwa naboolela abasaatsa babili, abali nibarunulisiye eshialo eshio ari, “Tsie munzu yomutamba oyo mana mumurusiemwo halala nende abeinzuye, shinga olwa mwamusuubisia.”

²³Kho abanoonelesi abo nibenjilamwo nibarusiamwo Rahabu, halala nende samwana, nyinamwana, abaana babwe nende abeinzuye boosi. Abanoonelesi abo nibabayila halala nende abakholi babwe habundu halayi, hambi nende ikambi ya Abaisiraeli.

²⁴Mana nibahafia litookho omulilo, nibasamba ebindu ebialimwo biosi, okhuyiniakhwo ebindu biali nibiakaasibwa okhurula khutsahabu, khufetsa, khumukasa nende khushibia. Ebiene ebio babibukula nibabira mwibiishilo elia OMWAMI Nyasaye.

²⁵Nebutswa Yoshwa yahonia obulamu bwa Rahabu, omukhasi omutamba oyo, halala nende abekhobe boosi, shichila yabisa abanoonelesi ba Yoshwa yaruma okhulambuula litookho lia Yeriko. (Abolwibulo lwa Rahabu bashimenyile mu Isiraeli okhuula olwa leelo.)

²⁶Olunyuma lwa Yoshwa nende abandube okhusasia litookho elo, Yoshwa yaraho lilako khubandu nabatsuba ari, “Omundu yesi yesi outeema okhumbakha litookho lia Yeriko, OMWAMI Nyasaye amulaamile eshilaamo shiobubi. Omundu yesi yesi ouchaaka okhumbakha lisiisi, omwanawe omusiani omukhulundu alafwa. Ne omundu yesi yesi oumbakha ebiliibwa bielitookho elo, omwanawe omushe alafwa.”

²⁷Kho OMWAMI Nyasaye nakhoonya Yoshwa mumakhuwa koosi mana ifumaye niyisalaana khubuli mundu mushialo shiosi.