Read wanga YOSHWA 7 Bible Online

YOSHWA 7 - wanga bible

YOSHWA 7

¹Lilako elia OMWAMI Nyasaye yalachilisia Abaisiraeli naboola mbu, shibalabukulakhwo eshindu shiosi shiosi eshiali mu Yeriko, eshiali shikhoyile okhusasibwa, shilialondwa tawe. Omusaatsa undi oweliira mbu, Akhani shiyalilonda ta, mana OMWAMI Nyasaye nasinyishila Abaisiraeli. Akhani yali omusiani wa Karimi, owali omwana wa Zabudi owoluyia lwa Zera, lulala khutsimbia tsia Yuda.

²Yoshwa naruma abasaatsa babili okhurula Yeriko mbu, batsie mwitookho lia Ayi, elili ebukwe wa Betseli, hambi Betsi-abeni, nabalachilisinjia mbu, batsie banoonelesie eshialo eshio. Olwa bali nibashinoonelesiye,

³bachelela nibaboolela Yoshwa bari, “Shibulaho eshichila buli mundu atsie aseere litookho lia Ayi tawe. Ruma abandu bahela ebikhumila bibili (2,000), noho bitaru okhuliseera. Shiolarumakhwoyo omukanda kwosi kwosi kwabelihe okhulwana ta, shichila nelitookho lituutu.”

⁴Kho abandu ebikhumila bitaru nibatsia nibaseera litookho elo, nebutswa bahulwa nibelukhasibwa.

⁵Abandu belitookho lia Ayi babelukhasia okhurula mushiliibwa shielitookho elo okhuula Shebarimu, ewa amachina kasiebungwa. Abandu abo beera Abaisiraeli amakhumi kataru nabasasaba (36) khunjila ikholomokhanga okhurula khushikulu eshio. Mana Abaisiraeli nibaria muno nibafwa emioyo.

⁶Yoshwa nende abemilisi ba Isiraeli nibarandula ebifwalo biabwe mushibeela, nibakwa hasi mafumama imbeli welisanduku lieindakano eya OMWAMI Nyasaye khulwa okhumwinamila. Mana nibatong'a bario mafumama nibepuchile olufu khumirwe chiabwe okhuula olwa eshialo bwela, khulwa khulolosia eshibeela shiabwe.

⁷Mana Yoshwa niyeyiniakanila OMWAMI Nyasaye ari, “Ifwe khuli mushilaamo shiobubi, OMWAMI Nyasaye omwene mahe! Mbushiina nokhwambusia injelekha womwalo kwa Yorodani, okhulekhuula mumakhono ka Amori okhukhwiira? Mbushiina nikhulamenya butswa elubeka undi womwalo kwa Yorodani eyo?

⁸OMWAMI Nyasaye, abandu ba Ayi bahulile abandu befwe mana nibachila nibelukha, ne shiemanyile eshienyala okhuboola tawe.

⁹Abakanani nende abandu boosi abamenyile mushialo eshio balahulilakhwo akekholeshe ako, ne balakhuseera ifwe nibakhubotokhana mana bakhwire fweesi pe! Ne nishiina eshia olakhola khu mbu, ochile abandu baleshe okhuboola mbu, shionyalilwa okhulinda abandubo ta?”

¹⁰OMWAMI Nyasaye nakalusia Yoshwa ari, “Buukha! Mbushiina nokona hasi mafumama orio?

¹¹Abaisiraeli boonoonile! Ndabalachilisia okhusasia buli shindu eshili mwitookho lia Yeriko. Nebutswa bakhayile lilako lianje ne nibabukula nibebiishila bilala khubindu ebio. Beeba ebindu ebio, nibangaatia isie. Mana nibabibiikha halala nende ebindu biabwe abeene.

¹²Khulweshio Abaisiraeli belukhanga abasuku babwe, shichila abeene bulano beyinjisiye mushilaamo eshiobusasishi! Kano niko akachila nibalanyalilwa okhulwana abasuku babwe tawe. Shindalatsiililila okhumukhoonya inywe ta, okhuula olwa musasia ebindu biandamukaania okhubukula!

¹³Otsie oboolele abandu besiiye mana berecheshe okhwitsa ewa endi. Obaboolele berecheshe khunyanga yamukamba, shichila isie OMWAMI Nyasaye, Nyasaye wa Isiraeli, emboola endi, ‘Inywe abandu ba Isiraeli, mubiishile ebindu bindi khubiandalaka mbu, mubisasie! Shimunyala okhulwana mana muhule abasuku benywe ta, okhuula olwa mulaba nimusasiye ebindu ebio!’

¹⁴Khulweshio mukamba mumabwibwi, muletsa imbeli wanje okhulondona nende tsimbia tsienywe. Ne oluyia lwa isie OMWAMI Nyasaye ndalaahula, luletsa imbeli wanje okhulondona nende omuliango kwalwo, nabo abomuliango kwa ndaalaahula, baletsa imbeli wanje okhulondona nende inzu yabwe, nabo abeinzu bandalaahula, baletsa imbeli wanje omundu mulala mulala.

¹⁵Omundu owa ndaahula okhurula mubo, mana anyooleshe nebindu ebio, okhuula asambwe nabeinzuye boosi nende buli shindu eshiali ninashio, shichila akhayile okhuhulila lilako lianje khandi areerire tsisoni tsiamakana khu Abaisiraeli.”

¹⁶Inyanga yalondakhwo mumabwibwi, Yoshwa yareera Abaisiraeli yimbeli ewa OMWAMI Nyasaye, oluyia lulala lulala, mana aboluyia lwa Yuda nibaahulwa.

¹⁷Yoshwa nareera aboluyia lwa Yuda imbeli, eshiliibwa shialwo shilala shilala, mana abeshiliibwa shiabandu ba Zera nibaahulwa. Nareera abeshiliibwa shiabandu ba Zera mulala mulala imbeli ewa OMWAMI Nyasaye, naye Zebudi niyaahulwa.

¹⁸Mana nareera khandi abomuliango kwa Zebudi mulala mulala, naye Akhani omusiani wa Karimi khandi omwitsukhulu wa Zebudi niyaahulwa.

¹⁹Yoshwa namuboolela ari, “Omusiani wanje, boola obwatoto khandi wiyame hano imbeli ewa OMWAMI Nyasaye wa Isiraeli. Khandi mboolelakhwo bulano akokholile. Shiolakabisakhwo khwisie tawe.”

²⁰Akhandi nakalusia ari, “Nakatoto, ndonooneele OMWAMI Nyasaye wabandu ba Isiraeli, ne kano niko aka ekholile.

²¹Mubindu bia khwayaaya, ndalolamwo ingubo eyabandu ba Babuloni bafwalanga, eyobukondo obulayi, nende ifetsa eyihela tsishekeli ebikhumi bibili, nende lichina lieitsahabu, elihela tsishekeli amakhumi karano. Ndabiikombanga muno okhuula nebibukula, ne ebibisile mwiloba mwiheema lianje mukari, ifetsa niyili hasi wabio.”

²²Kho Yoshwa naruma abandu nibatsia mwiheema lia Akhani ne nibanyoola mbu, toto ebindu ebio biali nibikhoyeele okhusasibwa nibiyabiilwe, ifetsa niyili hasi wabio.

²³Abandu abo nibarusia ebindu ebio mwiheema elo, nibabireera khu Yoshwa nende khu Abaisiraeli. Ne nibara imbeli welisanduku lieindakano eya OMWAMI Nyasaye.

²⁴Yoshwa halala nende Abaisiraeli nibatiila Akhani, ifetsa eyo, ingubo, lichina tsana lieitsahabu, nende abaanabe abasiani nabakhana, tsing'ombetsie, tsisishilitsie, amakondike, liheemalie nende biosi ebia yali ninabio, nibabireera hebanda lia Akhori[2].

²⁵Yoshwa nareeba ari, “Mbushiina nokhureerera amatinyu shinga kano? Bulaano OMWAMI Nyasaye alakhureerera iwe amatinyu!” Abandu boosi nibalasa Akhani namachina ne nafwa. Balasa abeinzuye boosi khandi nibafwa, khandi nibasamba ebindubie biosi.

²⁶Nibabunjikha khuye nende khubindu ebio libunjikho likhongo liamachina, eliliho okhuula olwa leelo. Niko akachila handubu yaho nihalangwa mbu, Libanda liamatinyu. Mana liruma elia OMWAMI Nyasaye nilihwa.