Read wanga YOSHWA 8 Bible Online

YOSHWA 8 - wanga bible

YOSHWA 8

¹Mana OMWAMI Nyasaye naboolela Yoshwa ari, “Shiolaria tawe. Shiolafwa omwoyo tawe. Bukula abandu abelihe boosi mana otikulushe ninabo, oseere litookho lia Ayi. Emalile okhukhukhola okhuhula omuruchi welitookho elo, abandube, litookho liene nende eshialoshie.

²Okwisie nosasia litookho lia Ayi khandi niwiira omuruchi walio, shinga olwa wakhola litookho lia Yeriko nende omuruchi walio. Nebutswa munyala okhubukula ebiyaayo bialio nende emiruko chialio, bibe ebioluyiitsi bienywe. Obukulekhwo balala Khubakhupanibo belihe, bakoneshele inyuma welitookho elo mabiswi, kho banyale okhurula mubise bikhoyeele nibaliseera, benelio nibalamanyile tawe.”

³Kho Yoshwa nende abelihebe boosi nibachaaka okhutikulukha nibatsia Ayi. Yoshwa nalobola mubo abasaatsa abalwani abalulu abeitswoni ebikhumila amakhumi kataru (30,000), nabaruma eshilo mushialo eshio.

⁴Nabalachilisia ari, “Rechelesie obulayi bwene. Mukhoyile okhukoneshela okhuseera litookho elo okhunulila inyuma walio. Shimulaba ehale okhurula khulio tawe. Mwesi mube nimwirecheeshe okhuseera.

⁵Isie nende boosi abesikaale ninabo, khulatsia nikhurulila imbeli walio. Ne abelihe belitookho elo, balarula nibakhulondachila, nebutswa ifwe khulelukha nikhukalukha shinga olwakhwakhola olwambeli.

⁶Balakhulondachila okhuula olwa khulaba nikhubayilile ehale okhurula khwitookho elo, shichila balapaara mbu, khwilukhanga okhurula khubo shinga olwa khwabelukha olwambeli. Kho olwa khwilukha okhurula khubo,

⁷inywe murule mukhukoneshela khwenywe nimuseera litookho elo nende okhulibukula. OMWAMI Nyasaye wenywe alahaana litookho elo khwinywe.

⁸Nimwakhamala okhubukula litookho elo, mulihafiekhwo omulilo, shinga olwa OMWAMI Nyasaye yalachilisia. Okhuula mulonde amalako kanje.”

⁹Yoshwa naruma abandu abo, nibatsia habundu wabwe wokhukoneshela nibalindiliile, elubeka lwa Mumbo wa Ayi, hakari welitookho lia Ayi nende Betseli. Nebutswa Yoshwa yeyalisia mukambi nende abandube.

¹⁰Mumabwibwi inyanga yalondakhwo, Yoshwa yabuukha nalanga halala nende abelihebe. Mana Yoshwa mwene nende abemilisi ba Abaisiraeli nibemilila abelihe abo okhuula khwitookho lia Ayi.

¹¹Omukanda kwosi kwelihe, abali ninaye nibatikulukha nibatsia niboola hambi khwitookho okhurulila imbeli walio. Nibakhupa ikambi yabwe hetookho lia Ayi, elubeka lwemasaba, libanda nilili hakari wabwe okhurula khwitookho elo.

¹²Yoshwa yali nabukuule abelihe ebikhumila birano (5,000), nabarumile okhukoneshela, Mumbo welitookho elo, hakari welitookho elo nende Betseli.

¹³Abelihe barechekhwa okhulwana, omukanda kwabelihe omukhongo nikurebwa elubeka lwemasaba welitookho elo, nabo abandi boosi abatong'a nibarechekhwe Mumbo walio. Eshilo eshio, Yoshwa yakalukha okhukona mwibanda elo.

¹⁴Olwa omuruchi wa Ayi yalola abandu ba Yoshwa shiyashinda tawe. Ye omwene nende abelihebe barula nibakholomokha mwibanda lia Yorodani okhuseera Abaisiraeli, habundu halala yaho shinga olwambeli ne nalamanyile mbu, Abaisiraeli bandi bakonesheele litookho elo okhurulila inyuma walio tawe.

¹⁵Yoshwa nende abandube nibekaatia mbu, bahulungwa. Nibachaaka okhwilukha nitsia mushitsiimi.

¹⁶Abelihe boosi abomwitookho elo, bali nibalanjilwe okhulwana Abaisiraeli, ne shinga olwa batsiililila okhulonda Yoshwa, batsiililila bario okhutsia ehale okhurula khwitookho.

¹⁷Buli omusaatsa womwitookho lia Ayi yali narulile mwitookho okhulondachila Abaisiraeli. Abulaho owatong'a okhulinda litookho elo, khandi nabio ebiliibwa bialio biali nibileshilwe nibiikushe butswa.

¹⁸OMWAMI Nyasaye naboolela Yoshwa ari, “Chinguula lifumolio ikulu nohenjesiye khu Ayi, ekhuhelesinjia litookho elo.” Yoshwa nakhola shinga olwa yaboolelwa,

¹⁹ne bwangu bwene olwa yachinguula omukhonokwe okwalimwo lifumo, abalihebe abali nibebisile namukongo welitookho, babuukha bwangu nibelukha nibenjila mwitookho ne nibalibukula, mana nibalihafiakhwo omulilo bwangu muno.

²⁰Olwa abelihe ba Ayi bakhupa lishemo inyuma, balola omwosi nikutuumukhanga yikulu. Injila shiyalikhwoho yokhwihonokosiliamwo ta, shichila Abaisiraeli abali nibeluushe nibahenjile mwibanda liomwalo kwa Yorodani, bashiukhana bulano okhubaseera.

²¹Olwa Yoshwa nende abandube balola mbu, Abaisiraeli bandi bali nibatiilile litookho elo, khandi liali niliyitsanga, bakalukha nibachaaka okhwira abandu ba Ayi.

²²Abaisiraeli bali nibakonesheele boosi barula mwitookho elo nibaseera abandu ba Ai. Kho abandu ba Ai benyoola nibabotokhanwe tsimbeka tsiosi nende Abaisiraeli. Mana nibeerwa boosi. Abulaho kata mulala owehonokokha tawe.

²³Nebutswa batiila omuruchi wa Ai nashili omulamu mana nibareerera Yoshwa.

²⁴Abaisiraeli beera buli omusuku wabwe mwibanda lia Yorodani, ewa abasuku bawe bali nibabalondachiile okhuula. Mana Abaisiraeli nibakalukha Ayi nibeera buli mundu mwitookho elo.

²⁵Yoshwa yatsiililila omukhonokwe nikulimwo lifumo okhuula olwa abandu ebikhumila ekhumi nabibili (12,000) abasaatsa nende abakhasi beerwa boosi.

²⁶Yoshwa shiyalekha okhwira abandu bomwitookho elo ta, nebutswa yatsiililila okhuula olwa yeera buli mundu.

²⁷Abaisiraeli nibabukula abeene emiruko chiabandu abo nende ebindu biabwe ebiali mwitookho elo nibebishila shinga olwa OMWAMI Nyasaye yali nabooleele Yoshwa.

²⁸Yoshwa nasamba Ayi, ne nalilekha nilikwile. Lishikwile lirio okhuula olwa leelo.

²⁹Mana naboha omuruchi oyo khumusaala, omubilikwe nikwelela okhuula khungoloobe. Eliuba nilitsiokhukwa, Yoshwa nalaka mbu, omubili kwomuruchi oyo kuyinibwe khumusaala. Kho nikusukunwa hasi habwinjililo welitookho elo. Mana nibakufuunikha nokubunjikho okukali kwamachina, okushiliho okhuula bulano.

³⁰Yoshwa niyombashila OMWAMI Nyasaye wa Isiraeli eshimalilo shiemisango khushikulu shia Ebali.

³¹Yashiumbakha okhulondana nende amebaalo komukhalabanbi wa Nyasaye Musa yali niyalachilisia Abaisiraeli, shinga olwa kahandikwa mumalako ka Musa kari, “Eshimalilo shiemisango eshiakaasilibwa amachina akalabatsilwakhwo ebibaatsilo ebiebibia tawe.” Bakholela OMWAMI Nyasaye emisango chiabwe emisambe nende okhumureerera emisango chiokhureera omulembe.

³²Habwene yaho Abaisiraeli nibalolanga, Yoshwa yahandika khumachina ako amalako aka Musa yali niyahandika.

³³Abaisiraeli nende abemilisi babwe, abakhongo babelihe babwe, abayaasi babwe halala nende abarende abamenyanga mubo, basinjila khutsimbeka tsibili tsielisanduku lieindakano eya OMWAMI Nyasaye nibahenjile abesaaliisi, abali nibachinjile lisanduku elo. Inusu yabandu abo basinjila nibafutariire eshikulu shia Kerizimu, nabo abandi inusu nibasinjila nibafutariire eshikulu shia Ebali, shinga olwa Musa omukhalabani owa OMWAMI Nyasaye yali niyabalachilisia okhusinjila bario okhulondokhana nende okhuhebwa tsikhabi khwa Abaisiraeli.

³⁴Mana Yoshwa nasooma amalako koosi nomwoyo omukhongo, halala nende aketsikhabi nende akeshilaamo, shinga olwa kahandikwa mushitabo shiamalako.

³⁵Yoshwa yasooma buli lilako lia Musa yahandika khubomukanda boosi, halala nende abakhasi babwe nende abaana abatiiti boosi, kata nende abarende abamenyanga mubo.