Read wanga YOSHWA 9 Bible Online

YOSHWA 9 - wanga bible

YOSHWA 9

¹Obuhuli bwabandu ba Isiraeli bwachaaka okhumanyishila abaruchi boosi abelubeka womumbo womwalo kwa Yorodani, mushialo shiebikulu nende emwalo wabio, nende khulukuku lwosi lweinyanza ikhongo okhuula khulubeka lwemasaba weshialo shia Lebanoni. Abaruchi abarukanga Abahiti, Abamori, Abakanani, Abaperisi, Abahiwi nende Abayebusi,

²boosi bekhung'asia halala nomwoyo mulala okhusanjilila Yoshwa nende Abaisiraeli.

³Ne olwa abandu belitookho lia Gabeoni bahulilakhwo aka Yoshwa yali nakholile khwitookho lia Yeriko nende elia Ayi,

⁴berechekha okhukaatia Yoshwa. Abandi khubo batsia nibabukula ebiokhulia nibara mumakunia akarandukha nende mubifuuko bieidivai biamaseelo biarandukha, nibaboya ebindu ebio biosi khutsisishili.

⁵Befwala ebifwalo ebiamatasi nende ebilaaro biarandukha, ebia bali nibanabilenje. Nakwo omukaate kwa babukula kwali omuumu khandi nikwakhupa olukukhu.

⁶Mana nibatsia mukambi Giligali nibaboolela Yoshwa nende abandu ba Isiraeli bari, “Khurulile mushialo shiehale, ne khwenyanga mbu, mukhole indakano ninefwe.”

⁷Nebutswa Abaisiraeli bakalusia Abahiwi abo bari, “Khwakhakaasia khurie indakano ninenywe? Haundi mumenyanga hambi ninefwe.”

⁸Abandu abo nibaboolela Yoshwa bari, “Khuli abasumbabo.” Naye Yoshwa nabareeba ari, “Ninywe beena? Ne murulanga heena?”

⁹Nabo nibamuboolela amakhuwa kano bari, “Omwami, khurulile mushialo shiehale, shichila khwahuliile ebikhole ebikhongo ebia OMWAMI Nyasayewo yakholile. Khwahuliile ebikhole biosi ebiayakhola mushialo shia Misiri,

¹⁰khandi ebia yakhola khubaruchi babili, aba Amori ebukwe womwalo kwa Yorodani. Abeene mbabano mbu, Sihoni wa Heshiboni nende Ogi wa Bashani, abamenyanga mu Ashitarotsi.

¹¹Abemilisi befwe nende abandu boosi abamenyile mushialo shiefwe bakhubooleele mbu, khukaasie ebiokhulia, ebia okhulia nikhuli khuluchendo, mana khwitse khwakaane ninawe. Khwaboolelwe mbu, khwikhole abasumbabo mana okhole indakano ninefwe.

¹²Lolakhwo omukaate kwefwe kuno, olwa khwarula nango ninakwo nikhwitsa okhwakaana ninawe, kwali nikushili omutunduumu. Nebutswa lola! Bulano kwayomile khandi kwakhupile olukukhu.

¹³Olwa khwetsusia idivai mubifuuko bino, biali nibili ebiyiakha, nebutswa bulano lola! Biranduushe. Ebifwalo biefwe nende ebilaaro biefwe biakofula khulwoluche olurambi.”

¹⁴Abaisiraeli baliakhwo bilala khubiokhulia ebio, shinga eshimanyisio mbu, bafuchiliile indakano eyo, nebutswa shibareeba OMWAMI Nyasaye khukaindakano eyo tawe.

¹⁵Mana Yoshwa nakhola indakano yomulembe nende abandu ba Gibeoni, khandi nabasuubisia mbu, Abaisiraeli balabalekha bamenye nomulembe. Abemilisi ba Abaisiraeli nibabetsuubila okhulinda indakano eyo.

¹⁶Olunyuma lwetsinyanga tsitaru, indakano eyo niyakaasiibwe, Abaisiraeli bamanya mbu, abandu abo bamenyanga ahambi ninabo.

¹⁷Kho Abaisiraeli nibachaaka okhutsia, ne boola khumatookho kabandu abo bamenyangamwo khunyanga yakhataru. Ne amatookho kabwe ako kali Gibeoni, Khefira, Beerotsi nende Kiriatsi Yearimu.

¹⁸Nebutswa Abaisiraeli shibeera abandu bomumatookho ako ta, shichila abemilisi babwe bali nibetsuba muliira elia OMWAMI Nyasaye wabwe mbu, shibalabeerakhwo tawe. Abaisiraeli boosi nibeyiniakanila abemilisi babwe.

¹⁹Nebutswa abemilisi babwe babakalusia bari, “Khwabetsubiile nikhubasuubisia muliira elia OMWAMI Nyasaye wa Isiraeli. Kho shikhunyala okhubasaalisia tawe.

²⁰Okhuula khubaleshe babe mwoyo khulwa eshitsubo shiefwe. Nikhulakhola khurio ta, OMWAMI Nyasaye alakhuhelesia eshinyasio.”

²¹Mana abemilisi nibaboola bari, “Leshe babeho mwoyo.” Kho Abagibeoni nibaba abakhalabani ba aboluyia lwa Isiraeli lwosi, nibabaasiachila tsikhwi nende okhubatsiila amaatsi, shinga olwa abemilisi ba Abaisiraeli bali nibalachilisiye.

²²Yoshwa nalaka mbu, abandu ba Gibeoni bareerwe khuye ne nabareeba ari, “Mbushiina nimukhukaatia mbu, murulile ehale, ne nimumenyanga mwifwe?

²³Khulwa okhuba mukhukaatiye, Nyasaye amulaamila eshilaamo shiobubi, ne shino nishio eshilaba eshinyasio shienywe. Abandu boluyia lwenywe balabetsanga abasumba bokhwasiaka tsikhwi nende okhutsia amaatsi khulwa Ihekalu ya Nyasaye wa Isiraeli.”

²⁴Nabo nibakalusia Yoshwa bari, “Omwami, ifwe abakhalabanibo khwakhola khurio, shichila khwamanya toto bwene mbu, OMWAMI Nyasaye wenywe, yali niyalachilisia omukhalabaniwe Musa mbu, amuhelesie inywe eshialo shiosi, khandi yeere abandu abamenyanga mushio eshio boosi olwa muba nimwinjilamwo. Kho ifwe khwakhola khurio, shichila khwali nikhumuriire inywe khandi nikhuhendelanga obulamu bwefwe.

²⁵Bulano khuli mumakhono kenywe, mukhukhole aka mupaara mbu, kakwanile.”

²⁶Kho Yoshwa nahonokosia Abagibeoni okhurula mumikhono chia Abaisiraeli, ne nalafuchilila Abaisiraeli okhubeera tawe.

²⁷Nebutswa okhurula olwo, Yoshwa yakhola Abagibeoni okhuba abasumba bokhwasiakanga tsikhwi nende okhutsiila Abaisiraeli amaatsi nende khandi okhutsia amaatsi keshimalilo shiemisango eshia OMWAMI Nyasaye. Okhuula olwa leelo, Abagibeoni batsiililila okhukhola emilimo echio habundu ewa OMWAMI Nyasaye yaahula mbu, abandube bamwinamilenjeho.