Read wanga 2 ABATSESALONIKA 1 Bible Online

2 ABATSESALONIKA 1 - wanga bible

2 ABATSESALONIKA 1

¹Eyirula khwisie Paulo nende Sila, nende Timotseyo. Yule khubasanji belikanisa lia Tsesalonika, abali eya Nyasaye Sefwe nende Omwami Yesu Kristo.

²Obukoosia nende omulembe ebirula khu Nyasaye Sefwe nende Omwami Yesu Kristo bibe ninenywe.

³Abaana befwe okhuula khupile Nyasaye orio buli lwosi khulwenywe. Kalihabwene ifwe okhukhola khurio, shichila obusuubili bwenywe bwimeetanga okhushila, khandi obuheeli bwa buli mulala ali ninabwo khubashie bumeetekhanga nibuba obukhongo okhushila.

⁴Niko akachila ifwe abeene khwiyitsialilanga inywe mumakanisa ka Nyasaye. Khwiyitsialanga shinga olwa mutsiilililanga okhwisumilisia nende okhusuubila okhubirira mubusandibwi bwosi nende amanyakhano kamunyolanga.

⁵Kano koosi kalolesinjia habulafu mbu obukhalachi bwa Nyasaye nobwa habwene, khandi bulachila mube abakhoyile obwamibwe obwa munyakhanilanga.

⁶Nyasaye alikhola akali habwene: alahelesia abamusandinjia eshinyasio.

⁷Nenywe abanyakhananga alamuhulusia kata fwesi khandi. Alikhola kano olwa Omwami Yesu alilolekha okhurula mwikulu halala nabamalaikabe abobunyali,

⁸nende omulilo okwolumemo, okhuhaana eshinyasio khubafukula Nyasaye nibakhaya okhuhulila Injiili eya Omwami wefwe Yesu.

⁹Balinyoola eshinyasio shiobusasishi emiyika nemiyika nibahukhasibwa okhurula imbeli wa Nyasaye nende okhurula muluyalilwe olwobunyali.

¹⁰Kano kalikholekha olwa alitsa khu nyanga eyokhunyoola oluyali okhurula khubandu bebe boosi nende olukoosi okhurula khu abo boosi abasuubila muye. Inywe mwesi muliba mubo halala, shichila inywe mwasuubila likhuwa lia Nyasaye elia khwamuyaalila.

¹¹Niko akachila ifwe nikhumusaayila buli lwosi mbu, Nyasaye wefwe amukhole inywe okhuba abakhoyile obulamu obwa yamulanjila okhumenya. Khusaayanga mbu obunyali bwa Nyasaye bumunyalile okhukhola amalayi koosi akamunayanga okhukhola khandi mbu obusuubili bwenywe bumunyalile okhukhola akamwenyanga.

¹²Munjila yino eliira elia Omwami wefwe Yesu lilanyoola oluyali okhurula khwinywe, ne nenywe nimunyoola oluyali okhurula khuye, khulwa obukoosia obwa Nyasaye wefwe nende obwa Omwami Yesu Kristo.