Read wanga 2 ABATSESALONIKA 2 Bible Online

2 ABATSESALONIKA 2 - wanga bible

2 ABATSESALONIKA 2

¹Bulano okhulondana namakhuwa kokhukalukha okhwa Omwami wefwe Yesu Kristo, nende okhukhung'asibwa khwefwe khulwa okhumwakanila abaana befwe khumusaaya mbu,

²muleshe okhuba abangu bokhukoyasibwa mumapaaro kenywe noho okhushiamibwa nende obwibaali mbu, Inyanga eya Omwami yamala okhuula. Haundi kapaarungwa mbu khwaboola amakhuwa kano mubulakusi bwefwe noho khwali mukhuyaala khwefwe noho mbu khwahandika mubarwa.

³Mulafuchilile omundu yesi okhumukaatia munjila yosi tawe. Okhuba inyanga eyo shiyileetsa ta okhuula olwa obukhayi obukali obumalilisia buliba nibwikholeshe, naye Omumayanu oyo owobulamubwe bulisasilibwa elala, aliba naloleeshe.

⁴Alifukula buli omunyasaye nende buli shindu eshinamilungwa. Kata omwene alitsia okhwikhala muhekalu ya Nyasaye, mana niyelaanga omwene mbu, Nyasaye.

⁵Shimwitsulilanga mbu ndamuboolela amakhuwa kano koosi olwa ndali ninenywe ta?

⁶Nebutswa shiliho eshikalilanga kano okhwikholekha bulano, ne inywe mushimanyile eshiatsana. Omumayanu oyo alalolekha mubisebie bikhoyeele.

⁷Obumayanu bwamakana buno bwachaka okhwikholekha nebutswa akali ahambi okhwikholekha, shikalekhola ta, okhuula lwoyo oukekalilanga alaba narusibweho.

⁸Habwene yaho Omumayanu oyo alilolesibwa, nebutswa olwa Omwami Yesu alitsa, yakhafuure emiuyachie, nachio nichiira Omumayanu oyo, khandi alimusasia nobulafubwe obwakhanga.

⁹Omumayanu tsana oyo yakhetse nobunyali obwa Setani, ne alikhola ebilolelo biosi ebiamakana nende ebiokhuhuchisia ebiobubeeyi.

¹⁰Mana alikhoonyela obukati bwosi obwobumayanu khuyabo. Bakhatibe shichila shibayenjisia nende okhuheela obwatoto kho mbu bahonibwe tawe.

¹¹Kho Nyasaye alabarumila roho wobukati okhubashiamia kho mbu basuubile akali akobubeeyi.

¹²Kano kalichila abandu boosi abachama obumayanu ne nibalasuubila obwatoto ta, okhukhalachilwa eshiina.

¹³Abaana befwe, inywe aba Nyasaye aheelanga, khukwanile okhumukhupilanga Nyasaye orio khulwenywe tsinyanga tsiosi. Okhuba Nyasaye yamwahula inywe okhuba abambeli okhuhonibwa, khulwa obunyali obwa Roho khulwa okhusuubila khwenywe mubwatoto.

¹⁴Nyasaye yamulanjila amakhuwa kano khulwa Injiili yakhwamuyaalila; yamulanga khulwa okhunyoola omukabo kwenywe muluyali olwa Omwami wefwe Yesu Kristo.

¹⁵Khulwa ako, abaana befwe, muralile, mana muhande khu akatoto aka khwamwechesia, mubuyaali bwefwe nende mubarwa yefwe.

¹⁶Esaaya mbu Omwami wefwe Yesu Kristo omwene nende Nyasaye Sefwe owakhuheela, mana mubukoosiabwe nakhuhelesia itswoni eyilahwaho ta nende obunaayi oburalilu,

¹⁷amwitsusie inywe nende yitswoni nende amaani buli lwosi mbu muboole nimukhola akali amalayi.