Read wanga 2 ABATSESALONIKA 3 Bible Online

2 ABATSESALONIKA 3 - wanga bible

2 ABATSESALONIKA 3

¹Abaana befwe, elimalilisia ndielino mbu, mukhusaayile, kho mbu likhuwa elia Omwami lianguhe okhulanda nilifuchililwa noluyali, shinga olwa liali mwinywe.

²Musaaye khandi mbu, Nyasaye akhuhonokosie okhurula khubandu abamayanu khandi ababi, okhuba boosi shibasuubilanga oburume tawe.

³Nebutswa Omwami nomwisikwa, ne alamumeeta amaani namulinda obulayi khu Omumayanu oyo.

⁴Ne Omwami akhuhelesinjia obusuubisie mwinywe; nefwe khusuubile mbu inywe mukholanga khandi mulatsilila okhukhola akakhumuboolelanga okhukhola.

⁵Omwami akhoyeele okhumwimilila mukhumanyilisia okhukali khuka obuheeli obwa Nyasaye nende obwifwili oburula khu Kristo.

⁶Abaana befwe, khumulaka muliira elia Omwami wefwe Yesu Kristo mwiyahule okhurula khubaana befwe abatofu abalalondanga amakhuwa akakhwabeechesia tawe.

⁷Inywe abeene mumanyile obulayi bwene mbu, okhuula mukhole butswa shinga nefu khwakhola. Ifwe shikhwali abatofu olwa khwali ninenywe tawe.

⁸Shikhwafuchilila obukhoonyi okhurula khumundu yesi obularunga tawe. Halali khwakhalabana nikhunyakhana; nikhukholanga emilimo eshilo neshiteere, mbu khuleshe okhumusitohela omundu yesi khwinywe.

⁹Khwali habwene okhureeba obukhoonyi okhurula khwinywe, ne shikhwakhola khurio ta, habula khwalumilila okhukhola emilimo kho mbu khube eshilolelo khwinywe.

¹⁰Olwa khwali nikhuli ninenywe khwamuboolelanga mbu, “Oukhaya okhukhola emilimo alafuchililwa okhulia ebiliibwa tawe.”

¹¹Khuboolanga khuko shichila khuhulilanga mbu, bali mwinywe abandu bandi abamenyanga obulamu obwobutofu, ne nibalakholakhwo omulimo kwosi ta, nebutswa beyinjisiinjia mumakhuwa akabandu bandi.

¹²Mulira elia Omwami Yesu Kristo khulakanga abandu abo nikhubachetsiyia mbu, bamenye habwene nibakhola emilimo okhwinyoolela abeene eshiabalia.

¹³Nebutswa, inywe, abaana befwe, mulachonya okhukhola amalayi tawe.

¹⁴Mwinywe yakhaba nalimwo omundu oulafuchilila oburume bweibarwa yino. Naba nalimwo mumumanye mana mumwikane kho afwimbwe omurwe.

¹⁵Nebutswa mulamutiila obusuku ta; habula mumuchetsiiyie shinga omwana wenywe.

¹⁶Omwami omwene, ouli eshinoko eshiomulembe, amuhelesia omulembe tsinyanga tsiosi munjila tsiosi. Omwami abe ninenywe mwesi.

¹⁷Isie omwene ehandikanga amakhuwa kano mumukhono kwanje: “Amashesio okhurula khwisie, Paulo.” Nindio eretsanga iseyi mubuli ibarwa; ehandikanga endio.

¹⁸Obukoosia obwa Omwami wefwe Yesu Kristo bubetsenje ninenywe mwesi.