Read wanga 1 TIMOTSEYO 1 Bible Online

1 TIMOTSEYO 1 - wanga bible

1 TIMOTSEYO 1

¹Eyirula khwisie, Paulo omurume wa Kristo Yesu, owakholwa omurume khulwa lilako lia Nyasaye omuhonia wefwe, nende Yesu Kristo ouli omwami weefu.

²Yule khu Timotseyo omwana wanje watoto mubusuubili, Obukoosia, tsimbabasi, nomulembe; bibe khwiwe okhurula khu Nyasaye sefwe nende Yesu Kristo ouli obunaayi bwefwe.

³Ndenya osikale Efeso shinga olwa ndakhusaaya nenzitsanga Makedonia. Baliyo ebweneyo abandu bandi abechesinjia amechesio kobubeeyi, okanie abandu abo.

⁴Obakaye okhumala ebise khutsingano nende tsinzibulo etsibula eshiakamo tsireranga obuyingani nitsilombakha omupango kwa Nyasaye okulolosibungwa mubusuubili.

⁵Eshifune shielilako lino nokhubuusia obuheeli oburula mumwoyo omweleleshe, amayililisio amalayi nende obusuubili bwatoto.

⁶Abandu bandi bashuukhana khukano mana bakorera mumayingane kabutswa.

⁷Benyanga okhuba abeechesia abamalako ka Musa nebutswa shibamanyilisiye amakhuwa kabwe abeene ta, noho kata eshifunane shiamakhuwa kababoolangakhwo nibomile imoni ta.

⁸Ne Khumanyile mbu amalako namalayi omundu niyakhakekhoonyela habwene,

⁹mukhumanyilisia lino mbu; amalako shikarebwaho khulwa abandu abalunjishi ta; habula karebwaho khulwa abandu abakafunakanga nende abonooni, khulwa abo abalali abasiiyikhu ta, abalali neidiini ta, khandi karebwaho khulwa abandu abeeranga basamwana nende banyinabwe nende khulwa abasinzanga abandu.

¹⁰Amalako karebwaho khulwa abaheyi, abayilananga munjila yeshifwabi, abatiilanga abandu mumabiswi nibabafisa, ababeeyi nende abarusinjia obuloli bwobubeeyi nende abo abakholanga elindi liosi elifukula amechesio katoto aka Nyasaye.

¹¹Amechesio ako kanyoolekhanga mu Injiili eya ndahebwa okhuyaala, Amakhuwa Amalayi akarula khu woluyali khandi owitsoomibwa.

¹²Ekhupila Omwami wefwe Yesu Kristo orio, owambelesia amaani kokhukhola emilimo chianje. Emukhupila orio khulwa khumbasia okhuba omwisiikwa nokhunzahula okhumukhalabanila,

¹³olwa ndali neshili okhumusuubililamwo ndamunyekanga, nemusandia nende okhumufukula. Nebutswa Nyasaye yambeela tsimbabasi shichila ndali neshili okhusuubila mu Kristo, kho shindamanya eshiandakholanga tawe.

¹⁴Ne Omwami wefwe yanzushila obukosiabwe obukhongo, niyambelesia obusuubili nende obuheeli obwakhubetsanga ninabwo olwa khusanga halala nende Kristo Yesu.

¹⁵Amakhuwa kano nakobwatieli, okhuula kafuchililwe khandi kasuubililwe mbu; Kristo Yesu yetsa mushialo okhuhonia abonooni. Nasi nisie omwonooni okhushila boosi,

¹⁶nebutswa Nyasaye yambeela tsimbabasi kho mbu Kristo Yesu alolesie obwifwilibwe bwosi khwisie, shinga eshilolelo khuyabo boosi abalimusuubila, ne olunyuma nibanyoola obulamu obweinziayo.

¹⁷Chende khwitsoomie khandi khuhelesie Nyasaye mulala yenyene oluyali ouli omuruchi weinziayo, oulafwitsanga ta, khandi oulalolekhanga ta, ebisoni nebisoni, Amina.

¹⁸Omwana wanje Timotseyo ekhulachilisia lilako lino, okhulondana nende obulakusi bwarumbulwa khale khwiwe. Orumishile amakhuwa ako shinga ebimanulwa, kho mbu olwane lihe obulayi.

¹⁹Ne otinye khubusuubilibwo khandi obe namayililisio ameleleshe. Abandu bandi shibahulilisinjia amayililisio kabwe komumwoyo ta, kho basasia obusuubili bwabwe.

²⁰Mubenabo balimwo Himenayo nende Alekisanda, aba ndahelesia eshinyasio khulwa okhubahaana khubunyali bwa Setani, kano kalabeechesia kho baleshe okhunyeka Nyasaye.